ماڭعىستاۋ تۋريزم كوللەدجىنىڭ ستۋدەنتى سۇلتانبەك راحات ۇلى شۇباتتى جاڭا تاسىلمەن وڭدەپ, زاماناۋي نارىققا بەيىمدەدى. جاس ونەرتاپقىش بۇل جوبانى جەتەكشىسى ۇلپان ىلەسقىزىمەن بىرلەسىپ جۇزەگە اسىردى.
جاڭا سۋسىن 80 پا-يىز تۇيە سۇتىنەن دايىندالادى. قۇرامىنا ءتۇرلى جەمىس-جيدەك قوسىلعاندىقتان, ءونىم ءدامى وتە ەرەكشە.
– شۇبات – حالقىمىزدىڭ قاستەرلى تاعامىنىڭ ءبىرى. الايدا جاستار بۇل ءونىمدى ءاردايىم تۇتىنا بەرمەيدى. سول سەبەپتى ونى جاڭاشا ۇسىنۋدى ماقسات ەتتىك. ءارى ءداستۇر مەن زاماناۋي ءدامدى ۇيلەستىرگىمىز كەلدى. وسىلايشا, شۇباتقا كيۆي مەن قۇلپىناي قوسىپ, جاڭا ءدام جاسادىق. بىرنەشە مارتە تاجىريبە جاساپ, ءدام ۇيلەسىمدىلىگىنە ءمان بەردىك, – دەيدى سۇلتانبەك راحات ۇلى.
جوبا اۆتورىنىڭ ايتۋىنشا, جاڭا سۋسىننىڭ ءدامىن العاش بولىپ كوللەدج ۇجىمى مەن ستۋدەنتتەر تاتىپ كورگەن. كەيىن «Caspian» كورمەسىندە ماڭعىستاۋعا كەلگەن شەتەلدىك قوناقتارعا دا ۇسىنىلىپ, وڭ باعاسىن الدى. بۇل تاجىريبە سۇلتانبەككە ءونىمدى نارىققا جەكە برەند رەتىندە شىعارۋ يدەياسىن ۇسىنۋعا سەبەپ بولدى.
قازىر ستۋدەنت ءوز ءونىمىنىڭ اتاۋى مەن ديزاينىن جەتىلدىرىپ جاتىر, سونداي-اق بۇل يدەيانى پاتەنتتەۋدى قولعا الدى. ول تابيعي ءارى ۇلتتىق ءونىم رەتىندە سۋسىندى كەڭىنەن تانىستىرىپ, ەكولوگيالىق تازا, پايدالى ءارى زاماناۋي تاۋار رەتىندە نارىققا شىعارۋدى جوسپارلاپ وتىر. «تۇتىنۋشىلار شۇباتتىڭ ءدامىن ۇناتىپ, ونى كۇندەلىكتى ومىردە تۇتىنسا, بۇل ۇلكەن جەتىستىك بولماق», دەيدى ونەرتاپقىش ستۋدەنت.
ماڭعىستاۋ وبلىسى