الماتى وبلىسىنىڭ مەكتەپتەرىندە زاماناۋي ءبىلىم بەرۋ ادىستەرى ءساتتى جۇزەگە اسىرىلۋدا. سونىڭ جارقىن ۇلگىسىنىڭ ءبىرى – پەداگوگ داۋلەشيار باقىتالىنىڭ ەڭبەگى. ول ارنايى جابدىقتارى جوق مەكتەپتە ءوز كۇشىمەن روبوتوتەحنيكا كابينەتىن اشىپ, وقۋشىلاردى عىلىمعا باۋلىدى, دەپ جازادى Egemen.kz.
ۇستازدىڭ باستاماسىمەن «ونەرتاپقىشتار الەمى» كلۋبى قۇرىلدى. كلۋبتىڭ العاشقى ءىرى جوبالارىنىڭ ءبىرى – ەرەكشە قاجەتتىلىكتەرى بار وقۋشىعا قول پروتەزىن جاساۋ بولدى. كەيىننەن بىرنەشە قول جانە اياق پروتەزدەرىنىڭ ۇلگىلەرى دايىندالدى.
ءبىلىم بەرۋ سالاسىنداعى بەلسەندى ەڭبەگى ءۇشىن داۋلەشيار باقىتالى پرەزيدەنت قاسىم-جومارت توقاەۆتىڭ شاقىرۋىمەن ماراپاتقا يە بولدى.
وقۋشىلاردىڭ شىعارماشىلىق ىزدەنىستەرى ناتيجەسىندە كوپتەگەن بىرەگەي جوبالار دۇنيەگە كەلدى. اتاپ ايتقاندا: «اۆتوماتتى قوقىس جيناعىش», «ەدەن جۋعا ارنالعان روبوت», «روبو-كۇنباعىس», «كورمەيتىندەرگە ارنالعان كوزىلدىرىك», «بوتەلكە قايتا وڭدەۋ قۇرىلعىسى», «جەتكىزۋ درونى», «روبو-دارىگەر», «قازاقى ستيلدەگى اۆتوكولىك ماكەتى» جانە باسقا دا جوبالار جاسالدى.
سونىمەن قاتار, پەداگوگ مەكتەپتەن تىس ۇيىرمەلەرگە ارنالعان ارنايى باعدارلاما ازىرلەپ, مۇعالىمدەر مەن وقۋشىلارعا ارنالعان فيزيكا ءپانى بويىنشا ءموبيلدى قوسىمشا ويلاپ تاپتى. بالالارمەن بىرلەسىپ جاسالعان جوبالار الەۋمەتتىك جەلىلەردە كەڭىنەن تارالىپ, تەك وڭىردە عانا ەمەس, بۇكىل ەل كولەمىندە وڭ پىكىرگە يە بولدى.
مۇنداي باستامالار وقۋشىلاردىڭ الەۋەتىن اشۋعا, ولاردىڭ عىلىمي ىزدەنىستەرگە قۇشتارلىعىن ارتتىرۋعا جانە ءوز يدەيالارىن جۇزەگە اسىرۋعا مۇمكىندىك بەرەدى. وقۋشىلاردىڭ اتا-انالارى دا پەداگوگتىڭ ەڭبەگىن جوعارى باعالاپ, ونىڭ ءبىلىمدى قىزىقتى ءارى تۇسىنىكتى تۇردە جەتكىزە بىلەتىنىن اتاپ ءوتتى.
الماتى وبلىسى.