ماڭعىستاۋ وبلىسىنىڭ اكىمى نۇرداۋلەت قيلىبايدىڭ توراعالىعىمەن مەملەكەت باسشىسىنىڭ جولداۋىندا ايتىلعان باستامالاردى تالقىلاۋعا ارنالعان اكتيۆ وتىرىسى ءوتتى.
جولداۋدا ايقىندالعان ەل ەكونوميكاسىن دامىتۋدىڭ جەتى نەگىزگى باعىتى اياسىندا اكىم وڭىردە اتقارىلىپ جاتقان جانە الداعى جۇمىستارعا نازار اۋداردى. ماڭعىستاۋ وبلىسىندا ينۆەستيتسيا تارتۋ, بيزنەس-ورتانى جانە ينۆەستيتسيالىق احۋالدى جاقسارتۋ بويىنشا بەلسەندى شارالار جۇرگىزىلىپ جاتىر. ناتيجەسىندە, الداعى ۋاقىتتا ءىرى قىتايلىق كومپانيالارمەن جاسالعان كەلىسىمدەر اياسىندا كولىك جانە لوگيستيكا, ماشينا جاساۋ, تسيفرلاندىرۋ جانە بالىق شارۋاشىلىعى سالالارىندا ينۆەستيتسيالىق جوبالار ىسكە اسىرىلماق.
اكىم جولداۋدا اتالعان كولىك-لوگيستيكا سالاسىن دامىتۋعا قاتىستى جوبالارعا دا توقتالدى. بۇگىندە مەملەكەت باسشىسىنىڭ قولداۋىمەن اقتاۋ پورتىندا كونتەينەرلىك حابتىڭ ءبىرىنشى كەزەڭى ىسكە قوسىلدى. ال 2028 جىلعا قاراي قۋاتى 11 ملن توننا بولاتىن «سارجا» تەڭىز تەرمينالى پايدالانۋعا بەرىلمەك. بۇدان بولەك, اقتاۋ حالىقارالىق اۋەجايىندا قۇنى 1 ملرد دوللاردى قۇرايتىن لوگيستيكالىق جانە اۆياتسيالىق حابتىڭ قۇرىلىسى باستالادى.
سونىمەن قاتار ءوڭىر باسشىسى تۋريزم سالاسىنىڭ جولداۋداعى باسىم باعىتتاردىڭ ءبىرى ەكەنىن اتاپ ءوتتى. وسىعان وراي, 2025–2029 جىلدارى جالپى قۇنى 193 ملرد تەڭگەنى قۇرايتىن 19 جوبا جۇزەگە اسىرىلادى. بۇل قوسىمشا جاڭا جۇمىس ورىندارىن اشۋعا مۇمكىندىك بەرەدى. بوزجىرا, شەرقالا, ايراقتى, كەندىرلى جانە جىلى جاعاجاي تۋريستىك ايماقتارىندا ەكولوگيالىق جانە جاعاجاي ءتۋريزمىن دامىتۋعا باسىمدىق بەرىلىپ وتىر.
وبلىس اكىمى جولداۋدا بەلگىلەنگەن مىندەتتەردى ءتيىمدى ورىنداۋ ءۇشىن ءماسليحات, اتقارۋشى بيلىك جانە ازاماتتىق قوعام اراسىنداعى ۇيلەسىمدى جۇمىستىڭ ماڭىزدىلىعىن اتاپ ءوتتى.
– مەملەكەت باسشىسى جولداۋدا ەل دامۋىنىڭ جاڭا باسىمدىقتارىن ايقىنداپ بەردى. ماڭعىستاۋ وبلىسى كولىك-لوگيستيكا سالاسىندا مەملەكەتتىڭ ەكونوميكاسى ءۇشىن ەرەكشە ماڭىزعا يە. مەملەكەت باسشىسى ءوز جولداۋىندا وسى سالانىڭ ماڭىزدىلىعىن اتاپ, دامىتۋ بويىنشا بىرقاتار تاپسىرما بەردى. سونىمەن قاتار بەينەۋ مەن سەكسەۋىل اراسىنداعى اۆتوجول قۇرىلىسىن اياقتاۋ تاپسىرىلدى. اتالعان باعىت ارقىلى جۇك تاسىمالىن وڭتايلاندىرۋعا جانە الماتى – بەينەۋ – سەكسەۋىل كولىك جەلىسىن دامىتۋعا مۇمكىندىك تۋادى. جوبانىڭ باستى ماقساتى – ەلىمىزدىڭ وڭتۇستىك جانە باتىس وڭىرلەرى اراسىنداعى بايلانىستى نىعايتۋ, ەكونوميكالىق ينتەگراتسيانى قولداۋ. ءوڭىر الەۋەتىن ءتيىمدى پايدالانۋ – ءبىزدىڭ باستى مىندەتىمىز. قازىر ماقساتىمىز – حالىقپەن بىرگە وسى باستامالاردى جۇزەگە اسىرىپ, ءوڭىردىڭ تۇراقتى دامۋىنا قول جەتكىزۋ, – دەدى ن.قيلىباي.