ەلىمىزدە ينكليۋزيۆتى ساياسات حالىقارالىق كونۆەنتسيا تالابىنا سايكەس دامىپ كەلەدى. بۇل – مەملەكەتتىك ساياساتتىڭ دا باسىم باعىتىنىڭ ءبىرى.
«ينكليۋزيۆتى ءبىلىم بەرۋ» ۇعىمى قازاقستان رەسپۋبليكاسىنىڭ ء«بىلىم تۋرالى» زاڭىندا بەكىتىلگەن, بۇل بارلىق بالانىڭ ەرەكشە ءبىلىم بەرۋ قاجەتتىلىكتەرى مەن جەكە مۇمكىندىگىن ەسكەرە وتىرىپ, ءبىلىم الۋ قۇقىعىن كەپىلدەيدى.
زاڭنامالىق دەڭگەيدە ەرەكشە ءبىلىم بەرۋ قاجەتتىلىكتەرى بار بالالاردى بارلىق ءبىلىم دەڭگەيىندە وقىتىپ, ارنايى جاعداي جاساۋعا مەملەكەتتىك كەپىلدىك بەرىلگەن. سونداي-اق ءبىلىم بەرۋ قاجەتتىلىگىن باعالاۋدى, پسيحولوگيالىق-پەداگوگيكالىق قولداۋدى, وقۋ جوسپارىن, باعدارلاماسىن جانە وقۋشى جەتىستىگىن باعالاۋ جۇيەسىنىڭ ارتۇرلىلىگى مەن يكەمدىلىگىن قامتاماسىز ەتۋگە قاتىستى نورمالار ەنگىزىلگەن.
بۇگىنگى تاڭدا ەلىمىزدە 6 مىڭنان استام مەكتەپتە (90%) ينكليۋزيۆتى ءبىلىم بەرۋگە ارنالعان جاعداي جاسالعان. سونىڭ ىشىندە كەدەرگىسىز قولجەتىمدىلىك جانە قاجەتتى ماماندارمەن قامتاماسىز ەتىلدى. ينكليۋزيۆتى بىلىممەن 100 مىڭنان استام ەرەكشە ءبىلىم بەرۋ قاجەتتىلىكتەرى بار بالالار قامتىلعان.
مەملەكەت باسشىسىنىڭ تاپسىرماسى بويىنشا «كەلەشەك مەكتەپتەرى» ۇلتتىق جوباسى بەلسەندى جۇزەگە اسىپ وتىر. جوبا اياسىندا بارلىعى 460 مىڭ وقۋشى ورنى اشىلادى.
«كەلەشەك مەكتەپتەرى» جوباسى اياسىندا پەداگوگتار مەن وقۋشىلارعا ىڭعايلى ءارى قاۋىپسىزدىك جاعدايى جاسالعان. مۇنداي ءبىلىم وشاعىندا ەرەكشە ءبىلىم بەرۋ قاجەتتىلىكتەرى بار بالالارعا ارنالعان كەڭىستىكتى بەيىمدەۋ قاراستىرىلعان. سونداي-اق پسيحولوگ, الەۋمەتتىك پەداگوگ, لوگوپەد جانە باسقا ماماندار ءۇشىن ارنايى كابينەت جابدىقتالعان. مۇندا ارنايى پەداگوگتار, پەداگوگ-پسيحولوگتار جانە پەداگوگ-اسسيستەنتتەر سياقتى بىلىكتى ماماندار جۇمىس ىستەيدى. ولار ەرەكشە قاجەتتىلىكتەرى بار بالالارعا كومەكتەسەدى.
«كەلەشەك مەكتەپتەرى» ينكليۋزيۆتى ءبىلىم قاعيداسىن كادىمگى جالپى ءبىلىم بەرەتىن مەكتەپ سەكىلدى تولىق جۇزەگە اسىرادى. ءبىلىم ورداسىندا عيماراتتاردى جوبالاۋ كەزىندە كەدەرگىسىز ورتا تالاپتارى ەسكەرىلگەن: پاندۋستار, ليفتتەر, كەڭ وتكەلدەر, ارنايى سانيتارلىق توراپتار جانە ناشار كورەتىندەر مەن ەستۋ قابىلەتى تومەن ادامدارعا ارنالعان ناۆيگاتسيا جۇيەسى جاسالعان.
وقۋ ۇدەرىسى – بارشاعا قولجەتىمدى. ونىڭ اياسىندا جەكە وقۋ باعدارلامالارى, پەداگوگ-اسسيستەنتتەر مەن پسيحولوگيالىق-پەداگوگيكالىق قولداۋ جۇزەگە اسادى. سونىمەن قاتار STEM زەرتحانالارى مەن ينتەراكتيۆتى تاقتالار سياقتى زاماناۋي تەحنولوگيانى ەرەكشە ءبىلىم بەرۋ قاجەتتىلىكتەرى بار بالالارمەن بىرگە ءاربىر وقۋشى پايدالانادى.
سوڭعى ەكى جىلدا جاڭا فورماتتاعى 176 مەكتەپ سالىندى. بيىل جىل سوڭىنا دەيىن تاعى 41 مەكتەپ پايدالانۋعا بەرىلەدى.
بۇلبۇل ەلەۋسىنوۆا,
وقۋ-اعارتۋ مينيسترلىگى ينكليۋزيۆتى جانە ارنايى ءبىلىم بەرۋ دەپارتامەنتىنىڭ ديرەكتورى