20 قازاننان باستاپ قازاقستاندا جاڭا بيزنەس-يدەيالاردى ىسكە اسىرۋعا ارنالعان گرانتتارعا ءوتىنىم قابىلداۋ باستالادى. گرانتتىڭ كولەمى 1,5 ميلليون تەڭگەدەن اسادى, دەپ حابارلايدى Egemen.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
مينيسترلىكتىڭ مالىمەتىنشە, قازاقستاننىڭ توعىز وڭىرىندە 270 گرانت بەرىلەدى: اباي جانە ۇلىتاۋ وبلىستارىندا, اقمولا, شىعىس قازاقستان, قىزىلوردا, پاۆلودار, سولتۇستىك قازاقستان, تۇركىستان وبلىستارىندا جانە شىمكەنت قالاسىندا.
«گرانتتىڭ مولشەرى 400 اەك (2025 جىلى – 1 572 800 تەڭگە). ءار قاتىسۋشى گرانتتى تەك ءبىر رەت الا الادى. گرانتتار قايتارىمسىز نەگىزدە بەرىلەدى جانە ونىڭ ماقساتى – جاڭا بيزنەستى باستاۋ مەن دامىتۋ», دەلىنگەن مينيسترلىك حابارلاماسىندا.
ءوتىنىم بەرۋ ءۇشىن:
business.enbek.kz پورتالىنا تىركەلۋ قاجەت;
گرانت الۋ شارتتارىنا سايكەستىگىن تەكسەرۋدەن ءوتۋ كەرەك;
بيزنەس-جوسپار ۇلگىسىن جۇكتەپ الىپ, تولتىرىپ, پورتالعا جۇكتەۋ قاجەت;
ءوتىنىم فورماسىن تولتىرىپ, ەتسق كىلتىمەن قول قويۋ قاجەت.
ينتەرنەتكە نەمەسە كومپيۋتەرگە قولجەتىمدىلىگى جوق ادامدار ءوتىنىمدى جۇمىسقا ورنالاستىرۋ ورتالىقتارىنىڭ وزىنە-ءوزى قىزمەت كورسەتۋ ايماقتارىندا نەمەسە حالىققا قىزمەت كورسەتۋ ورتالىقتارىندا (حقكو) بەرە الادى.
گرانت الۋعا ۇمىتكەر بولا الادى:
جۇمىسسىز رەتىندە تىركەلگەن تۇلعالار;
جەكە كاسىپكەرلەر (تىركەلگەن مەرزىمى 3 جىلدان اسپاعان).
سونىمەن قاتار ۇمىتكەر كەلەسى الەۋمەتتىك ساناتتاردىڭ بىرىنە جاتۋى ءتيىس:
مۇگەدەكتىگى بار ادامدار;
«قانداس» مارتەبەسى بار تۇلعالار;
وڭىرارالىق قونىس اۋدارۋشىلار;
از قامتىلعان وتباسىلاردىڭ مۇشەلەرى;
كوپ بالالى وتباسىلاردىڭ مۇشەلەرى (جۇبايى/زايىبى);
مۇگەدەكتىگى بار بالانى تاربيەلەپ وتىرعان اتا-انا (جۇبايى/زايىبى);
اسىراۋشىسىنان ايرىلۋىنا بايلانىستى جاردەماقى الۋشىلار.
سونداي-اق ۇمىتكەردىڭ «باستاۋ بيزنەس» جوباسى بويىنشا كاسىپكەرلىك نەگىزدەرى كۋرسىن بىتىرگەنى تۋرالى 3 جىلدان اسپاعان مەرزىمدەگى سەرتيفيكاتى بولۋى قاجەت.
گرانت قاراجاتى مىنا ماقساتتارعا جۇمسالۋى مۇمكىن:عيمارات نەمەسە بولمە جالداۋ اقىسى;
قاجەتتى قۇرال-جابدىقتار مەن سايمانداردى ساتىپ الۋ;
تەحنولوگيالىق جابدىقتار الۋ;
مال, قۇس جانە جانۋارلار ساتىپ الۋ;
كوشەتتەر, بۇتالار, تۇقىمدار, راسسادا الۋ.
گرانت مىنا ماقساتتارعا بەرىلمەيدى:تۇتىنۋشىلىق ماقساتتارعا;
نەسيەنى وتەۋگە;
تۇرعىن ءۇي ساتىپ الۋ نەمەسە سالۋعا;
جەر ۋچاسكەلەرىن الۋعا;
اكتسيزدەلەتىن ونىمدەر وندىرۋگە.
گرانتتار ەڭبەك موبيلدىگى ورتالىقتارى ارقىلى, اۋداندىق نەمەسە قالالىق كوميسسيانىڭ شەشىمى نەگىزىندە بەرىلەدى.
«ۇمىتكەرلەر ءوز بيزنەس-جوباسىن كوميسسيا وتىرىستارىندا تانىستىرادى. كوميسسيا مۇشەلەرى بيزنەس-جوسپاردى كەلەسى كريتەريلەر بويىنشا باعالايدى: بيزنەس-يدەيانىڭ باسەكەگە قابىلەتتىلىگى, وتكىزۋ نارىعىن تالداۋ دەڭگەيى, قارجىلىق تۇراقتىلىق, كاسىپكەرلىك قابىلەتتەر جانە جاڭا جۇمىس ورىندارىن قۇرۋ مۇمكىندىگى. وسىلايشا گرانت بەرۋ تۋرالى شەشىم كوميسسيالىق نەگىزدە جانە ايقىن باعالاۋ ولشەمدەرى بويىنشا قابىلدانادى», دەلىنگەن مينيسترلىك تۇسىندىرمەسىندە.
كوميسسيا شەشىمى ۇمىتكەردىڭ پورتالداعى جەكە كابينەتىنە جىبەرىلەدى. ەگەر شەشىم وڭ بولسا, ۇمىتكەر بانك دەرەكتەرىن ۇسىنادى, شارتقا قول قويادى جانە ءارى قاراي قاراجاتتىڭ جۇمسالۋى تۋرالى توقسان سايىن ەسەپ تاپسىرادى.
بارلىق راسىمدەر ەلەكتروندى فورماتتا, ەڭبەك موبيلدىگى ورتالىقتارىنا بارۋسىز جۇزەگە اسىرىلادى.