ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, بيىلعى جىلى جۇمىسسىز قالعان ازاماتتاردى قولداۋ ماقساتىندا مەملەكەتتىك الەۋمەتتىك ساقتاندىرۋ قورىنان تولەنەتىن جاردەماقى كولەمى ارتىپ وتىر. 2025 جىلعى 1 قازانعا دەيىن ماسق ەسەبىنەن 285,2 مىڭ ادام جۇمىسسىزدىق بويىنشا الەۋمەتتىك تولەم العان. ونىڭ ىشىندە 240,5 مىڭ ادامعا تولەم العاش رەت تاعايىندالعان. بارلىق تولەمدەردىڭ جيىنتىق مولشەرى 95 ميلليارد تەڭگەگە جەتكەن, دەپ حابارلايدى Egemen.kz,
ايتا كەتەيىك, قولدانىستاعى زاڭناماعا سايكەس, جۇمىستان بوساتىلعان ازاماتتار مىندەتتى الەۋمەتتىك ساقتاندىرۋ جۇيەسىنە قاتىسۋ ءوتىلى مەن سوڭعى 24 ايداعى تابىسىنا قاراي 1 ايدان 6 ايعا دەيىن الەۋمەتتىك تولەم الا الادى. بۇل تولەم جوعالتقان تابىستىڭ 45 پايىزىنان اسپايدى جانە تولىقتاي ماسق قاراجاتى ەسەبىنەن جۇزەگە اسىرىلادى.
جۇمىسسىز قالعان ازامات تولەم الۋ ءۇشىن الدىمەن eGov.kz پورتالىنا كىرىپ, اۆتوريزاتسيادان وتەدى. «جۇمىسقا ورنالاستىرۋ جانە جۇمىسپەن قامتۋ» بولىمىنەن «جۇمىس ىزدەۋشى ادامداردى تىركەۋ» قىزمەتىن تاڭداپ, ءوتىنىمدى تولتىرىپ, ەلەكتروندىق تسيفرلىق قولتاڭبا ارقىلى جىبەرۋ قاجەت.
ءوتىنىم جىبەرىلگەننەن كەيىن ءبىر كۇن ىشىندە مانساپ ورتالىعى ءتيىستى جۇمىس ورىندارىن ۇسىنادى. ەگەر لايىقتى جۇمىس تابىلماسا, ءۇش جۇمىس كۇنى ىشىندە ازاماتقا ونلاين فورماتتا جۇمىسسىز مارتەبەسى بەرىلەدى. قاجەت بولعان جاعدايدا ورتالىق قىزمەتكەرى قوسىمشا اقپارات الۋ ءۇشىن حابارلاسادى.
ازاماتتار بۇل قىزمەتتى ەلەكتروندىق ەڭبەك بيرجاسى – enbek.kz پلاتفورماسى ارقىلى دا راسىمدەي الادى.
جۇمىسسىز مارتەبەسى تىركەلگەن سوڭ, ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتتىق جۇيەسى اۆتوماتتى تۇردە ماسق تولەمىن تاعايىنداۋ پروتسەسىن باستايدى. ازاماتتىڭ ءموبيلدى نومىرىنە SMS-حابارلاما جىبەرىلىپ, تولەمگە كەلىسىم سۇرالادى. SMS ارقىلى راستاۋ جىبەرىلگەننەن كەيىن تولەم اۆتوماتتى تۇردە تاعايىندالادى.
مينيسترلىك وكىلدەرى اتاپ وتكەندەي, ماسق قاراجاتى ەسەبىنەن بەرىلەتىن بۇل الەۋمەتتىك تولەم جۇمىستان شىعۋ سەبەبىنە قاراماستان جۇزەگە اسىرىلادى جانە ازاماتقا جاڭا جۇمىس ىزدەۋ كەزەڭىندە قارجىلاي قولداۋ كورسەتۋگە باعىتتالعان.