ەلباسى ن.نازارباەۆ تۇركيانىڭ بودرۋم قالاسىندا 2014 جىلعى 5 ماۋسىمدا وتكەن تۇركى كەڭەسىنىڭ ءىV سامميتىندە تۇركى الەمىنىڭ ورتاق اقپاراتتىق كەڭىستىگىن قالىپتاستىرۋ جانە ورتاق تەلەارنا قۇرۋ جونىندە باستاما كوتەرگەن بولاتىن. بۇل ۇسىنىس تاراپتاردىڭ قولداۋىنا يە بولىپ, قازىر كەڭ تالقىلاۋدىڭ تاقىرىبىنا اينالدى. وسىعان وراي حالىقارالىق تۇركى اكادەمياسى جۋرناليستەردىڭ كاسىبي مەرەكەسى – بايلانىس جانە اقپارات قىزمەتكەرلەرىنىڭ كۇنى قارساڭىندا بەيبىتشىلىك جانە كەلىسىم سارايىندا «تۇركى الەمى جانە اقپاراتتىق كەڭىستىك» اتتى دوڭگەلەك ۇستەل وتكىزدى.
القالى جيىنعا قازاقستانداعى جەتەكشى بۇقارالىق اقپارات قۇرالدارىنىڭ باسشىلارى, جوعارى وقۋ ورىندارىنىڭ وقىتۋشىلارى مەن جۋرناليستەر قاۋىمى قاتىسىپ, وي ءبولىسىپ, پايىمدى پىكىرلەرىن ورتاعا سالدى.
ايتا كەتۋ كەرەك, بيىل استانادا وتەتىن تۇركى كەڭەسىن قۇرۋشى ەلدەردىڭ سامميتىندە اتالعان ماسەلە قاراستىرىلادى دەپ كۇتىلۋدە. وسىعان وراي دوڭگەلەك ۇستەلدە ايتىلعان ۇسىنىس, پىكىرلەردى حالىقارالىق تۇركى اكادەمياسى جيناقتاپ, تۇركى كەڭەسىنىڭ نازارىنا ۇسىنباق.
ءتۇبى ءبىر تۋىس حالىقتاردىڭ ءمادەني-رۋحاني ينتەگراتسياسى ماسەلەلەرىنە ارنالعان باسقوسۋ بارىسىندا تۇركى الەمىنىڭ اقپارات كەڭىستىگىنە ەڭبەگى سىڭگەن بىرقاتار بۇقارالىق اقپارات قۇرالدارىنىڭ باسشىلارى ماراپاتتالدى. اتاپ ايتساق, تۇركى دۇنيەسىنىڭ ءبىلىم, عىلىم سالاسىنداعى جەتىستىكتەرىن ناسيحاتتاۋعا جانە ءتۇبى ءبىر تۋىس حالىقتار اراسىنداعى ىنتىماقتاستىقتى دامىتۋعا قوسقان زور ۇلەستەرى ءۇشىن «ۇزدىك ءباسپاسوز جاريالانىمى» اتالىمى بويىنشا «ەگەمەن قازاقستان» رەسپۋبليكالىق گازەتى» اق پرەزيدەنتى ساۋىتبەك ابدراحمانوۆ, «ۇزدىك تەلەراديو ماتەريالدارى» اتالىمى بويىنشا «قازاقستان» رترك» اق باسقارما ءتورايىمى نۇرجان مۇحامەدجانوۆا, «ءۇزدىك اقپارات اگەنتتىگى ماتەريالدارى» اتالىمى بويىنشا «قازكونتەنت» اق باسقارما توراعاسى ايدوس قىدىرما حالىقارالىق تۇركى اكادەمياسىنىڭ العىس حاتىمەن, سونداي-اق, تۇركى دۇنيەسىنىڭ ءبىلىم مەن عىلىم سالاسىنا جانە ءتۇبى ءبىر تۋىس حالىقتار اراسىنداعى مادەني-رۋحاني بايلانىستاردى نىعايتۋعا قوسقان ولشەۋسىز ۇلەسى ءۇشىن نامازالى وماشەۆ قۇرمەت گراموتاسىمەن ماراپاتتالدى. سونىمەن بىرگە, حالىقارالىق تۇركى اكادەمياسىنىڭ پرەزيدەنتى دارحان قىدىرالى ماراپاتتالعانداردىڭ بارلىعىنا اكادەمياعا مۇشەلىگىن بىلدىرەتىن توسبەلگىلەردى تابىستادى.
سونىمەن قاتار, حالىقارالىق ءتۇركى اكادەمياسى باق سالاسى بويىنشا ارنايى سىيلىق جاريالايتىنىن جەتكىزدى. جىل سايىن 8 قىركۇيەكتە – حالىقارالىق جۋرناليستەر ىنتىماقتاستىعى كۇنىنە تابىس ەتىلەتىن بۇل سىيلىق تۇركى حالىقتارىنىڭ ءبىلىم جانە عىلىم سالاسىنداعى جەتىستىكتەرىن ناسيحاتتاۋعا, سونداي-اق, تاريحي تامىرلاس ەلدەر اراسىنداعى ىنتىماقتاستىقتى ارتتىرۋعا ەرەكشە ۇلەس قوسىپ جۇرگەن باق وكىلدەرىنە بەرىلەدى. وعان قازاقستاننان بولەك تۇركىتىلدەس مەملەكەتتەردىڭ جۋرناليستەرى دە ۇمىتكەر رەتىندە قاتىسا الادى.
بەرىك سادىر,
«ەگەمەن قازاقستان».