مەملەكەت باسشىسى Digital Bridge 2025 حالىقارالىق فورۋمىندا سويلەگەن سوزىندە جاساندى ينتەللەكتىنىڭ وراسان زور الەۋەتىن ادىلەتتى, قاۋىپسىز جانە قۋاتتى قازاقستاندى قۇرۋ ءۇشىن قولدانۋعا بولاتىنىن ايتتى, حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«بىراق جايباراقات وتىرۋعا بولمايدى, الدىمىزدا اۋقىمدى جۇمىس بار. جاساندى ينتەللەكتىنىڭ وراسان زور الەۋەتىن ادىلەتتى, قاۋىپسىز جانە قۋاتتى قازاقستاندى قۇرۋ ءۇشىن قولدانۋعا بولادى.
الايدا ءبىز شىندىققا تۋرا قاراۋىمىز كەرەك: جاساندى ينتەللەكت جانە تسيفرلاندىرۋ ماسەلەنىڭ ءبارىن ءبىر ساتتە شەشىپ تاستامايدى. جاپپاي تسيفرلاندىرۋ جانە جاساندى ينتەللەكتىنى ءتيىمدى پايدالانۋ ءۇشىن وتە ماڭىزدى ءۇش مىندەتتى قاتار ورىنداۋ كەرەك.
اتاپ ايتقاندا, وسى سالاعا رەسۋرس تارتۋ, جاڭا ءبىلىمدى مەڭگەرۋ جانە ادەپ (ەتيكا) نورمالارىن ساقتاۋ. ءبىر سوزبەن, ءادىل ءارى ءتيىمدى شەشىم قابىلداي وتىرىپ, جىلدام جانە اشىق ارەكەت ەتۋ كەرەك», دەدى پرەزيدەنت.
سونىمەن قاتار, مەملەكەت باسشىسى تسيفرلاندىرۋ جانە نەيروجەلىنى كەڭىنەن قولدانۋ قازاقستاننىڭ مەملەكەتتىك باسقارۋ جۇيەسىنىڭ جاڭا فيلوسوفياسىنا اينالۋعا ءتيىس ەكەنىن ايتتى.
ء«اربىر جاڭا مەملەكەتتىك قىزمەت كورسەتۋ ەڭ اۋەلى تسيفرلىق فورماتتا جاساقتالۋعا ءتيىس. بۇرىن ۇسىنىلعان مالىمەتتەردى قايتا سۇراتۋدىڭ كەرەگى جوق. بۇدان بولەك, مەملەكەت پەن ازاماتتاردىڭ قارىم-قاتىناسىنا بايلانىستى بارلىق نورماتيۆتىك اكتىلەر بەكىتىلگەنگە دەيىن مىندەتتى تۇردە تسيفرلىق ساراپتامادان وتكىزىلۋى قاجەت. سونىڭ ناتيجەسىندە ازاماتتار مەن كاسىپكەرلەر بيۋروكراتيادان قۇتىلىپ, ولاردىڭ مەملەكەتتىك ينستيتۋتتارعا دەگەن سەنىمى نىعايا تۇسەدى.
پرەزيدەنت سويلەگەن سوزىندە ايتىلعان شارالاردىڭ جاڭاشىلدىق ەكەنىن اتاپ ءوتتى.
«جالپى, ايتىلعان بارلىق شارالار ءبىزدىڭ ايماقتا جاڭاشىلدىق سانالادى. بۇل ەلىمىزدىڭ تسيفرلىق ساياساتىنىڭ ۇزاق مەرزىمدى ءارى جۇيەلى باعىتىن كورسەتەدى. اقىلدى تەحنولوگيالار ۇلكەن دەرەكتەردى وڭدەۋگە, الەۋمەتتىك سالادان باستاپ نەگىزگى ەكونوميكالىق كورسەتكىشتەرگە دەيىنگى كوپتەگەن سالانى تالداۋعا قابىلەتتى. ياعني ستراتەگيالىق جوسپارلاۋدىڭ تيىمدىلىگىن ايتارلىقتاي جەتىلدىرەدى.
سايكەسىنشە, ازاماتتاردىڭ ءال-اۋقاتىن جاقسارتۋعا جانە ەكونوميكالىق ءوسىمدى ارتتىرۋعا ىقپال ەتەدى. سونىمەن قاتار حالىق نەسيە بەرۋدەن باستاپ مەملەكەتتىك قىزمەت كورسەتۋگە دەيىنگى الگوريتم جۇيەلەرىنىڭ قالاي جۇمىس ىستەيتىنىن ءبىلۋى ءارى ءتۇسىنۋى كەرەك.
جاساندى ينتەللەكت تەحنولوگياسىن ەكونوميكانىڭ بارلىق سالاسىنا جاپپاي ەنگىزۋ ءۇشىن ءتيىستى زاڭنامانى دا سوعان سايكەس بەيىمدەۋ قاجەت. بۇل – ەلىمىزدىڭ تسيفرلىق جانە زياتكەرلىك دەربەستىگىن قورعايتىن ناقتى تەتىكتەر بولۋ كەرەك دەگەن ءسوز.
تۇپتەپ كەلگەندە, تسيفرلاندىرۋ جانە نەيروجەلىنى كەڭىنەن قولدانۋ قازاقستاننىڭ مەملەكەتتىك باسقارۋ جۇيەسىنىڭ جاڭا فيلوسوفياسىنا اينالۋعا ءتيىس», دەدى مەملەكەت باسشىسى.