16 قىركۇيەكتەن باستاپ ەلىمىزدە نەكەگە ماجبۇرلەۋ جانە ادام ۇرلاۋعا بايلانىستى قىلمىستىق زاڭناماعا ماڭىزدى وزگەرىستەر ەنگىزىلەدى, دەپ حابارلايدى Egemen.kz Polisia.kz-كە سىلتەمە جاساپ.
ەڭ باستى جاڭاشىلدىق قىلمىستىق كودەكستىڭ 125-بابىنداعى ەسكەرتپەنى الىپ تاستاۋ بولدى. بۇعان دەيىن ۇرلانعان ادامدى ءوز ەركىمەن بوساتقان تۇلعا قىلمىستىق جاۋاپكەرشىلىكتەن بوساتىلۋى مۇمكىن ەدى. ەندى جابىرلەنۋشىنى ەرىكتى تۇردە بوساتقان كۇننىڭ وزىندە كىنالى ادام زاڭ بويىنشا جاۋاپقا تارتىلادى.
سونىمەن قاتار قىلمىستىق كودەكسكە جاڭا 125-1-باپ ەنگىزىلدى, ول «نەكەگە ماجبۇرلەۋ» ارەكەتىن قىلمىس رەتىندە قاراستىرادى. مۇنداي ارەكەت ءۇشىن ايىپپۇل سالۋ, تۇزەۋ نەمەسە قوعامدىق جۇمىستار, باس بوستاندىعىن شەكتەۋ نەمەسە باس بوستاندىعىنان ايىرۋ سياقتى جازالار قاراستىرىلعان. قىلمىستىڭ اۋىرلىعىنا بايلانىستى ايىپپۇل 2000 ايلىق ەسەپتىك كورسەتكىشكە دەيىن, ال باس بوستاندىعىنان ايىرۋ مەرزىمى – ەكى جىلعا دەيىن بەلگىلەنگەن.
ەگەر نەكەگە ماجبۇرلەۋ ابايسىزدا اۋىر زارداپتارعا اكەلسە, جازانىڭ مەرزىمى بەس جىلدان ون جىلعا دەيىن ۇلعايادى. ال ەگەر ارەكەت زورلىق-زومبىلىقپەن, كامەلەتكە تولماعاندارعا قاتىستى, تاۋەلدىلىگىن پايدالانۋ ارقىلى, ادامدار توبىمەن نەمەسە قىزمەت بابىن پايدالانىپ جاسالسا, قاتاڭ جازا كوزدەلگەن.
زاڭداعى بۇل تۇزەتۋلەر اسىرەسە ايەلدەر مەن جاسوسپىرىمدەر سياقتى وسال توپتاردى قورعاۋعا جانە نەكەگە ماجبۇرلەۋدىڭ الدىن الۋعا باعىتتالعان.