قر پرەمەر-ءمينيسترى ولجاس بەكتەنوۆ ماجارستان مەملەكەتتىك جينالىسىنىڭ توراعاسى لاسلو كيوۆەرمەن كەزدەستى. كەزدەسۋدە مەملەكەت باسشىسى قاسىم-جومارت توقاەۆتىڭ 2024 جىلى ماجارستانعا جاساعان مەملەكەتتىك ساپارى بارىسىندا قول جەتكىزىلگەن ۋاعدالاستىقتاردى جۇزەگە اسىرۋ ماسەلەلەرى تالقىلاندى, دەپ حابارلايدى Egemen.kz.
ساۋدا-ەكونوميكالىق جانە ينۆەستيتسيالىق باعىتتارداعى ەكىجاقتى ىنتىماقتاستىققا, سونىڭ ىشىندە بىرلەسكەن كاسىپورىندار اشۋعا, جاڭا ءوندىرىس ورىندارىن قۇرۋعا, سونداي-اق كولىك-ترانزيتتىك, مادەني-گۋمانيتارلىق جانە تسيفرلىق سالالارداعى ءوزارا ءىس-قيمىلعا نازار اۋدارىلدى.
ارنايى تالقىلانعان باعىتتاردىڭ ءبىرى – تسيفرلاندىرۋ جانە جاساندى ينتەللەكتىنى دامىتۋ سالاسىنداعى ۇزاق مەرزىمدى ارىپتەستىك. بۇل باستامالار قازاقستانداعى تسيفرلىق ترانسفورماتسيانى جۇزەگە اسىرۋ جونىندەگى ۇكىمەتتىڭ ماقساتتارىنا سايكەس كەلەدى.
«ماجارستان – قازاقستاننىڭ ەۋروپالىق وداقتاعى ماڭىزدى سەرىكتەسى. وتكەن جىلى تاۋار اينالىمى 6%-عا ءوسىپ, شامامەن $200 ملن-دى قۇرادى. بيىلعى العاشقى 7 ايدا كورسەتكىش 27%-عا ءوسىپ, $150 ملن-نان استى. قازاقستان ماجارستانعا 95 تاۋار پوزيتسياسى بويىنشا ەكسپورتتى كەڭەيتۋگە دايىن, بۇل ساۋدانىڭ ءوسۋى ءۇشىن ەلەۋلى پەرسپەكتيۆالار اشادى. كولىك-لوگيستيكا سالاسى دا ىنتىماقتاستىقتىڭ ماڭىزدى باعىتى بولىپ قالا بەرەدى. ترانسكاسپي حالىقارالىق كولىك مارشرۋتى ترانسەۋروپالىق كولىك جەلىسىنە قوسىلىپ, قازاقستاندىق جۇكتەردىڭ ەۋروپاعا جەتكىزىلۋىن قامتاماسىز ەتەدى. ىنتىماقتاستىقتى ودان ءارى نىعايتۋ ءۇشىن ماجارستاننىڭ L.A.C. Holding كومپانياسىمەن بىرلەسىپ, 2026 جىلى بۋداپەشتتە ينتەرمودالدى تەرمينال سالۋ جوسپارلانىپ وتىر», دەپ حابارلادى ۇكىمەتتىڭ ءباسپاسوز قىزمەتى
سونىمەن قاتار ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ جۇمىسى قارالدى. كەزدەسۋگە قاتىسۋشىلار ەكىجاقتى ءتيىمدى ەكونوميكالىق بايلانىستاردى ءارى قاراي دامىتۋعا دايىن ەكەندەرىن ءبىلدىردى.