«قازپوشتا» وسى اپتادا مەرزىمدى باسىلىمدارعا جازىلۋ باستالعانىن حابارلادى. وقىرماندار 2026 جىلى 3 مىڭ گازەت پەن جۋرنالعا جازىلا الادى. ينتەرنەت-رەسۋرستاردىڭ دامۋىنا قاراماستان, ءباسپاسوز باسىلىمدارى ءالى دە قوعامدىق پىكىر مەن ۇلتتىق قۇندىلىقتاردى قالىپتاستىراتىن سەنىمدى اقپارات كوزى بولىپ قالا بەرەدى. جازىلىم ناۋقانى اياسىندا «قازپوشتا» اكتسيونەرلىك قوعامى «بالالارعا سىيلىق جاسا: گازەت پەن جۋرنالدارعا جازىل» اتتى الەۋمەتتىك جوبانى جۇزەگە اسىرماق. بۇل جوبا تۇرمىستىڭ قيىندىعىنا تاپ بولعان بالالاردى تانىمدىق باسىلىمدارمەن قامتاماسىز ەتۋگە باعىتتالعان.
پوشتا سەرۆيسى جانە مەملەكەتتىك قىزمەت كورسەتۋ جونىندەگى باسقارۋشى ديرەكتور باعلان ورازباي باسپا باسىلىمدارىنىڭ ماڭىزدىلىعىن جانە ولاردى جەتكىزۋدەگى «قازپوشتانىڭ» ءرولىن اتاپ ءوتتى. كۇن سايىن سۇرىپتاۋ ۋچاسكەلەرى ارقىلى مىڭداعان دانا باسىلىم قاتتالىپ, ەڭ شالعاي اۋىلدارعا جەتكىزىلەدى.
جازىلىم مەرزىمى رەسپۋبليكالىق باسىلىمدارعا 2025 جىلعى 25 جەلتوقسانعا دەيىن, شەتەلدىك باسىلىمدارعا 2025 جىلعى 10 جەلتوقسانعا دەيىن جالعاسادى. جازىلۋدى www.qazpost.kz سايتىندا نەمەسە Qazpost ءموبيلدى قوسىمشاسىندا وڭاي ءارى جىلدام راسىمدەۋگە بولادى. 2026 جىلعا ارنالعان گازەت-جۋرنالدار كاتالوگى https://qazpost.kz/ru/help/tariffs?tab=pochtovye-uslugi سىلتەمەسىندە ورنالاستىرىلعان.
بارلىق قاجەتتى اقپارات qazpost.kz سايتىندا, «قازپوشتا» اق-نىڭ الەۋمەتتىك جەلىلەرىندەگى رەسمي اككاۋنتتارىندا ورنالاستىرىلعان. تولىعىراق «قازپوشتا» اق بايلانىس ورتالىعىنىڭ 1499 تەلەفونى ارقىلى بىلۋگە بولادى.