استانا. 20 ناۋرىز. بۇرناعى كۇنى اقورداداعى ديپلوماتيالىق كەزدەسۋلەر بارىسىندا اقش-تىڭ قازاقستانداعى جاڭا تاعايىندالعان ەلشىسى دجورج كلور ەلباسىنىڭ الدىندا قازاق تىلىندە بايانداما جاسادى. بۇل تۋرالى egemen.kz حابارلادى.
رەسمي بايانداماسىنىڭ القيسساسىن قازاق تىلىندە جاتقا سويلەۋدەن باستاعان ەلشى مىرزا ارتىنشا ارنايى جازىلعان ءماتىنىن قاعازعا قاراپ وقىدى. بايانداماسىن اياقتاعان ەلشى دجورج كلور مىرزا ەلباسى نۇرسۇلتان ءابىش ۇلىنا سەنىم گراموتاسىن تاپسىردى. ال قازاقستانعا كەلگەنىنە كوپ بولماعان ەلشى مىرزانىڭ رەسمي بايانداماسىن مەملەكەتتىك تىلدە جاساعانىنا ەلباسى ءوز ريزاشىلىعىن ءبىلدىردى.
سونداي-اق, بۇگىن اقوردادا ەلباسىمەن كەزدەسكەن كۋۆەيت, پاكستان, ساۋد ارابياسى جانە باسقا دا ەلشىلەر اۋدارماشىنىڭ كومەگىنە جۇگىنسە, بولگاريانىڭ قازاقستانداعى ەلشىسى ءوز بايانداماسىن ورىس تىلىندە جاساعان.
ەلباسى نۇرسۇلتان نازارباەۆتىڭ الدىندا باياندامالارىن جاساپ, سەنىم گراموتالارىن تاپسىرىپ بولعان ەلشى مىرزالار جۋرناليستەرگە سۇحبات بەردى. امەريكالىق ديپلومات بۇل جەردە دە ءوزىن ايرىقشا تانىتىپ, جۋرناليستەرگە قازاق تىلىندە سۇحبات بەردى. اقش ەلشىسىنەن كەيىن ءسوز العان بولگاريا ەلشىسى جۋرناليستەردىڭ الدىندا ءبىر-ەكى اۋىز ءسوزىن قازاق تىلىندە ايتۋعا ارەكەت ەتتى.
ءبىر ايتا كەتەتىنى, اقش-تىڭ ەلشىسى قازاقستانعا كەلگەنىنە كوپ ۋاقىت بولماسا دا, ءوزىنىڭ وسى ەلگە دەگەن قۇرمەتىن وسىلايشا ءبىلدىردى. جۋرناليستەرگە رەسمي مالىمدەمە جاساعان دجورج كلور مىرزا وزىنە قازاقتىڭ ۇلتتىق اسحاناسىن قاتتى ۇناتاتىنىن جانە قىمىز بەن شۇباتتىڭ ءدامى ءتىل ۇيىرەتىنىن دە جەتكىزدى.
مۇرات ايتقوجا.