استانا. 19 اقپان. ەندى ەلىمىزدە «حالال» اتاۋى «ادال» بولىپ وزگەرمەكشى. حالىقارالىق حالال ستاندارتىنىڭ قازاقستاندىق بالاماسىن ەنگىزۋدى مۇسىلماندار ءدىني باسقارماسىنىڭ وكىلدەرى ۇسىندى. بۇل تۋرالى bnews.kz حابارلادى.
يسلام دىنىندە «رۇقسات ەتىلگەن» دەگەن ماعىنانى بىلدىرەتىن «حالال» ءسوزىن «ادال» دەپ وزگەرتۋدى قازاقستان مۇسىلماندارى ءدىني باسقارماسى وسىدان بىرنەشە اي بۇرىن ويلاستىرعان. ءالى زاڭداستىرىلماعان باستاماعا ساي, سەرتيفيكاتقا قول جەتكىزۋ ءۇشىن زاۋىتتاردا بەينەباقىلاۋ كامەرالارى ورناتىلۋى ءتيىس. «وسىنىڭ ارقاسىندا ساتىپ الۋشىلار تاۋارلاردىڭ قالاي وندىرىلەتىنىن ونلاين-رەجيمىندە باقىلاي الادى», دەپ جازادى پورتال.
جاڭا تالاپتاردىڭ قىر-سىرىمەن قاراعاندىنىڭ كاسىپكەرلەرى دە تانىس. حالىقارالىق حالال ستاندارتىنىڭ قازاقستاندىق بالاماسىنىڭ ەنگىزىلۋىن العاشقى بوپ ەستىگەن ەت كومبيناتىنىڭ باسشىلىعى اسىرەسە بيزنەستەرى ءۇشىن الاڭدايدى. ويتكەنى, مۇسىلماندار ءدىني باسقارماسى اتاۋىن وزگەرتكەنىمەن, قاراجات جاعىن قاراستىرمايدى ەكەن. سوندىقتان جاڭا ەرەجە بويىنشا ساتىپ الىنعان قۇرالداردىڭ شىعىنىن ءار كومپانيا ءوزى كوتەرۋى ءتيىس.
«ەگەر جاڭا باستاما زاڭداستىرىلسا, جاڭا وزگەرىستەر پايدا بولادى. ياعني ءبىز شىعىندالامىز دەگەن ءسوز. ءبىزدىڭ كاسىپورىننىڭ ونىمدەرى حالال ستاندارتىنا ساي كەلەدى. شۇجىق جاسايتىن قۇرىلعىلارىمىز بەن تسەحىمىز بار. ماماندار حالال ونىمدەردىڭ شىعارىلۋىن تاڭەرتەڭنەن كەشكە دەيىن قاداعالايدى», - دەيدى نۇرلان دۇيسەنباەۆ.
ال كۇندەلىكتى حالال ونىمىمەن تۇتىناتىن قاراپايىم حالىق ءونىمنىڭ اتاۋى ەمەس, ساپاسى وزگەرمەسە ەكەن, دەر تىلەيدى.
قالاي بولعاندا دا, بيىلعى جىلعى حالال سەرتيفيكاتتاردىڭ مەرزىمى اياقتالىپتى. قازاقستان مۇسىلماندارى ءدىني باس باسقارماسىنىڭ وكىلدەرى ونىمدەردەگى حالال ءسوزىن ادال دەپ وزگەرتۋگە بەل بۋىپ وتىر. ءتىپتى, ول ءۇشىن جاڭا تالاپتارمەن شىعارىلعان ونىمدەردى راستاۋعا ارنايى زەرتحانا قۇرىلىپ, 250 يمام تاجىريبەدەن ءوتىپ كەلگەن.
مۇرات ايتقوجا.