استانادا بىرەگەي ۋلترامارافون باستالدى. استانا اۋماقتىق قورعانىس بريگاداسىنىڭ بولىمشە كومانديرى 3-سىنىپتى سەرجانت راۋان ءابىلحانوۆ نەبارى بەس كۇن ىشىندە 600 شاقىرىم جۇگىرىپ ءوتۋدى ماقسات ەتىپ وتىر, دەپ حابارلايدى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
«كوكتال» ساياباعىنان باستالاتىن جۇگىرۋ قورعانىس مينيسترلىگى عيماراتىنىڭ جانىندا اياقتالادى. مارافون استانا – كوكشەتاۋ – استانا باعىتى بويىنشا وتەدى. كۇن سايىنعى قاشىقتىق — 120 شاقىرىم. ءار 40 شاقىرىم سايىن دەمالىس قاراستىرىلعان.
«وعان دايىندىق ءۇشىن ەكى اي بەردىك. راۋان كۇن سايىن 40 شاقىرىمنان ارتىق جۇگىردى», دەدى ەلوردا اۋماقتىق قورعانىس بريگاداسىنىڭ كومانديرى پولكوۆنيك ومار ورىنباەۆ.
ءابىلحانوۆ بۇل رەكوردىن رەسپۋبليكا كۇنىنە ارناماق. سونىمەن قاتار, ول الداعى ۋاقىتتا قاراعاندى تاس جولى ارقىلى بالقاشقا دەيىنگى 1000 شاقىرىمدى 10 كۇندە ەڭسەرۋدى جوسپارلاپ وتىر.
World Book of Records (الەمدىك رەكوردتار كىتابى) ۇيىمىنىڭ ديۆيزيون گەنەرالى قۋانىش قۇدايبەرگەنوۆتىڭ ايتۋىنشا, بۇل جۇگىرىستى بىرەگەي دەپ اتاۋعا بولادى.
ء«ابىلحانوۆ — شەتەلدەرگە دە تانىمال ەڭ دايىن ۋلترامارافونشىلاردىڭ ءبىرى», دەيدى ول.
مارافونشىنىڭ ءار قادامىن تانىمال Strava قوسىمشاسى تىركەيتىن بولادى. ال ناتيجەسى قازاقستان رەكوردتار كىتابىنا ەنەدى.
سەرجانت ءابىلحانوۆ قارۋلى كۇشتەر قاتارىندا 20 جىلدان استام ۋاقىت قىزمەت ەتىپ كەلەدى. سپورتپەن 15 جىلدان استام ۋاقىت اينالىسۋ ۇستىندە. ول 2022 جىلى الماتى وبلىسىندا 48 ساعات ىشىندە 350 شاقىرىم جۇگىرىپ, رەكورد ورناتقان بولاتىن.
42 جاستاعى اسكەري قىزمەتشى تەك رەكورد يەسى عانا ەمەس, سونىمەن قاتار ناعىز ۇلگى تۇتار وتباسى. سپورتشى جۇبايىمەن ەكەۋى سەگىز قىز, ءبىر ۇل تاربيەلەپ وتىر.