«جەزقازعانتسۆەتمەت» وندىرىستىك بىرلەستىگىنە قاراستى «قازاقمىس كورپوراتسياسى» جاۋاپكەرشىلىگى شەكتەۋلى سەرىكتەستىگىندە 10 جىلدان استام جەراستى كەنىشىنىڭ ءوندىرۋ ۋچاسكەسىنىڭ شپۋر بۇرعىلاۋشىسى ب. ەسىمدى ازامات دەنساۋلىعىنا بايلانىستى جۇمىستان شىعارىلعان, دەپ جازادى Egemen.kz.
تالاپ قويۋشى دارىگەرلىك-كونسۋلتاتسيالىق كوميسسيانىڭ قورىتىندىسى بويىنشا قىزمەتكەرگە «پنەۆموكونيوز جانە سوزىلمالى برونحيت» دياگنوزى قويىلىپ, ول جەراستى بۇرعىلاۋشىسى قىزمەتىن اتقارۋعا جارامسىز دەپ تانىلعان.
وسىعان بايلانىستى ب. جۇمىس بەرۋشىنىڭ باستاماسىمەن, دەنساۋلىق جاعدايىنا وراي اتقارىپ جۇرگەن لاۋازىمىنا سايكەس كەلمەيتىندىگى سەبەپتى جۇمىستان بوساتىلعان. دەسە دە ول جۇمىستان بوساتۋ تۋرالى بۇيرىققا شاعىمدانىپ, ءوزىن قايتادان قىزمەتىنە قالپىنا كەلتىرۋدى, جەڭىل جۇمىسقا ۋاقىتشا اۋىستىرۋ مىندەتىن جۇمىس بەرۋشىگە جۇكتەۋدى, ءماجبۇرلى بوس جۇرگەن ۋاقىتى ءۇشىن جالاقى مەن مورالدىق زيان وتەمىن ءوندىرىپ بەرۋدى سۇراعان.ء بىرىنشى جانە اپەللياتسيالىق ساتىداعى سوتتار تالاپ قويۋشىنىڭ تالابىن قاناعاتتاندىرماعان.
ازاماتتىق ىستەر جونىندەگى كاسساتسيالىق سوت ناقتى نەگىزدەر بويىنشا اتالعان سوت اكتىلەرىنىڭ كۇشىن جويىپ, قىزمەتكەردى قايتا جۇمىسقا ورنالاستىرۋ شەشىمىن شىعارعان.
«قازاقستان رەسپۋبليكاسىنىڭ ەڭبەك كودەكسىنىڭ 43-بابىنا سايكەس, وندىرىستىك جاراقات, كاسىبي اۋرۋ نەمەسە ەڭبەك مىندەتتەرىن ورىنداۋ كەزىندە الىنعان وزگە دە دەنساۋلىققا زاقىم كەلتىرۋ جاعدايىندا, نە وندىرىستىك قىزمەتكە قاتىسى جوق وزگە دە اۋرۋ ءتۇرى انىقتالعان جاعدايدا, مەديتسينالىق قورىتىندى نەگىزىندە جۇمىس بەرۋشى قىزمەتكەردى ەڭبەك قابىلەتى قالپىنا كەلگەنگە دەيىن نەمەسە مۇگەدەكتىك (نە كاسىبي ەڭبەك قابىلەتىنەن ايىرىلۋ) بەلگىلەنگەنگە دەيىن دەنساۋلىعىنا قارسى كورسەتىلمەيتىن باسقا جۇمىسقا ۋاقىتشا اۋىستىرۋعا مىندەتتى. ەڭبەك شارتى قىزمەتكەردىڭ جازباشا تۇردە ۋاقىتشا اۋىسۋدان باس تارتقان جاعدايىندا عانا توقتاتىلۋى مۇمكىن. الايدا, ءىس ماتەريالدارىن زەرتتەۋ ناتيجەسىندە, جۇمىس بەرۋشى تاراپىنان تالاپ قويۋشىعا باسقا لاۋازىم ۇسىنۋ جونىندە ەشقانداي ۇسىنىس جۇمىستان بوساتۋعا دەيىن جاسالماعانى انىقتالدى», دەلىنگەن كاسساسيالىق سوت حابارلاماسىندا.
وسىلايشا, جۇمىستان بوساتۋ تۋرالى بۇيرىق زاڭسىز دەپ تانىلىپ, قىزمەتكەر بۇرىنعى جۇمىسىنا قايتا ورنالاستىرىلعان. ال جۇمىس بەرۋشىگە ونىڭ دەنساۋلىعىنا قارسى كورسەتىلمەيتىن جەڭىل جۇمىسقا اۋىستىرۋ مىندەتى جۇكتەلگەن.ەگەر مۇنداي مۇمكىندىك بولماعان جاعدايدا, مۇگەدەكتىك نەمەسە كاسىبي ەڭبەك قابىلەتىنەن ايىرىلۋ بەلگىلەنگەنگە دەيىن قىزمەتكەردى جۇمىستان بوساتپاي, ەڭ تومەنگى جالاقى مولشەرىن ساقتاي وتىرىپ بوساتىلعان كۇيىندە قالدىرۋ مىندەتتەلىپ وتىر.
سونىمەن قاتار, ءماجبۇرلى بوس جۇرگەن ۋاقىتى ءۇشىن تالاپ قويۋشىنىڭ پايداسىنا التى ايلىق جالاقى مولشەرىندە – 3 000 000 تەڭگە جانە مورالدىق زيان ءۇشىن 200 000 تەڭگە وتەماقى وندىرىلگەن.