قىتايدىڭ نينبو قالاسىندا وتكەن WTA 500 حالىقارالىق ءتۋرنيرىنىڭ باس جۇلدەسىن ەلىمىزدىڭ ءبىرىنشى راكەتكاسى ە.رىباكينا جەڭىپ الدى. وسى تولايىم تابىستىڭ ارقاسىندا ەلەنا اپتانىڭ باسىنان رەسمي تۇردە الەمنىڭ جەتىنشى راكەتكاسى بولادى.
ءتۋرنيردىڭ ءبىرىنشى اينالىمىندا بوس بولعان ە.رىباكينا ەكىنشى تۋردا ۋكراينالىق تەننيسشى دايانا ياسترەمسكايامەن (№30 WTA) كەزدەستى. اسا تارتىستى وتكەن ويىن جەرلەسىمىزدىڭ پايداسىنا شەشىلدى, ەسەپ – 6:4, 6:7(6), 6:3. شيرەك فينالدا ەلەنا اۋستراليالىق ايلا ءتومليانوۆيچتى (№104) تاس-تالقان ەتىپ ۇتتى – 6-2, 6:0. جارتىلاي فينالدا ەجەلگى قارسىلاسى, يتاليالىق جاسمين ءپاولينيدى دە ەركىن ەڭسەردى, ەسەپ – 6:3, 6:2. شەشۋشى كەزدەسۋدە رەسەيلىك ەكاتەرينا الەكساندروۆانى ءۇش سەتتە, 3:6, 6:0, 6:2 ەسەبىمەن جەڭدى.
نينبو كورتتارىندا بۇرناعى ويىنىن تاپقانداي, بارىنشا جيناقى ويناپ, شەبەرلىكتىڭ ناعىز ۇلگىسىن كورسەتكەن ەلەنا قورجىنىنا 500 رەيتينگتىك ۇپاي سالىپ, 101 000 دوللار (54 259 220 تەڭگە) تابىس تاپتى. ءسويتىپ, 1–8 قاراشا ارالىعىندا ەر-رياد (ساۋد ارابياسى) قالاسىندا وتە-ءتىن جىلدىڭ قورىتىندى ءتۋرنيرى-نە قاتىسۋ مۇمكىندىگى ارتا ءتۇستى.
جالپى, بۇل جەڭىس ە.رىباكينانىڭ بيىلعى ماۋسىمداعى ەكىنشى جەتىستىگى. مامىر ايىنىڭ باسىندا ول فرانتسيانىڭ ستراسبۋرگ قالاسىندا وتكەن WTA 500 ساناتىنداعى تۋرنيردە توپ جارعان بولاتىن.
قازىردە ە.رىباكينا 4505 رەيتينگتىك ۇپايعا يە, ونىڭ ەڭ جاقىن ءىزباسارلارىندا سايكەسىنشە 4449, 4319 ۇپاي بار. سونداي-اق رەيتينگتە التىنشى ورىندا تۇرعان جاسمين پاولينيدەن بار-جوعى 20 ۇپايى كەم ەكەنىن دە ايتا كەتكەن ءجون.