سەمەي اكىمى سايلاندى

تاڭعى 07.00-دە سەمەي قالاسىنداعى بارلىق سايلاۋ بولىمشەسى جۇمىسىن باستادى. قالادا بارلىعى 129 سايلاۋ كوميسسياسى ۇيىمداستىرىلدى, ونىڭ ىشىندە 1 اۋماقتىق جانە 128 ۋچاسكەلىك كوميسسيا جۇمىس ىستەدى. داۋىس بەرۋ ۇدەرىسىنە اناۋ ايتقانداي زاڭ تالاپتارىن بۇزۋ نەمەسە قولايسىز جاعدايلار تۋىنداعانى تۋرالى اقپارات جوق. ىڭ-شىڭسىز تىنىش ءوتتى. قالادا قوعامدىق كولىكتەر سايلاۋ ۋاقىتى بىتكەنشە تەگىن قاتىنادى. مۇگەدەكتىگى بار ازاماتتاردىڭ بارلىق قاجەتتى جاعدايى ەسكەرىلدى, سونداي-اق وعان ەرىكتىلەردىڭ كومەگى ۇيىمداستىرىلدى. جاستار بارىنشا بەلسەندى قاتىستى. ولاردىڭ كوبى العاش رەت داۋىس بەرىپ, ءوز قالاسىنىڭ بولاشاعىنا بەيجاي قارامايتىنىن, وزگەرىس پەن دامۋعا دەگەن ورتاق نيەتىن كورسەتتى.

وبلىس اكىمى بەرىك ءۋالي قالا جۇرتشى­لىعىمەن بىرگە مەديتسينالىق ۋنيۆەرسيتەتتە ورنالاسقان №93 سايلاۋ ۋچاسكەسىنە بارىپ, ءوز تاڭداۋىن جاسادى.

– بۇگىن – سەمەي قالاسى تاريحىنداعى ەرەكشە كۇن. قالا تۇرعىندارى تۇڭعىش رەت ءوز اكىمىن تىكەلەي داۋىس بەرۋ ارقىلى سايلايدى. بۇل – مەملەكەت باسشىسى قاسىم-جومارت توقاەۆ باستاماشى بولعان سايا­سي رەفورمالاردىڭ ناقتى جۇزەگە اسۋىنىڭ ايقىن كورىنىسى. پرەزيدەنتتىڭ «حالىق ۇنىنە قۇلاق اساتىن مەملەكەت» تۇجىرىمداماسى مەن باسقارۋ جۇيەسىن دەموكراتيالاندىرۋ باعىتىنداعى جاڭا قادامدار بۇگىندە ناقتى ءىس جۇزىندە كورىنىس تاۋىپ وتىر. سەمەيلىكتەر, سونىڭ ىشىندە جاستار مەن اعا بۋىن وكىلدەرى تاڭەرتەڭنەن بەرى سايلاۋ ۋچاسكەلەرىنە كەلىپ, ازاماتتىق بەلسەندىلىك تانىتىپ جاتىر. بۇل – ەلدەگى ساياسي مادەنيەتتىڭ ءوسىپ كەلە جاتقانىن, حالىقتىڭ ءوز قالاسىنىڭ تاعدىرىنا بەيجاي قاراماي, جاۋاپكەرشىلىكپەن قاراي باستاعانىن كورسەتەدى. وبلىس ورتالىعىنىڭ اكىمىن تىكەلەي سايلاۋ – تۇرعىندار مەن جەرگىلىكتى بيلىك اراسىنداعى سەنىمدى نىعايتاتىن جاڭا ءداۋىردىڭ باستاۋى, – دەدى ايماق باسشىسى.

ال قالالىق اۋماقتىق كوميسسيا ءتورايىمى گۇلجان قۋانىشەۆانىڭ ايتۋىن­شا, قالاداعى ءاربىر سايلاۋشىعا شاقىرۋ قاعازى تاراتىلعان. سونىمەن قاتار 10 قازاندا ساعات 09.00-دە سايلاۋ­شىلاردىڭ بايلانىس نومىرلەرىنە SMS-حابارلاما جولدانعان.

