تاراز قالاسىندا قۇتقارۋشىلار كۇنى جانە قازاقستان رەسپۋبليكاسى توتەنشە جاعدايلار مينيسترلىگىنىڭ 30 جىلدىعىنا ارنالعان سالتاناتتى جيىن ءوتتى, دەپ حابارلايدى Egemen.kz.
ءىس-شاراعا وبلىس اكىمىنىڭ ءبىرىنشى ورىنباسارى نۇرجان كالەندەروۆ, قۇقىق قورعاۋ ورگاندارىنىڭ باسشىلارى, توتەنشە جاعدايلار دەپارتامەنتىنىڭ ارداگەرلەرى مەن قىزمەتكەرلەرى قاتىستى.
ءىس-شارا قىزمەتتىك بورىشىن ورىنداۋ كەزىندە ەرلىكپەن قازا تاپقان حالىق قاھارماندارى مەيىرجان ايمانوۆ پەن عازيز بايتاسوۆتىڭ ەسكەرتكىش-بيۋستىنە گۇل شوقتارىن قويۋ جانە ولاردىڭ رۋحىنا تاعزىم ەتۋدەن باستالدى.
«بالاساعۇن» ورتالىق كونتسەرت زالىندا جالعاسقان جيىندا نۇرجان كالەندەروۆ ەرلىك پەن ادالدىقتى, باتىلدىق پەن جاۋاپكەرشىلىكتى تۋ ەتكەن قۇتقارۋشىلاردى كاسىبي مەرەكەسىمەن قۇتتىقتاپ, سىن ساعاتتا الدىڭعى شەپتە جۇرگەندەرى ءۇشىن العىس ءبىلدىردى.
وڭىردە توتەنشە جاعدايلاردىڭ الدىن الۋ جانە ولاردى جويۋ بارىسىندا ەرەكشە كوزگە تۇسكەن قىزمەتكەرلەر ماراپاتتالدى. ولارعا وبلىس اكىمىنىڭ «وبلىسقا سىڭىرگەن ەڭبەگى ءۇشىن» بەلگىسى, قۇرمەت گراموتاسى مەن العىسحاتى تابىستالدى. سونىمەن بىرگە توتەنشە جاعدايلار دەپارتامەنتىنە 10 تەلەديداردىڭ سەرتيفيكاتى بەرىلدى.
تجد باستىعى, پولكوۆنيك ارمان توقانوۆ ءوز ارىپتەستەرىنە ارناۋلى اتاقتار مەن «توتەنشە جاعدايلار مينيسترلىگىنە 30 جىل» مەرەكەلىك مەدالىن تابىس ەتتى. بۇدان بولەك, ەرلىكپەن قازا تاپقان قۇتقارۋشىلاردىڭ اتا-انالارى مەن جۇبايلارىنا قارجىلاي سەرتيفيكاتتار بەرىلىپ, ەرەكشە قۇرمەت كورسەتىلدى.
بۇل كۇنى قالا ورتالىعىنداعى الاڭدا زاماناۋي ءورت جانە قۇتقارۋ تەحنيكالارى مەن قوندىرعىلارىنىڭ كورمەسى كوپشىلىك نازارىنا ۇسىنىلدى.