2026 جىلعى 1 قاڭتاردا سالىق كودەكسىنىڭ جاڭا نورمالارى كۇشىنە ەنەدى. وسىعان وراي اتىراۋدا سەمينار ءوتتى. مەملەكەتتىك كىرىستەر كوميتەتى ءادىسناما دەپارتامەنتىنىڭ ديرەكتورى وراز ابدراحمانوۆتىڭ ايتۋىنشا, بيزنەس وكىلدەرىنىڭ قۇقىقتارى مەن مىندەتتەرىن انىقتايتىن تەڭگەرىمدى ءارى ءادىل سالىق جۇيەسىن قۇرۋعا باسىمدىق بەرىلەدى.
جاڭا سالىق كودەكسىنە سايكەس, دەكلاراتسيا نەگىزىندە جەڭىلدەتىلگەن ارنايى سالىق رەجىمى ەنگىزىلەدى. بۇل تالاپ تابىسى 600 مىڭ ايلىق ەسەپتىك كورسەتكىشكە (شامامەن 2,4 ملرد تەڭگە) دەيىنگى شاعىن جانە ورتا بيزنەس سۋبەكتىلەرىنە ارنالىپ, اكىمشىلىك جۇكتەمەنى تومەندەتۋگە باعىتتالىپ وتىر. ياعني ەسەپ تاپسىرۋ جەڭىلدەپ, اتالعان رەجىمگە جەكە كاسىپكەر رەتىندە مىندەتتى تىركەۋسىز اۋىسۋعا مۇمكىندىك بەرىلەدى. ال قوسىلعان قۇن سالىعى بويىنشا مىندەتتى تىركەۋ شەگى 10 مىڭ اەك-كە (شامامەن 40 ملن تەڭگە) دەيىن ازايتىلدى. ءسويتىپ, تولەۋشىلەر شەڭبەرى كەڭەيەدى. سونداي-اق رەفورما ەسەپتىلىك كولەمىن 30%, ال سالىقتاردى 20%-عا دەيىن ازايتۋدى كوزدەيدى.
«كاسىپكەرلەردەن بەرەشەكتى ءوندىرىپ الۋدىڭ نەعۇرلىم يكەمدى ءارى جۇمساق ءتارتىبى قاراستىرىلىپ وتىر. ەگەر قارىز مولشەرى از بولسا, كومپانيالاردىڭ شوتتارى اۆتوماتتى تۇردە بۇعاتتالمايدى. بۇل بيزنەسكە وپەراتسيالاردى توقتاتپاي, قىزمەتىن جالعاستىرۋعا مۇمكىندىك بەرەدى. قاتاڭ شارالاردىڭ ورنىنا الدىن الا ەسكەرتۋلەر مەن حابارلامالار جىبەرىلەدى. كەمشىلىكتەر تەك جۇيەلى تۇردە بايقالعان جاعدايدا عانا كەزەڭ-كەزەڭىمەن ءوندىرىپ الۋ تەتىگى ەنگىزىلەدى. مۇنداي قادام شاعىن جانە ورتا بيزنەسكە قىسىمدى تومەندەتىپ, كاسىپورىندارعا ورنىقتى جۇمىستى ىستەۋگە جول اشادى», دەيدى و.ابدراحمانوۆ
الايدا كاسىپكەرلەر قاۋىمداستىعىن الاڭداتاتىن جايتتار بار. ەڭ باستى ماسەلەنىڭ ءبىرى – ارنايى سالىق رەجىمىندە جۇمىس ىستەيتىن كاسىپكەرلەر ءۇشىن سالىقتىق شەگەرىمدەردى قولدانۋعا قويىلعان شەكتەۋلەر. ء«ۇي جانىنداعى دۇكەندەر» جەلىسىنىڭ وكىلى ءلاززات دوسماعامبەتوۆانىڭ ايتۋىنا قاراعاندا, بۇل جاڭا نورمالار شاعىن بيزنەستىڭ دامۋىنا ايتارلىقتاي اسەر ەتۋى مۇمكىن.
«كورپوراتيۆتىك تابىس سالىعى مەن شەگەرىم – ماڭىزدى قۇرالدار. ءبىز, جەكە كاسىپكەرلەر, تۇرعىندارعا, جشس-لەرگە ءونىم جەتكىزەمىز. ەگەر جاڭا كودەكسكە سايكەس ءىرى بيزنەس بىزدەن الىنعان تاۋارلاردى شەگەرىمگە قوسا الماسا, ولار بىزبەن جۇمىس ىستەۋدەن باس تارتادى. مۇنداي جاعدايدا ونىمدەردى تەك جەكە تۇلعالارعا عانا ساتا الامىز. ال بۇل ءبىزدىڭ تابىسىمىزدى ازايتادى», دەدى ل.دوسماعامبەتوۆا.
اتىراۋ وبلىستىق كاسىپكەرلەر پالاتاسىنىڭ ديرەكتورى نۇرلان سۇيىنباەۆتىڭ پىكىرىنشە, كاسىپكەرلەردىڭ الاڭداۋشىلىعى نەگىزسىز ەمەس. سول سەبەپتى, بيزنەستىڭ وڭىردەگى ەرەكشەلىكتەرىن ەسكەرۋ قاجەت.
«اتىراۋ وبلىسىنىڭ كاسىپكەرلەرى ارقاشان زاڭ اياسىندا جۇمىس ىستەۋگە ۇمتىلدى. زاڭنامالىق نورمالار شاعىن جانە ورتا بيزنەستىڭ دامۋىنا كەدەرگى بولماۋعا ءتيىس. سالىقتان جالتارۋعا قارسى كۇرەس قاجەت. الايدا ادال كاسىپكەرلەردىڭ ءوسۋ مۇمكىندىگى شەكتەلمەۋى كەرەك. وسى ورايدا جاڭا ەرەجەلەردە وڭىرلىك ەرەكشەلىكتەر, سونىڭ ىشىندە ءىرى جشس-مەن تىعىز جۇمىس ىستەۋ ماسەلەسى ەسكەرىلۋگە ءتيىس», دەيدى ول.
اتىراۋ وبلىسى