ەلىمىزدە ەڭبەك ينسپەكتورلارى جۇرگىزگەن تەكسەرۋلەر ناتيجەسىندە جالاقى بەرەشەگى مەن زاڭبۇزۋشىلىقتاردىڭ مىڭداعان دەرەگى انىقتالدى. قابىلدانعان شارالاردىڭ ارقاسىندا ون مىڭداعان ازاماتتىڭ قۇقىقتارى قورعالىپ, ەڭبەككەرلەرگە ميللياردتاعان تەڭگە قايتارىلدى, دەپ حابارلايدى Egemen.kz.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, 2025 جىلعى 1 قازانداعى جاعداي بويىنشا مەملەكەتتىك ەڭبەك ينسپەكتورلارى رەسپۋبليكا بويىنشا 391 كاسىپورىندا 9,3 مىڭنان استام جۇمىسكەرگە 2,2 ملرد تەڭگەدەن اسا جالاقى قارىزى بار ەكەنىن انىقتادى. سونىمەن قاتار ءتۇرلى ۇيىمداردا جۇرگىزىلگەن تەكسەرۋلەر بارىسىندا ەڭبەك قۇقىعىنىڭ 5,5 مىڭنان استام بۇزىلۋ فاكتىسى تىركەلگەن.
«جالاقى بويىنشا بەرەشەگى جانە ەڭبەك قۇقىعىنىڭ بۇزىلۋى انىقتالعان كاسىپورىنداردىڭ باسشىلارىنا ورىنداۋعا مىندەتتى 2 932 ۇيعارىم بەرىلدى جانە 370,9 ملن تەڭگەدەن استام سوماعا ايىپپۇل سالىندى. قابىلدانعان شارالاردىڭ, ونىڭ ىشىندە جالاقى بويىنشا بەرەشەكتى وتەۋدىڭ قاتاڭ كەستەلەرى مەن مەرزىمدەرىن بەلگىلەۋدىڭ ناتيجەسىندە 8,9 مىڭ جۇمىسكەردىڭ قۇقىقتارى قورعالدى. ولارعا 1,8 ملرد تەڭگە تولەندى», دەلىنگەن حابارلامادا.
ۆەدومستۆو ەڭبەك زاڭناماسىنىڭ ساقتالۋىنا مەملەكەتتىك باقىلاۋدى ەرەكشە نازاردا ۇستاپ وتىر. 2025 جىلعى 1 قازانعا دەيىن ەڭبەك ينسپەكتورلارى 4 572 تەكسەرۋ جۇرگىزىپ, 5 523 زاڭبۇزۋشىلىقتى انىقتاعان. ونىڭ ىشىندە 4 590-ى ەڭبەك سالاسىنا, 909-ى ەڭبەك قاۋىپسىزدىگى مەن ەڭبەكتى قورعاۋعا, ال 24-ءى حالىقتى جۇمىسپەن قامتۋعا قاتىستى.
اتقارىلعان جۇمىستاردىڭ ناتيجەسىندە 34 مىڭ جۇمىسكەردىڭ ەڭبەك قۇقىعى قورعالعان.