كەزىندە دجيۋ-دجيتسۋدان وتكەن تالاي ءدۇبىرلى دودادا جۇلدە الىپ, بۇل كۇندەرى كوپتەگەن اسا ءىرى حالىقارالىق جارىستاردا قازىلىق ەتىپ جۇرگەن دامير سادىروۆ جايىندا ءبىز نە بىلەمىز؟
مەكتەپ قابىرعاسىنان دامير دزيۋدومەن شۇعىلدانىپ, ءبىراز بەلەستەردى باعىندىردى. 20 جاسقا تولعان شاعىندا دجيۋ-دجيتسۋعا مىقتاپ دەن قويدى. جەكپە-جەكتىڭ ءدال وسى تۇرىندە جاس جىگىتتىڭ جۇلدىزى جارقىراي جاندى. بىلىكتى باپكەر رۋستام بالاباەۆتىڭ قول استىندا جاتتىقان ول 2017-2024 جىلدار ارالىعىندا وراسان زور تابىستارعا قول جەتكىزدى. اتاپ ايتساق, AJP مەن ACBJJ ليگالارىندا سايىسقا ءتۇسىپ, الەمنىڭ بىرنەشە دۇركىن چەمپيونى اتاندى. UWW, JJIF, ACBJJ ۇيىمداستىرعان دۇنيەجۇزىلىك دودالاردا جۇلدەگەرلەر ساناتىنان كورىندى. اقش-تا وتكەن IBJJF مەن NAGA تۋرنيرلەرىندە توپ جاردى. سان مارتە قازاقستان چەمپيوناتىندا قارسىلاس شاق كەلتىرمەدى. وسىنداي زور تابىستارىنىڭ ارقاسىندا سادىروۆ قارا بەلبەۋ يەگەرى اتاندى.
كاسىبي سپورتشى رەتىندە ءوز كارەراسىن اياقتاعاننان كەيىن ايگىلى سپورتشى بىردەن تورەشىلىك كاسىپتى تاڭدادى. ءتۇرلى ساناقتان مۇدىرمەي وتكەن ول JJIF, JJAU, AIGA, IBJJF, AJP جانە ADCC سەرتيفيكاتتارىن يەلەندى. قازىرگى كەزدە دامير اسا ءىرى حالىقارالىق دودالاردان ءجيى كورۋگە بولادى. قازاق مامانى موڭعوليا, تۇركيا, ءباا, برازيليا جانە ءبىزدىڭ ەلدە وتكەن الەم چەمپيوناتتارىندا قازىلىق ەتتى. ءوزىنىڭ تەرەڭ ءبىلىمى, كاسىبي بىلىكتىلىگى جانە قارا قىلدى قاق جارعان ادىلدىگىمەن كوزگە تۇسكەن سادىروۆ كۇنى كەشە عانا اقش-تىڭ لاس-ۆەگاستا قالاسىندا اياقتالعان IBJJF World Masters تۋرنيرىنە قازىلىق ەتۋ مۇمكىندىگىنە يە بولدى. ءسويتىپ, ونىڭ ەسىمى دجيۋ-دجيتسۋ الەمىندەگى بەدەلى ەڭ زور, مارتەبەسى ەڭ بيىك جارىستا تورەشىلىك قىزمەت اتقارعان قازاقستاننىڭ تۇڭعىش وكىلى رەتىندە سپورتتىق شەجىرەگە جازىلدى.
باپكەر رەتىندە دە دامير سادىروۆ ءوزىنىڭ مىقتىلىعىن مويىنداتتى. ول دۇنيەجۇزىلىك دەڭگەيدەگى دودالاردا دارالانعان بىرنەشە جەكپە-جەك شەبەرلەرىن دايىندادى. سولاردىڭ اراسىنان رينات گورباچيوۆ پەن ماريان ورداباەۆا سىندى ساقا سپورتشىلاردى بولە-جارا اتاپ وتۋگە بولادى. ولاردىڭ ەكەۋى دە الەم چەمپيوناتتارىنىڭ جۇلدەگەرلەرى.
كەيىپكەرىمىزدىڭ تاعى ءبىر قاسيەتى – سادىروۆ دجيۋ-دجيتسۋ فيلوسوفياسىن جەتىك مەڭگەرگەن. قانداسىمىزدىڭ ءوزى ويلاپ-تاپقان ءادىس-تاسىلدەرى دە بار. العاشىندا بىلىكتى باپكەر ونى ءتول شاكىرتتەرىنە ۇيرەتتى. ولار ونى ءتۇرلى جارىستاردا كەڭىنەن قولدانىپ, جاقسى ناتيجە شىعاردى. قازىرگى كەزدە ءداميردىڭ بۇل ادىستەرىن باسقا دا مەملەكەتتەردىڭ شەبەرلەرى ءتيىمدى پايدالانىپ, ءوز كادەلەرىنە جاراتۋدا.