بۇگىن استانادا قازاقستاننىڭ حالىق ءارتىسى ديماش قۇدايبەرگەن پروديۋسەرلىك دەبيۋتى «Voice Beyond Horizon» حالىقارالىق جوباسىن تانىستىردى. ەلىمىزدىڭ تاريحي مەكەندەرى مەن كوز تارتارلىق تابيعات قۇشاعىندا تۇسىرىلگەن جوبا قىتاي حالىق رەسپۋبليكاسىنىڭ Hunan Broadcasting System-مەن بىرلەسە قولعا الىنعان, دەپ جازادى Egemen.kz.
تانىستىرىلىمعا قر پرەزيدەنتىنىڭ كەڭەسشىسى اسەل جاناسوۆا, ءدۇلدۇل دارىن ديماش قۇدايبەرگەن, تۋريزم جانە سپورت ۆيتسە-ءمينيسترى باۋىرجان راپيكوۆ, «Kazakh Tourism» ۇك» اق باسقارما توراعاسىنىڭ مىندەتىن اتقارۋشى دانيەل سەرجان ۇلى, «Qazaqstan» رترك» اق باسقارما توراعاسى ەرنۇر بۋراحان, Hunan TV ارناسىنىڭ «كوكجيەك داۋىسى» جوباسىنىڭ اتقارۋشى پروديۋسەرى ۆان چين جانە جوبانىڭ پروديۋسەرى ءارى باس رەجيسسەرى لۋو سينسين قاتىستى.
اۋقىمدى جوبانىڭ ءتۇسىرىلىمى ەلىمىزدىڭ 6 ءوڭىرى تۇركىستان, ماڭعىستاۋ, الماتى جانە اقمولا وبلىستارى, سونداي-اق الماتى مەن استانا قالالارىن قامتىعان. «Voice Beyond Horizon-نىڭ» ءتۇسىرىلىم بارىسىندا 150 مامان تەر توككەن. ءان دوداسىندا قازاقستان, قىتاي, قىرعىزستان, يتاليا, مالايزيا جانە سەربيا ونەرپازدارى باق سىنايدى. ورىنداۋشىلار شىعارماشىلىق ساپاردى جۇردەك پويىزبەن جاساپ, ەلىمىزدىڭ تۋريستىك ورىندارىمەن كەڭىنەن تانىسقان. ەندى «Voice Beyond Horizon» جوباسىنىڭ نەگىزگى لوكاتسيالارى بويىنشا تۋريستىك مارشرۋت قۇرۋ جوسپارلانىپ وتىر.
ۇلى جىبەك جولىنىڭ بويىنداعى تۇركىستاننان باستالعان جوبا, كاسپي تەڭىزى جاعاسى مەن تابيعاتتىڭ تىلسىم سىرىن ساقتاعان بوزجىرادا جالعاسىن تاۋىپ, الماتى ءوڭىرىنىڭ ءىنجۋ-مارجاندارىن - قايىڭدى كولىن, دۇنيەجۇزىلىك UNWTO تۋريستىك ۇيىمى الەمدەگى ۇزدىك تۋريستىك اۋىلداردىڭ ءبىرى دەپ تانىعان ساتى اۋىلىن, قاپشاعاي سۋ قويماسىن, اقمولا وبلىسىنداعى كوبەيتۇز كولى مەن ششۋچينسك-بۋراباي كۋرورتتىق ايماعىن پاش ەتتى. فينالدىق كەزەڭ ەلوردادا ۇيىمداستىرىلعان.
«وسى جوبا اياسىندا كوپتەگەن قۇندى دۇنيەلەر مادەنيەت جانە ءتۋريزمدى دامىتۋ تۇرعىسىنان اتقارىلدى دەپ ويلايمىن. بايقاۋدا قاتىسۋشىلاردىڭ ۆوكالدىق مۇمكىندىكتەرىنە عانا دەن قويىلماي, ەلىمىزدىڭ كورنەكتى جەرلەرىن كورسەتتىك. تۋريزم دامىسا, ەكونوميكامىزعا ۇلكەن سەپتىگىن تيگىزەدى دەگەن نيەت», ديماش كۇدايبەرگەن.
قازاقستان مەن قىتاي اراسىنداعى ىنتىماقتاستىق تاريحىنىڭ جاڭا پاراقشاسىن اشاتىن جوبا ءتۇسىرىلىمى بۇگىن مارەسىنە جەتكەن.
«كەيىنگى 22 كۇن ىشىندە قازاقستاننىڭ ءارتۇرلى مەملەكەتتىك قۇرىلىمدارىنىڭ جان-جاقتى قولداۋىنىڭ ارقاسىندا ءتۇسىرىلىم توبىمىز مىڭداعان شاقىرىمدى ارتتا قالدىرىپ, بىرەگەي قالالارعا باردى: كونە تۇركىستاننىڭ تاريحي ءۇنىن ەستىدىك, كاسپي جاعالاۋىنداعى اقتاۋدىڭ كوركەم كورىنىستەرىنەن شابىت الدىق, «الما قالاسى» اتانعان الماتىنىڭ جىلۋلىعىن سەزىندىك جانە فۋتۋريستىك استانانىڭ قارقىندى دامۋىن كوردىك. ءبىز باعا جەتپەس كادرلاردى تاسپالاپ, قوناقجاي جەردىڭ تورىنەن جۇرەككە جەتەر مۋزىكالىق ءىز قالدىردىق», دەدى Hunan TV ارناسىنىڭ «Voice Beyond Horizon» باعدارلاماسىنىڭ پروديۋسەرى جانە باس رەجيسسەرى لۋو سينسين.
ال تابيعات اياسىنداعى ءان سايىسىن ارنايى شاقىرىلعان حالىقارالىق قازىلار مەن كورەرمەندەر باعالاعان. سونداي-اق ەكى دۇركىن «گرەممي» سىيلىعىنىڭ يەگەرى ۋولتەر افاناسەۆ جوبا اياسىندا تۇركىستاندا بوي كورسەتكەن.
مادەنيەت پەن ءتۋريزمدى تۇلەتۋدى كوزدەيتىن جوبا اۋديتورياسى 210 ميلليوننان استام كورەرمەنگە جەتەتىن Hunan TV تەلەارناسى مەن Mango TV تسيفرلىق پلاتفورماسى مەن «Qazaqstan» ۇلتتىق ارناسىندا قاتار كورسەتىلەدى. ۇيىمداستىرۋشىلاردىڭ ايتۋىنشا, «Voice Beyond Horizon» حالىقارالىق جوباسى جاڭا جىلدان كەيىن كورەرمەن نازارىنا ۇسىنىلادى.