قازاقستاننىڭ حالىق ءارتىسى ديماش قۇدايبەرگەن نيۋ-يوركتە وسىمەن ەكىنشى رەت جەكە كونتسەرتىن بەردى. الەم تانىعان الاش بالاسى بۇل جولى مايكل دجەكسون, ەلۆيس پرەسلي, بەيونسە, اندرەا بوچەللي جانە «بيتلز» ونەر كورسەتكەن Madison Square Garden ارەناسىندا 20 مىڭعا جۋىق كورەرمەندى اۋزىنا قاراتتى, جانكۇيەرلەرى قازاق اندەرىنىڭ قايىرماسىن قوسا شىرقادى.
نيۋ-يوركتەگى كونتسەرت 2022 جىلى الماتىدا باستالعان ۇلكەن تۋردىڭ ءبىر بولىگىنە اينالعانىمەن دە ەرەكشەلەندى. «بۇل مەنىڭ جەكە جۇلدىزدى ءساتىم عانا ەمەس, بۇكىل ەۋرازيالىق مادەنيەت ءۇشىن ماڭىزدى كەزەڭ. ءبىز پلانەتانىڭ ارعى جاعىنداعى مادەني ەلشىلەر رەتىندە ارەكەت ەتەمىز», دەپتى ديماش جەرگىلىكتى باسپاسوزگە بەرگەن سۇحباتىندا.
كونتسەرتتە قازاق اندەرىمەن قاتار, الەمگە تانىمال كومپوزيتسيالار ورىندالدى. Stranger انىندە قازاق قوبىزى مەن حاۋزەردىڭ ۆيولونچەل پارتياسى قۇلاققا ۇردى. بۇل شىعارما العاش رەت 2022 جىلدىڭ قىركۇيەگىندە الماتىدا وتكەن «Stranger» تۋرىنىڭ اشىلۋ كونتسەرتىندە شىرقالىپ, ديماشتىڭ تۇراقتى رەپەرتۋارىنا ەنگەن.
بۇدان كەيىن ءانشى كونتسەرتىن مەكسيكادا جالعاستىردى. لاتىن امەريكاسىنداعى تۇڭعىش كەشىندە – مەحيكو قالاسىنىڭ ايگىلى كونتسەرت زالى «Auditorio Nacional» ساحناسىندا بوس ورىن بولعان جوق.
كونتسەرت باستالماي جاتىپ زال دالىزدەرىندە مەكسيكالىق تىڭدارماندار ديماش ەسىمىن ۇران ەتىپ, كەرەمەت كوڭىل كۇيدە كۇتىپ الدى. ءانشى ساحناعا «جالىندى» بەينەدە شىعىپ, شوۋ «Golden» جانە «Smoke» اندەرىمەن باستالدى. تولاسسىز قوشەمەتتەن كەيىن ول قازاق, اعىلشىن جانە يسپان تىلدەرىندە جىلى سالەم جولدادى:
«قايىرلى كەش, مەكسيكا! سىزدەردىڭ الدارىڭىزدا ونەر كورسەتۋ – مەن ءۇشىن ارمان بولاتىن. سىزدەردىڭ شەكسىز سۇيىسپەنشىلىكتەرىڭىز بەن ەنەرگيالارىڭىز ءۇشىن العىسىم شەكسىز. سىزدەر مەنى ءوز ۇيىمدە جۇرگەندەي سەزىندىردىڭىزدەر. بۇگىنگى كەشتە ءاربىرىڭىز سيقىرعا تولى جۇمباق سەزىمگە بولەنەتىن بولاسىزدار», دەدى.
كورەرمەندەر ءاربىر ءان سايىن اسەرگە بولەندى دەسە بولعانداي. ديماش بۇل كەشتە دە ەرەكشە شابىتقا ەندى. ول كورەرمەنگە ءجيى قول بۇلعاپ, العىس ءبىلدىرىپ وتىردى. كونتسەرت بارىسىندا زالدى ءانشى داۋسىنىڭ قۇدىرەتى كەرنەپ, جۇرت ديماشتىڭ ءار قيمىلىن قايتالاپ كەتكەنى بايقالادى. «Give Me Your Love», «Be With Me», «تاۋ ىشىندە», «Weekend», «Living For The Game» اندەرىن ورىنداعاندا كورەرمەندەر بىرگە بيلەپ, «ۇمىتىلماس كۇن», «Fire», «When I’ve Got You» سياقتى كۇردەلى شىعارمالاردى انشىمەن بىرگە شىرقادى.
ال قازاقتىڭ ۇلتتىق اسپاپتارى – دومبىرا, سىبىزعى جانە قوبىز ءۇنى «اداي», ء«دۇرداراز», «Stranger» جانە جاڭا تۋىندىسى «سامعاۋ» كومپوزيتسيالارىندا ەرەكشە ۇيلەسە كەتتى.
كونتسەرت سوڭىندا ديماش كورەرمەندەرىنە جۇرەكجاردى العىسىن ءبىلدىردى.