– بيىلعى سايلاۋدىڭ ەرەكشەلىكتەرىنىڭ ءبىرى – العاش رەت برايل قارپىن بىلەتىن 40 ازاماتقا ارنايى وسى فورماتتا شاقىرۋ قاعازدارى جىبەرىلدى. بۇل ازاماتتار دا ءوز سايلاۋ بولىمدەرىنە بارىپ, داۋىس بەردى. جالپى بارلىق ۋچاسكەدە سايلاۋشىلاردىڭ جوعارى بەلسەندىلىگى بايقالدى, – دەيدى ول.

سايلاۋعا ساربازدار دا قاتىستى. سەمەيدەگى 36803 اسكەري ءبولىمىنىڭ ساربازدارى №132 سايلاۋ بولىمشەسىنە كەلىپ, داۋىس بەردى. اباي گارنيزونىنىڭ قولباسشىلىعى سايلاۋ ناۋقانى كەزىندە ساربازدارعا قاجەتتى جاعداي جاساپ, ولاردىڭ قۇقىقتارىنىڭ جۇزەگە اسۋىنا كومەكتەستى. سونىمەن قاتار «ەلىماي» فۋتبول كلۋبىنىڭ سپورتشىلاردى دا قاز-قاتار وتىرىپ, سايلاۋ دا ءوز داۋىستارىن بەردى. بۇل دا ناۋقاننىڭ اجارىن كىرگىزگەنى راس.

سايلاۋ بارىسىن ساياسي پارتيالار, قوعام­دىق بىرلەستىكتەر مەن تاۋەلسىز باقىلاۋ­شى­لار قاداعالادى. ولاردىڭ سوزىنە سەنسەك, داۋىس بەرۋ قولدانىستاعى زاڭناما تالاپتارىنا ساي ءوتتى, ال اشىقتىق پەن جاريالىلىق جوعارى دەڭگەيدە قامتاماسىز ەتىلدى.

زاڭ تالابىنا سايكەس, سايلاۋ قورىتىندىسى ءۇش كۇن ىشىندە جاريالانۋعا ءتيىس. وسىعان وراي اۋماقتىق سايلاۋ كوميسسياسىنىڭ 2025 جىلدىڭ 12 قازاندا وتكەن اباي وبلىسى سەمەي قالاسىنىڭ اكىمىن سايلاۋ قورىتىندىسى كەشە ايقىن بولدى. اۋماقتىق سايلاۋ كوميس­سيا­سى­نىڭ مالىمەتىنشە, قالاداعى سايلاۋشىلار سانى – 220 761. ونىڭ 53,7%-ى سايلاۋعا قاتىستى (118 553 سايلاۋشى). ءۇي-جايدان تىس داۋىس بەرگەندەر – 2 548 ادام (سايلاۋعا قاتىسقان سايلاۋشىلاردىڭ – 2,15%), ونىڭ ىشىندە 459 سايلاۋشى ءارتۇرلى ساناتتاعى مۇگەدەكتىگى بار ازاماتتار (18,01%). جارامسىز بيۋللەتەندەر سانى – 2 482, «بارلىعىنا قارسىمىن» جولىندا بەلگىسى بار – 4 310. ءار كانديدات ءۇشىن بەرىلگەن داۋىستار سانى – 111 761 ادام. داۋىس بەرۋ قورى­تىن­دىسى ناتيجەسى: بەكجاساروۆ ايبولات قايركەش ۇلىنا – 8,4%  (9 763-داۋىس); تولەۋوۆ قانىش ماقسۇت ۇلىنا – 10,8 % (12 557 – دا­ۋىس); قوجانباەۆ ادىلەت نۇرساعات ۇلى – 77,1% (89 441-داۋىس) سايلاۋشى داۋىس بەرگەن. بۇدان سوڭ اباي وبلىسى سەمەي قالاسىنىڭ اكىمىن سايلاۋ قورىتىندىلارى تۋرالى سەمەي قالاسىنىڭ اۋماقتىق سايلاۋ كوميسسياسىنىڭ شەشىمى شىقتى.

سايلاۋ تۋرالى جانە كونستيتۋتسيا تالاپتارىنا سايكەس, «1980 جىلى تۋعان, اباي وبلىسى كوكپەكتى اۋدانىنىڭ اكىمى قىزمەتىن اتقارعان كوكپەكتى اۋىلىندا تۇراتىن قوجانباەۆ ادىلەت نۇرساعات ۇلى اباي وبلىسى سەمەي قالاسىنىڭ اكىمى بولىپ تىركەلسىن», دەلىنگەن.

اباي وبلىسى