وبلىس ورتالىعىنداعى قازاق تىلىندە ءبىلىم بەرەتىن «جاس دارىن» اتالاتىن مەكتەپ وقۋ-بىلىمگە تالپىنىسى ەرەكشە وقۋشىلار ءۇشىن 1999 جىلى اشىلدى. بۇل كۇندەرى مەكتەپتە 340 وقۋشى ءبىلىم الۋدا. ال, مەكتەپ قالاداعى بۇرىنعىدان كەلە جاتقان تاريحي عيماراتتاردىڭ بىرىندە ورنالاسقان. مەكتەپتە 14 وقۋ كابينەتى بار, حيميا, فيزيكا, بيولوگيا كابينەتتەرى قازىرگى زامان تالابىنا ساي جابدىقتالعان. جالپى, وقىتۋ ۇدەرىسى جاراتىلىستانۋ-ماتەماتيكالىق جانە قوعامدىق-گۋمانيتارلىق باعىتتا جۇرگىزىلەدى. قوعامدىق-گۋمانيتارلىق باعىتتاعى سىنىپتاردا اعىلشىن ءتىلى مەن قازاق ءتىلى تەرەڭدەتىلىپ وقىتىلادى. كوپتىلدىلىكتى دامىتۋ باعىتى 5-سىنىپتان باستالادى. ەلجاندىلىق, وتانشىلدىق, ەلدى ءسۇيۋ, پاتريوتتىق تاربيە ساباقتارى جۇرگىزىلەدى. ەلباسى جولداۋىندا ءبىلىم بەرۋ ساپاسىن ارتتىرۋدى دۇنيەجۇزىلىك ستاندارت دەڭگەيىنە جەتكىزۋ باستى ماقسات ەكەنى ايتىلدى. قازىر ءبىزدىڭ ەلىمىزدەگى كوپتەگەن مەكتەپتەر حالىقارالىق بايقاۋلارعا قاتىسا الامىز. وسى ارقىلى وقۋشىلاردىڭ جەتىستىكتەرى مەن بىلىمدەرى كورىنەتىنى ءسوزسىز. مەكتەپتىڭ ءبىلىم بەرۋ, تاربيەلىك كەڭىستىگىن عىلىمي جوبالار, سايىستار, ينتەللەكتۋالدىق مارافون, كوركەم شىعارماشىلىق باعىتىنداعى جوبالار قۇرايدى. ۇزدىك وقۋشىلارى حالىقارالىق, رەسپۋبليكالىق بايقاۋلارعا قاتىسۋدا. عىلىمي جوبالار جازىپ, مەكتەپ قابىرعاسىندا ءجۇرىپ, ىزدەنىسپەن, شىعارماشىلىقپەن جۇمىس جاسايدى. وقۋشىلارىمىز موحامەد ءال ءامىر, ەركەگۇل اسايىن, تۇرسىن ماحمۇد, دانيال حابيبوللا, ارۋجان تۇرعانوۆا, داريا شەگەن, كۇلاش قوڭىروۆا, ءاليا اقباەۆا جانە باسقا ۇل-قىزدارىمىز مەكتەپتىڭ ماقتانىشتارى. ءبىلىمدى, كوپ ءتىل بىلەتىن بولاشاقتىڭ ماماندارى ەرجەتىپ كەلەدى دەگەن ءسوز.
– 2009 جىلى مەكتەپ عيماراتىنان بولەك سپورت زالى سالىندى. وقۋشىلار دەنەشىنىقتىرۋ ساباعىنا بارۋ ءۇشىن ەكى ارادا ءجۇردى. سودان بەرى وبلىس اكىمدىگىنە وقۋ كورپۋسى مەن سپورت زالدىڭ اراسىن قوساتىن وتپەلى ارالىق گالەرەيانىڭ سالىنۋىن سۇراپ بىرنەشە رەت ءوتىنىش جازدىق, – دەيدى مەكتەپ ديرەكتورى ساۋلە حاسانوۆا.
فاريدا بىقاي,
«ەگەمەن قازاقستان».
پاۆلودار.