اقتوبە وبلىسى پوليتسيا دەپارتامەنتى «قۇقىقتىق ءتارتىپ» رەپۋبليكالىق جەدەل-پروفيلاكتيكالىق ءىس-شارالار اياسىندا وتكەن رەيد قورىتىندىسىن جاريالادى. قىلمىستاردىڭ الدىن الۋ مەن قوعامدىق قاۋىپسىزدىكتى قامتاماسىز ەتۋ ماقساتىندا 12-14 قىركۇيەك ارالىعىندا كۇشەيتىلگەن رەجيمدە جۇمىس ىستەگەن ءتارتىپ ساقشىلارى 64 قىلمىستى تىركەپ, ىزدەۋدە جۇرگەن 2 قىلمىسكەردى ۇستادى جانە زاڭسىز ەسىرتكى جانە سۋىق قارۋ ساقتاعان 50 تۇرعىندى جاۋاپقا تارتتى, دەپ حابارلايدى Egemen.kz.
سونداي-اق رەيد قورىتىندىسى بويىنشا 900 اكىمشىلىك قۇقىق بۇزۋشىلىق تىركەلگەن. ونىڭ ىشىندە ۇساق بۇزاقىلىقپەن –35, قوعامدىق ورىنداردا ماس كۇيدە جۇرگەن 160 تۇرعىن ۇستالسا, تۇرعىن ۇيلەردى ارالاۋ كەزىندە 165 ادامنىڭ تىركەۋسىز تۇرعانى, تۇنگى ۋاقىتتا 105 كامەلەتكە تولماعان ءجاسوسپىرىمنىڭ كوشەدە جۇرگەنى انىقتالدى. بۇل كۇندەرى جول قوزعالىسى ەرەجەلەرىن بۇزۋدىڭ 339 دەرەگى تىركەلگەن.
وسى رەتتە جاياۋ جۇرگىنشىلەردىڭ دە, كولىك جۇرگىزۋشىلەرىنىڭ دە جول قوزعالىسى ەرەجەلەرى مەن كوشەدەن ءوتۋ ءتارتىبىن ساقتاي بەرمەيتىندىگىن اتاپ كورسەتكەن ءجون. تاراتىپ ايتقاندا, 16 جۇرگىزۋشى ماس كۇيىندە كولىك باسقارۋ كەزىندە ۇستالسا, 13 ادامنىڭ جۇرگىزۋشى كۋالىگى بولماعان, 23 رەت قارسى قوزعالىس جولاعىنا شىعىپ كەتىپ, جاياۋ جولاۋشىلارعا ارنالعان وتكەلدە جۇرگىزۋشىلەر 79 رەت توقتاماي وتكەن.
پوليتسيا دەپارتامەنتى جاياۋ جۇرگىنشىلەر تاراپىنان دا كوشەدەن ءوتۋ ءتارتىبى ءجيى بۇزىلاتىندىعىن ەسكەرتىپ وتىر. سونىڭ دالەلى, ءۇش كۇن ىشىندە كولىك جولدارىنان ءوتۋ ەرەجەسىن بۇزعان 208 جاياۋ جۇرگىنشى جاۋاپكەرشىلىككە تارتىلدى. سالىستىرا قاراعاندا, بۇل كولىك جۇرگىزۋشىلەر جاساعان بۇزۋشىلىقتاردان ەكى ەسەپ كوپ. ءتارتىپ ساقشىلارى قۇقىقتىق ءتارتىپ – ءار ازاماتتىڭ ورتاق مىندەتى ەكەندىگىن ەسكەرتە وتىرىپ, بارلىق ازاماتتاردى قاۋىپسىزدىك تالاپتارىن قاتاڭ ساقتاۋعا شاقىرادى.
اقتوبە وبلىسى