اقمولا وبلىسىندا بۇگىنگە دەيىن 5 ميلليون توننادان استام استىق جينالدى. بارلىق ەگىستىك القابىنىڭ 70 پايىزعا جۋىعى باستىرىلىپ, اقىق ءدان قۇت قامباسىنا قۇيىلدى, دەپ حابارلايدى Egemen.kz.
وبلىستىق اۋىل شارۋاشىلىعى باسقارماسىنىڭ مالىمەتىنە قاراعاندا, گەكتار بەرەكەسى 15,6 تسەنتنەردەن اينالۋدا. بيدايدىڭ 70 پايىزدان استامى ءۇشىنشى سىنىپقا سايكەس كەلەدى.
جوعارى قارقىنعا مەملەكەتتىك قولداۋ شارالارى مەن اگروسەكتورعا زاماناۋي تەحنولوگيالاردى ەنگىزۋ ىقپال ەتتى. 2025 جىلى مينەرالدى تىڭايتقىشتاردى ەنگىزۋ كولەمى ءۇش ەسەگە ارتىپ, 336 مىڭ توننانى قۇرادى. مايلى داقىلداردىڭ ەگىس كولەمى العاش رەت 495 مىڭ گەكتاردان اسىپ وتىر, ال ەكى جىل بۇرىن بۇل كورسەتكىش 200 مىڭ گەكتاردان تومەن بولاتىن.
تەحنيكا پاركىن جاڭارتۋعا دا ەرەكشە كوڭىل ءبولىندى. جىل باسىنان بەرى اۋىل شارۋاشىلىعى تاۋارىن وندىرۋشىلەر 1400-دەن استام اۋىل شارۋاشىلىعى تەحنيكاسىن ساتىپ الدى, بۇل 2024 جىلعى دەڭگەيدەن ءبىر جارىم ەسە كوپ. ناۋقانعا 7 مىڭنان استام كومباين جۇمىلدىرىلعان, ولاردىڭ 5 مىڭعا جۋىعى – زاماناۋي ءارى جوعارى ءونىمدى ماشينالار. بۇل جيناۋ قارقىنىن ارتتىرۋعا جانە ءونىم شىعىنىن ازايتۋعا مۇمكىندىك بەردى.
ناۋقاندى سەنىمدى وتكىزۋگە مەملەكەتتىك قولداۋ دا ءوز اسەرىن تيگىزۋدە. ديقاندارعا 94 مىڭ توننادان استام جەڭىلدەتىلگەن ديزەل وتىنى بەلگىلەنگەن باعامەن ءبولىندى. جەتكىزىلىم قاتاڭ كەستە بويىنشا جۇرگىزىلۋدە, جانار-جاعارمايمەن قامتاماسىز ەتۋدە قيىندىقتار تىركەلگەن جوق. استىقتى 4,3 ميلليون توننا سىيىمدىلىعى بار 66 ليتسەنزيالانعان ەلەۆاتور, سونداي-اق اۋىل شارۋاشىلىعى تاۋارىن وندىرۋشىلەردىڭ 2,9 ميلليون تونناعا شاقتالعان شامامەن 1,5 مىڭ قويماسى قابىلداپ جاتىر. جالپى ساقتاۋدىڭ قۋاتتىلىعى 7 ميلليون توننادان اسادى. ءداندى كەپتىرۋگە تاۋلىگىنە 230 مىڭ توننادان استام ءونىم وڭدەي الاتىن 264 كەپتىرگىش قوندىرعى تارتىلعان.
اقمولالىق ديقاندار ەگىن وراعىن جاقسى ناتيجەمەن اياقتاماق.
اقمولا وبلىسى.