بۇۇ باس اسسامبلەياسىنىڭ 80-ءشى سەسسياسى اياسىندا پرەزيدەنت قاسىم-جومارت توقاەۆ بەلگيا كورولدىگىنىڭ پرەمەر-ءمينيسترى بارت دە ۆەۆەرمەن كەزدەسۋ وتكىزدى. بۇل تۋرالى اقوردانىڭ ءباسپاسوز قىزمەتى حابارلادى.
مەملەكەت باسشىسى قازاقستان ەۋروپا وداعىنداعى ماڭىزدى سەرىكتەستەرىنىڭ ءبىرى سانالاتىن بەلگيامەن ۇزاق مەرزىمدى ىنتىماقتاستىقتى دامىتۋعا باسا ءمان بەرەتىنىن ايتتى.
قاسىم-جومارت توقاەۆ بەلگيا قازاقستاننىڭ ەڭ ءىرى ون ينۆەستورىنىڭ قاتارىنا كىرەتىنىنە نازار اۋداردى. بىلتىر ەكىجاقتى تاۋار اينالىمى جارتى ميلليارد دوللارعا جۋىقتادى.
— اڭگىمەلەسۋ بارىسىندا ەكونوميكالىق ىنتىماقتاستىقتى ودان ءارى ارتتىرۋعا زور الەۋەت بار ەكەنى اتاپ ءوتىلدى. اسىرەسە, اسا ماڭىزدى مينەرالداردى يگەرۋ, مۇناي حيمياسى, اۋىل شارۋاشىلىعى, ونەركاسىپ, كولىك-لوگيستيكا, جاساندى ينتەللەكت, قارجى, تۋريزم جانە ءبىلىم بەرۋ سالالارىنداعى سەرىكتەستىككە مۇمكىندىك مول, — دەلىنگەن حابارلامادا.
بارت دە ۆەۆەر ەكىجاقتى كۇن ءتارتىبىن تالقىلاۋعا ۋاقىت تاپقانى ءۇشىن قازاقستان پرەزيدەنتىنە العىس ايتىپ, كورول ءفيليپپتىڭ ىزگى تىلەگىن جەتكىزدى.