مەملەكەتتىك حاتشى گۇلشارا ابدىقالىقوۆانىڭ توراعالىق ەتۋىمەن پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ كەزەكتى وتىرىسى ءوتتى.
باسقوسۋدا ەلباسىنىڭ «نۇرلى جول – بولاشاققا باستار جول» اتتى جولداۋىن ىسكە اسىرۋ اياسىندا ەلىمىز ەكونوميكاسىنىڭ يندۋستريالىق-يننوۆاتسيالىق دامۋىنا ايەلدەردىڭ قاتىسۋىن ارتتىرۋ ماسەلەلەرى قارالدى.
– ەلباسى نۇرسۇلتان نازارباەۆ «نۇر وتان» پارتياسىنىڭ XVI سەزىندە الدىمىزعا بىرقاتار مىندەتتەر جۇكتەگەن بولاتىن. اتاپ ايتقاندا, بەس ينستيتۋتتىق رەفورمانى العا تارتا وتىرىپ, ەكونوميكالىق باعدارلامالاردى ساپالى جۇزەگە اسىرۋدى جانە مەملەكەتتىك قىزمەتتەردى ۇسىنۋدى قامتاماسىز ەتەتىن قازىرگى زامانعى, كاسىبي جانە اۆتونوميالى مەملەكەتتىك اپپاراتتى قالىپتاستىرۋدى, ەكونوميكالىق ءوسىم ءۇشىن نەگىز بولاتىن زاڭنىڭ ۇستەمدىگىن قامتاماسىز ەتۋدى, سونىمەن قاتار, يندۋستريالاندىرۋ جانە ارتاراپتاندىرۋعا نەگىزدەلگەن ەكونوميكالىق وسىمگە قول جەتكىزۋدى, بولاشاعى ءبىرتۇتاس ۇلت پەن ترانسپارەنتتى جانە ەسەپ بەرۋشى مەملەكەت قۇرۋ تۋرالى ايتقان بولاتىن.
وسىنىڭ اياسىندا بۇگىنگى جيىندا ءبىرشاما ماسەلەلەر تارقاتىلادى, دەدى مەملەكەتتىك حاتشى. سونىمەن قاتار, گ.ابدىقالىقوۆا ايەلدەردىڭ ەل ەكونوميكاسىنداعى سانىن ارتتىرۋدىڭ ماڭىزىنا توقتالىپ, حالىقارالىق ۆاليۋتا قورى ساراپشىلارىنىڭ پىكىرىنشە, «ەڭبەك نارىعىنا ايەلدەر بارىنشا كوپ شىققان سايىن, الەمدىك ءىجو مەيلىنشە وسەتىن بولادى. بىرقاتار ەلدەردە نازىك جاندىلار ەكونوميكانىڭ ءوسۋىن 30%-عا جەدەلدەتۋگە قابىلەتتى», ەكەندىگىن اتاپ كورسەتتى.
ۇلتتىق ەكونوميكا, ينۆەستيتسيالار جانە دامۋ مينيسترلىكتەرىنىڭ باسشىلارى وزدەرىنىڭ سويلەگەن سوزدەرىندە يندۋستريالاندىرۋ باعدارلاماسىنىڭ ءبىرىنشى بەسجىلدىعىندا 770 جوبا ىسكە قوسىلعانىن اتاپ ءوتتى. بۇل جوبالارعا 63 مىڭ ادام تارتىلسا, ونىڭ 18 مىڭى, ياعني 29%-ى ايەلدەر.
وتىرىستا سونداي-اق, مەملەكەتتىك ورگانداردىڭ ستراتەگيالىق جوسپارلارىنىڭ گەندەرلىك اسپەكتىلەرى, استانا, الماتى قالالارى مەن وبلىستار اۋماقتارىن دامىتۋ باعدارلامالارى, سولتۇستىك قازاقستان وبلىسى اكىمدىگىنىڭ ءوڭىر حالقىنىڭ رەپرودۋكتيۆتى دەنساۋلىعىن ساقتاۋ بويىنشا قولدانىپ جاتقان شارالارى قارالدى. ۇلتتىق كوميسسيا ءتورايىمى گۇلشارا ابدىقالىقوۆا حالىقتىڭ قالىپتى ءوسۋىن جانە ءومىر ساپاسىن ارتتىرۋ ءۇشىن رەپرودۋكتيۆتى دەنساۋلىقتى ساقتاۋ مەن نىعايتۋدىڭ ماڭىزدىلىعىن اتاپ ءوتتى.
ەلميرا ماتىباەۆا,
«ەگەمەن قازاقستان».