جىل سايىن ەلىمىزدە كەمىندە 1000 مەكتەپ جەتى باعىت بويىنشا جاڭعىرتۋدان وتەدى. بۇل باستاما اۋىل مەن قالا اراسىنداعى ءبىلىم ساپاسىنداعى الشاقتىقتى ازايتۋعا جانە بالالاردىڭ ساپالى ءبىلىم الۋىنا قولايلى جاعداي جاساۋعا باعىتتالعان. جاڭعىرتۋ جۇمىستارى جەتى نەگىزگى باعىت بويىنشا جۇزەگە اسىرىلادى, دەپ جازادى Egemen.kz.
پرەزيدەنت 2024 جىلدىڭ 2 قىركۇيەگىندەگى ءجولداۋىندا ۇش جىل ىشىندە 1300 مەكتەپتەردى قايتا جاڭارتۋدى تاپسىرعان بولاتىن.
جاڭعىرتۋ اياسىندا كۇردەلى جانە اعىمداعى جوندەۋ جۇمىستارى, پاندىك كابينەتتەرمەن جابدىقتاۋ, مەكتەپ جيھازدارىن جاڭارتۋ, كىتاپحانالار مەن اسحانالاردى, قاۋىپسىزدىك جاعدايلارى قاراستىرىلعان.
«وسى ورايدا استانا بويىنشا 2025-2027 جىلدارعا 22 مەكتەپتى جاڭارتۋ جوسپارى بەكىتىلگەن. 2025 جىلى 6 مەكتەپ كۇردەلى جوندەۋدەن ءوتتى. ال 2026 جىلى 8 مەكتەپ, 2027 جىلى 8 مەكتەپ جاڭارتۋدان وتەدى», دەدى استانا قالالىق ءبىلىم باسقارماسىنىڭ باسشىسى قاسىمحان سەنعازىەۆ.
ءبىلىم باسقارماسىنىڭ مالىمەتىنشە, بۇگىنگى كۇنى استانا قالاسى بويىنشا جالپى ءبىلىم بەرەتىن 196 مەكتەپ بار, ونىڭ 115-ءى – مەملەكەتتىك, (وندا 236 986 وقۋشى ءبىلىم الىپ ءجۇر), 45 014 بالانى قامتىعان 74 جەكە مەكتەپ جانە 6 مىڭنان استام وقۋشىنى وقىتاتىن 7 رەسپۋبليكالىق مەكتەپ, ەلوردا بويىنشا بارلىعى 288 279 وقۋشىنى قامتيدى.
قاسىمحان سەنعازى ۇلىنىڭ ايتۋىنشا, بەكىتىلگەن جوسپارعا سايكەس 2025 جىلى 6 مەكتەپ №1, №14, №21, №35, №61, №69 قايتا جاڭارتىلعان.
بۇل مەكتەپتەر 2000 جىلدارعا دەيىن سالىنعان جانە سوڭعى 5 جىلدا كۇردەلى جوندەۋدەن وتپەگەن, سونداي-اق, ولاردىڭ ماتەريالدىق-تەحنيكالىق بازاسى توزعانى انىقتالعان.