رەسپۋبليكا كۇنى قارساڭىندا راديوەلەكترونيكا جانە بايلانىس اسكەري-ينجەنەرلىك ينستيتۋتى الماتى قالاسى اۋەزوۆ اۋدانىنىڭ وقۋدى اياقتاۋشى تۇلەكتەرى مەن دەمالىس ورتالىقتارىنىڭ تاربيەلەنۋشىلەرىنە ارناپ اشىق ەسىك كۇنىن وتكىزدى, دەپ جازادى Egemen.kz.
جاس قوناقتار ينستيتۋتتىڭ وقۋ-ماتەريالدىق بازاسىمەن, كۋرسانتتاردىڭ وقۋ جانە تۇرمىس جاعدايلارىمەن تانىسىپ, وقۋ ورنىنا ءتۇسۋ ەرەجەسى مەن اسكەري ءبىلىمنىڭ ارتىقشىلىقتارى جايىندا جان-جاقتى مالىمەت الدى. وقۋشىلار كافەدرالار مەن وقۋ اۋديتوريالارىن, ترەناجەر كەشەندەرىن ارالاپ, جوعارى تەحنولوگيالىق اسكەرلەردىڭ بولاشاق وفيتسەرلەرى قالاي دايارلاناتىنىن ءوز كوزدەرىمەن كوردى.
ولاردى اسىرەسە ۇشقىشسىز باسقارىلاتىن اپپاراتتارمەن جۇمىس ىستەۋ قاتتى قىزىقتىردى. بالالار ۇشۋلاردى قىزىعا باقىلاپ, زاماناۋي تەحنولوگيالاردىڭ اسكەري سالادا قالاي قولدانىلاتىنىن ءبىلدى.
ينستيتۋتتىڭ كۋرسانتتارى وقۋشىلارعا وزدەرىنىڭ وقۋ تاجىريبەلەرىن كورسەتىپ, تاڭداعان ماماندىقتارى, عىلىمي جانە سپورتتىق جەتىستىكتەرى, كازارماداعى ءومىرى تۋرالى ايتىپ بەردى. تىكەلەي اڭگىمە بارىسىندا وقۋشىلار اسكەري فورماداعى قاتاڭدىقتىڭ ارتىندا ەڭبەك, ءتارتىپ جانە وتانعا قىزمەت ەتۋگە دايىندىق جاتقانىن ءتۇسىندى.
ەكسكۋرسيا بارىسىندا اسكەري-سپورتتىق ەستافەتا ۇيىمداستىرىلىپ, ونىڭ قورىتىندىسى بويىنشا قاتىسۋشىلارعا العىس حاتتار مەن سىيلىقتار تابىس ەتىلدى. شارا جىلى جانە سيمۆولدىق اتموسفەرادا اياقتالىپ, قاتىسۋشىلار ناعىز سارباز بوتقاسىنان ءدام تاتتى.
– اسكەري ينستيتۋتتىڭ اتموسفەراسى ەرەكشە اسەر قالدىردى. مۇندا ماڭىزدى ءارى سۇرانىسقا يە ماماندىقتارعا ۇيرەتەدى. وسىندا وقۋ قىزىقتى ءارى ابىرويلى ەكەنىنە سەنىمدىمىن. ەكسكۋرسيادان كەيىن ءدال وسى وقۋ ورنىنا تۇسكىم كەلدى, – دەدى ع. مۇسىرەپوۆ اتىنداعى №86 مەكتەپ-گيمنازياسىنىڭ وقۋشىسى جالعاس ابدىكارىم.
وسىنداي كەزدەسۋلەر اسكەري جوعارى وقۋ ورنىندا يگى داستۇرگە اينالعان. تۇراقتى تۇردە وتەتىن اشىق ەسىك كۇندەرى مەن ۇگىت-ناسيحات شارالارى بولاشاق تالاپكەرلەرگە اسكەري وقۋ ورنىنىڭ ومىرىمەن تانىسىپ, سۇراقتارىنا جاۋاپ الىپ, ماماندىقتى سانالى تۇردە تاڭداۋعا مۇمكىندىك بەرەدى.