الماتى وبلىسىنداعى قاتتى تۇرمىستىق قالدىقتار پوليگونى ءۇش كۇننەن بەرى جانىپ جاتىر. قازاقستاننىڭ توتەنشە جاعدايلار مينيسترلىگى پوليگونداعى ءورتتى ءسوندىرۋ ءۇشىن باسقا وبلىستاردان قوسىمشا كۇشتەر تارتتى. بارلىعى 200-دەن استام جەكە قۇرام مەن 90-نان استام تەحنيكا جۇمىلدىرىلعان, دەپ حابارلايدى Egemen.kz.
ء«ورتتى سوندىرۋگە الماتى, شىمكەنت قالالارى, قاراعاندى, تۇركىستان, جامبىل, جەتىسۋ جانە اباي وبلىستارىنىڭ تجد كۇشتەرى مەن قۇرالدارى, سونداي-اق قر تجم مارتبەك مامراەۆ اتىنداعى 52859 جانە قاسىم قايسەنوۆ اتىنداعى 68303 اسكەري بولىمدەرىنىڭ اسكەري قىزمەتشىلەرى قوسىمشا جۇمىلدىرىلدى», دەلىنگەن حابارلامادا.
تجم مالىمەتىنشە, ءورتتى ءسوندىرۋ جۇمىستارى قيىنداپ تۇر. سەبەبى قىزىل جالىن 10 مەتر تەرەڭدىكتەگى بىقسۋمەن جانە جەل باعىتىنىڭ وزگەرۋىمەن كۇردەلەنىپ كەلەدى.
ء«ورتتى ءسوندىرۋدىڭ 6 ۋچاسكەسى قۇرىلدى. ءورت ورنىندا «تەرەڭ-قارا» وزەنىنەن اشىق سۋ كوزىنە اۆتوموبيل-سورعى جەڭىن ورناتۋ ارقىلى ماگيسترالدىق جەلى تارتىلىپ, سۋدى ۇزدىكسىز جەتكىزۋ ۇيىمداستىرىلدى. بۇل جۇمىستارعا 6 بىرلىك تەحنيكا: ءبىر اۆتوموبيل-سورعى جەڭى جانە 5 اۆتوتسيستەرنا جۇمىلدىرىلدى. ءورتتى سوندىرۋگە 11 ءورت وقپانى جانە 1 تاسىمالدى لافەتتى وقپان بەرىلدى», دەپ حابارلادى تجم.
ايتا كەتەيىك, كۇندىز-ءتۇنى قۇتقارۋشىلار وشاقتاردى ينەرتتى ماتەريالدارمەن تولتىرىپ, توپىراقتى تىعىزداۋ جۇمىستارىن جۇرگىزىپ جاتىر. بۇل ءادىس وتتىڭ بىقسۋىن وتتەگىنىڭ قولجەتىمدىلىگىن تولىعىمەن جاۋىپ, ءورتتىڭ تۇپكىلىكتى جويىلۋىن قامتاماسىز ەتۋگە مۇمكىندىك بەرەدى.
سونىمەن قاتار توتەنشە جاعدايلار ءمينيسترى گەنەرال-مايور شىڭعىس ءارىنوۆتىڭ تاپسىرماسى بويىنشا ءورت ورنىنا ورتكە قارسى قىزمەت كوميتەتىنىڭ توراعاسى ەرلان تورەگەلديەۆ بارعان.