كەشە ماڭعىستاۋ وبلىسى مادەنيەتىنىڭ استانا قالاسىنداعى كۇندەرى اياسىندا «شابىت» شىعارماشىلىق ورتالىعىندا اقىن وڭايگۇل تۇرجاننىڭ ادەبي سازدى-درامالىق «تەڭىزدەر دە شولدەيدى» اتتى شىعارماشىلىق كەشى ءوتتى. جىر كەشىنە كورنەكتى قالامگەر ءابىش كەكىلباەۆ, تانىمال عالىم مىرزاتاي جولداسبەكوۆ باستاعان ءبىر توپ زيالى قاۋىم وكىلدەرى, استانا قالاسى اكىمدىگىنىڭ جاۋاپتى قىزمەتكەرلەرى قاتىستى.
اقىن, فيلولوگيا عىلىمدارىنىڭ كانديداتى وڭايگۇل تۇرجان بۇگىندە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جۋرناليستيكا جانە ساياساتتانۋ فاكۋلتەتىنىڭ دوتسەنتى. ول سونداي-اق, فاريزا وڭعارسىنوۆا اپامىز نەگىزىن قالاعان «تۇمار» جۋرنالىنىڭ باس رەداكتورى, عالىم-زەرتتەۋشى, اۋدارماشى. جىر كەشىنىڭ يەسى وسىعان دەيىن «سامال», «شەرقالا», «جىر كىتابى» سياقتى بىرنەشە كىتاپتاردى شىعارىپ ۇلگەرگەن تالانت يەسى. وسىنداي ەڭبەكتەرى ءۇشىن تولەگەن ايبەرگەنوۆ اتىنداعى ادەبي سىيلىقتىڭ لاۋرەاتى اتانعان.
مازمۇندى ولەڭدەرىمەن كوپشىلىك ىقىلاسىنا بولەنگەن وڭايگۇل تۇرجان ءوزىنىڭ جىر كەشىندە ءباسپاسوز وكىلدەرىنە سۇحبات بەردى. «بۇگىنگى قوعامدى ءتۇزۋ جولعا سالىپ, تاربيەلەيتىن قۇرال – ولەڭ, – دەدى اقىن. – نەگىزىنەن مەن ءوزىمنىڭ ولەڭدەرىمدى ءبىر شولىپ قاراپ وتسەم, ازاتتىققا جەتكەنگە دەيىنگى, ازاتتىقتى العاننان كەيىنگى جاعدايلار تابيعاتتىڭ تىلىمەن سويلەگەن ەكەن. سول تابيعاتتىڭ تىلىمەن سويلەگەن بوستاندىق تۋرالى, سول بوستاندىقتى العاننان كەيىنگى كوڭىل-كۇيىمىزدى جەتكىزەتىن ولەڭدەردى جيناقتاپ, ازاتتىق تۋرالى وسىنداي كەشتى ۇيىمداستىرىپ جاتىرمىز».
«تەڭىزدەر دە شولدەيدى, شارشاتتى ونى كۇنگەي لەپ. جارتاسقا دا سەنبەيدى, ارعى تەگىڭ قۇم عوي دەپ», – دەپ كەلەتىن ولەڭ جولدارىنان تابيعات, قۇم, جۋسان, تەڭىز تولقىنى بولىپ ءتىل قاتىپ, جان-جۇرەگىمەن وبرازعا كىرە بىلەتىن اقىن شەبەرلىگى مەن شىنايىلىعى جىر كەشىنە جينالعان كىم-كىمدى بولماسىن بەيجاي قالدىرمادى. اسىرەسە, ساحناداعى بەينەتاسپا ارقىلى كورسەتىلگەن اسەم تابيعاتتىڭ كوركەم كورىنىستەرى اقىن جىرلارىمەن قوسىلا ۇشتاسىپ, ءۇندەسىپ, وقىرمان كوڭىلىن تولقىتىپ, تەبىرەنتە ءبىلدى. ءسويتىپ, كورەرمەن قاۋىمدى ەرەكشە اسەرگە بولەدى.
راۋشان تاۋىرحانقىزى,
جۋرناليست.
سۋرەتتى تۇسىرگەن
ەرلان وماروۆ.