24KZ تاۋلىك بويعى جاڭالىقتار تەلەارناسىنىڭ ديرەكتورى اۋىستى. بۇل تۋرالى Tengrinews.kz ءتىلشىسى حابارلادى.
«مەن باسقا جۇمىسقا اۋىسامىن. ماعان ۇسىنىس جاسالدى, مەن كەلىستىم», - دەدى تەلەارنانى اشىلعان ۋاقىتىنان بەرى باسقارىپ كەلگەن الەكساندر اكسيۋتيتس. بىراق ءوزىنىڭ جاڭا قىزمەت ورنى تۋرالى ايتقان جوق.
24KZ ارناسىنىڭ جاڭا باسشىسى ارمان سەيىتمامىت تاعايىندالدى. ول بۇعان دەيىن تەلەارنانىڭ شەف-رەداكتورى قىزمەتىن اتقاردى. تەلەكورەرمەندەر ونى ارمان بالتاباي ۇلى رەتىندە بىلەدى.
اكسيۋتيتستىڭ ايتۋىنشا, باسشى اۋىسقاننان كەيىن كۇنى-ءتۇنى اقپارات تاراتاتىن تەلەارنانىڭ ساياساتى وزگەرمەيدى.
ەسكە سالا كتەيىك, قازاقستان تاريحىنداعى كۇنى-ءتۇنى جاڭالىق تاراتاتىن تۇڭعىش تەلەارنا - 24.KZ 2012 جىلى اشىلعان ەدى. ارنا «حابار» اگەنتتىگى» اق قۇرىلىمىنا كىرەدى. تەلەارنا 2012 جىلدىڭ 1 قىركۇيەگىنە قاراعان ءتۇنى تەلەراديوكەشەن ماڭىنداعى الاڭدا العاش رەت رەسمي تۇردە تانىستىرىلدى.
مۇرات ايتقوجا.