ىرعىز ەلدى مەكەنىندە اۋداننىڭ 180 جىلدىعىنا بايلانىستى بىرنەشە ءىس-شارا ءوتتى. تاريحي مەكەنگە ارنالعان عىلىمي كونفەرەنتسيادا ءحىح–حح عاسىرداعى تاريحي وقيعالاردى, ءتۇرلى زۇلمات كەزەڭدەرىن باستان وتكەرگەن ىرعىزدىڭ ەسىمدەرى ەسكەرۋسىز قالعان تۇلعالارى تۋرالى زەرتتەۋلەرىن بايانداسا, مەملەكەت قايراتكەرى ۇزاقباي ق ۇلىمبەتوۆتىڭ قىزى, ىرعىز اۋدانىنىڭ قۇرمەتتى ازاماتى, الماتىدان كەلگەن 93 جاستاعى ورىنشا قارابالينا ىبىراي التىنسارين مەكتەبىنەن تۇلەپ ۇشقان ىرعىز ارىستارى جونىندە تەبىرەنە سويلەدى.
اقتوبە وبلىسى اكىمىنىڭ ورىنباسارى اسىلبەك ەسەنباەۆ سوڭعى ءۇش جىلدا ىرعىز اۋدانىندا ىسكە اسىرىلعان جوبالار جونىندە باياندادى. ايتۋىنشا, وڭىرگە 40 ملرد تەڭگەگە جۋىق ينۆەستيتسيا تارتىلىپ, 12 ميلليارد تەڭگە كولەمىندە قۇرىلىس جۇمىسى جۇرگىزىلگەن. ونىڭ دالەلى, جاڭادان بوي كوتەرگەن مەكتەپتەر مەن بالاباقشالار, جاڭارتىلعان جولدار مەن ينفراقۇرىلىمدار. اۋداندا اۋىل شارۋاشىلىعى مەن شاعىن كاسىپكەرلىك نىساندارى بوي كوتەرىپ, تۇرعىنداردىڭ تۇرمىس دەڭگەيى جاقسارعان. تاعى ءبىر ارتىقشىلىعى, كەيىنگى جىلدارى ەڭ شالعاي اۋىلدارى – نۇرا, امانكول, جارماعا تابيعي گاز جەتكىزىلدى.
«كۇنى كەشە جاريالانعان مەملەكەت باسشىسى جولداۋىندا ۇكىمەتكە استانادان ارقالىق, تورعاي جانە ىرعىز ارقىلى ترانسكاسپي حالىقارالىق كولىك دالىزىنە تۋرا شىعاتىن اۆتوكولىك جولىنىڭ قۇرىلىسىن باستاۋدى تاپسىردى. بۇل باستاما – تەك ينفراقۇرىلىم ەمەس, ىرعىز اۋدانىنىڭ دامۋىنا دا جاڭا تىنىس بەرەدى», دەدى ءوڭىر باسشىسىنىڭ ورىنباسارى.
ءىس-شارا سوڭىندا تولىقتىرىلىپ, قايتا شىعارىلعان «ىرعىز» ەنتسيكلوپەدياسىنىڭ تۇساۋكەسەرى ءوتتى. ءىس-شارا ۇزاق جىلدان بەرى ىرعىزدا جىل سايىن وتكىزىلىپ كەلە جاتقان, ەل اراسىندا تانىلماي جۇرگەن تالاي ءداستۇرلى ءانشى مەن ونەرپازدىڭ باعىن اشقان «ايماقتى انمەن تەربەتىپ» ءان فەستيۆالىمەن جالعاستى. بۇل جولى دا وعان اقتوبە وبلىسىنان وزگە, كورشىلەس وبلىستاردىڭ ەلدى مەكەندەرىنەن كەلگەن انشىلەر مەن كۇيشىلەر قاتىستى.
اقتوبە وبلىسى