2025 جىلعى 12-14 قازاندا الماتى قالاسىندا وتكەن «Aspan Fest – 2025» حالىقارالىق دروندار جارىسىندا ورالدىق جاس تەحنيكتەر كەرەمەت ناتيجەگە قول جەتكىزدى. باتىس قازاقستان وبلىسى اتىنان قاتىسقان وبلىستىق بالالار تەحنيكالىق شىعارماشىلىعى ورتالىعىنىڭ وقۋشىلارى جوعارى جۇلدەگە يە بولىپ, قىتايدا وتەتىن الەمدىك دوداعا جولداما ۇتىپ الدى, دەپ حابارلايدى Egemen.kz.
«Aspan Fest – 2025» حالىقارالىق دروندار جارىسى ەلىمىزدە بيىل ءۇشىنشى مارتە ءوتىپ جاتىر. وسىنداي العاشقى جارىس 2023 جىلى ورال قالاسىندا ۇيىمداستىرىلعان بولاتىن. قازىر ەلىمىزدىڭ بارلىق وڭىرىنە تاراپ, مەكتەپ باعدارلامالارىنا دا ەنگىزىلە باستاعان FPV دروندار سايىسى حالىقارالىق دەڭگەيگە شىقتى دەۋگە بولادى. ويتكەنى وسى سوڭعى جارىسقا قاتىسۋعا 10 مەملەكەتتەن كوماندا نيەت ءبىلدىرىپ, 80-گە جۋىق پيلوت قاتىسقان ەكەن.
«جارىس وتە تارتىستى ءوتتى. بىلتىرعىمەن سالىستىرعاندا سايىسقا قاتىسۋشىلار سانى دا ءوستى, ال درون ۇشىرۋ ساپاسى وتە جوعارى دەڭگەيدە بولدى», دەيدى باتىسقازاقستاندىق كوماندا جەتەكشىسى ايبەك ميرعاليەۆ. ايتا كەتەيىك, ايبەك يسلامعالي ۇلى – وبلىستىق بالالار تەحنيكالىق شىعارماشىلىعى ورتالىعىنىڭ قوسىمشا ءبىلىم بەرۋ پەداگوگى, «اۆياۇلگىلەۋ» ۇيىرمەسىنىڭ جەتەكشىسى.
الماتىدا وقۋشىلار ميكرودروندار كاتەگورياسى بويىنشا دا, ۇلكەن دروندار بويىنشا دا سىنعا تۇسكەن. اسىرەسە جىلدامدىعى 100-200 كم/ساعات جىلدامدىقپەن ۇشىپ, كەدەرگىلەر اراسىنان وتەتىن بەسديۋيمدىك دروندار سايىسى وتە تارتىستى بولعان ەكەن. جارىستار الەمدىك MultiGP ۇلكەن ليگالار ەرەجەسىمەن وتكەن. ەلىمىزدە تۇڭعىش رەت ۇيىمداستىرىلعان اۆيامودەلدەۋ جارىسىندا كوماندالار كادىمگى اۋە ۇرىسىنا قاتىسىپتى.
ء«بىزدىڭ كوماندا «فۋتبول درون» سايىسىندا ءبىرىنشى ورىندى جەڭىپ الدى. ميكرودرون جارىسىندا ورال قالاسىنداعى №28 مەكتەپ-ليتسەيدە وقيتىن شاكىرتىمىز ءاليحان نىسانباەۆ ءبىرىنشى ورىنعا شىقتى. وسى ءاليحان بايتەرەك اۋدانى بايقونىس اۋىلىنداعى قادىر مىرزا ءالى اتىنداعى مەكتەپ وقۋشىسى مەڭدىبەك تەمىرحانوۆپەن بىرگە «اۋە ۇرىسىنا» قاتىسىپ, ەكىنشى ورىنعا يە بولدى. بەسديۋيمدىك درون جارىسىندا دا ءاليحان نىسانباەۆ ەكىنشى ورىنعا تۇراقتادى. وسىنداي ناتيجەلەرىمىزدىڭ ارقاسىندا الەمدەگى ەڭ مىقتى چەمپيوناتقا – شانحاي قالاسىندا وتەتىن دۇنيەجۇزىلىك اۋە سپورتى فەدەراتسياسى (FAI) ۇيىمداستىرعان حالىقارالىق جارىسقا جولداما الدىق», دەيدى ايبەك يسلامعالي ۇلى.
FPV درون, اۆيامودەلدەۋ – بۇگىندە الەم نازارىن ەرەكشە اۋدارىپ وتىرعان سالانىڭ ءبىرى. اسىرەسە بۇل سالاعا جاس جەتكىنشەكتەردى قىزىقتىرۋ, وقۋشىلاردى تارتۋدىڭ كەلەشەگى زور. قازىر باتىس قازاقستان وبلىسىندا جۇزدەگەن بالا وسى سالاداعى ۇيىرمەلەرگە قاتىسىپ ءجۇر. سونىڭ ىشىندە قالادان تىس اۋىل-اۋدانداردا دا وسى سالانى دامىتىپ, بالالاردى تەحنيكالىق ماماندىقتارعا تارتىپ جۇرگەن باستاماشىل ۇستازدار كوبەيىپ كەلەدى.