20 قىركۇيەكتە الەم بويىنشا وتكەن «World CleanUp Day» ەكولوگيالىق اكتسياسى اياسىندا قازاقستاندا كەڭ اۋقىمدى سەنبىلىك ۇيىمداستىرىلدى. باستاما قورشاعان ورتانى تازارتۋعا جانە حالىق اراسىندا ەكولوگيالىق مادەنيەتتى قالىپتاستىرۋعا باعىتتالدى.
رەسپۋبليكا اۋماعىندا وتكەن شاراعا 422 مىڭنان استام ادام قاتىستى. ولاردىڭ قاتارىندا 135 مىڭنان استام مەملەكەتتىك ورگان وكىلدەرى جانە 52 مىڭنان استام ەرىكتى بولدى. اسىرەسە جاستار بەلسەندىلىك تانىتىپ, ستۋدەنتتەر مەن مەكتەپ وقۋشىلارى, جاستار ۇيىمدارى مەن ۆولونتەرلەر قوزعالىسىنىڭ مۇشەلەرى ەكولوگيالىق جاۋاپكەرشىلىكتى ءوز مويىندارىنا الۋعا دايىن ەكەندىكتەرىن كورسەتتى.
ناۋقان بارىسىندا قالالىق كوشەلەردەن باستاپ سۋ ايدىندارىنىڭ جاعالاۋلارى, ساياباقتار, ورمان القاپتارى مەن ەلدى مەكەندەردىڭ شەت ايماقتارىنا دەيىن تازالاۋ جۇمىستارى جۇرگىزىلدى. ناتيجەسىندە 9 مىڭ گەكتار جەر قوقىستان تازارتىلىپ, 12 مىڭ توننادان استام تۇرمىستىق قالدىق جينالدى.
سونىمەن قاتار كوگالداندىرۋ جۇمىستارىنا ەرەكشە كوڭىل ءبولىندى. اكتسيا اياسىندا 18 مىڭنان استام اعاش پەن بۇتا وتىرعىزىلدى.
جاسالعان جۇمىستاردىڭ قورىتىندىسى ەلىمىز تاريحىنداعى ەڭ اۋقىمدى ەكولوگيالىق شارالاردىڭ ءبىرى رەتىندە تانىلىپ, كينەس رەكوردتار كىتابىنا تىركەۋگە ۇسىنىلدى.
ەكولوگيالىق اكتسيا «تازا قازاقستان» ۇلتتىق باستاماسىنىڭ اياسىندا ءوتتى. بۇل جوبا اۋماقتاردى تۇرمىستىق قالدىقتان تازارتۋ ارقىلى ازاماتتاردىڭ جاۋاپكەرشىلىگىن ارتتىرۋعا جانە ەكولوگيالىق مادەنيەتتى نىعايتۋعا باعىتتالعان.
ۇيىمداستىرۋشىلار ءاربىر قاتىسۋشىعا بەلسەندى ازاماتتىق ۇستانىمى ءۇشىن العىس ءبىلدىردى. ولاردىڭ ايتۋىنشا, تابيعاتتى قورعاۋعا دەگەن سۇيىسپەنشىلىكپەن جاسالعان قاراپايىم ارەكەتتەردىڭ ءوزى ۇلكەن وزگەرىستەردىڭ باستاماسىنا اينالا الادى.