بالتابەك ءلاتىپپاي ۇلى مەن ءزىبايدا زەينوللاقىزى جاحيانوۆتار ءتورت بالادان ون بەس نەمەرە, ءبىر شوبەرە ءسۇيىپ وتىرعان باقىتتى اتا-اجە. ەلۋ جىلدان بەرى ءومىردىڭ ىستىق-سۋىعىن قول ۇستاسىپ بىرگە ەڭسەرىپ كەلە جاتقان ەرلى-زايىپتىلاردىڭ ءومىر جولى كوپكە ۇلگى.
قازىر ولار اقتوبە قالاسىنىڭ ىرگەسىندەگى «اقجار-2» تۇرعىن ءۇي الابىندا ۇلكەن ۇلى ومىربەكتىڭ وتباسىمەن بىرگە تۇرادى. ءزىبايدا اپاي ومىربەك پەن سامالدىڭ التى بالاسىنا دا باعدار بەرىپ, كەلىنىنە قولعابىس جاساۋدان جالىققان ەمەس. بىلەتىندەر وسى ءۇيدىڭ بالالارىن كەز كەلگەن جۇمىستان قاشپايتىن, ەڭبەكقور, تىندىرىمدى, قايىرىمدى دەپ باعالايدى. راسىندا دا بالتابەك اعاي مەن ءزىبايدا اپايدىڭ بالا تاربيەسىندەگى ۇستانىمى – ادال ەڭبەكپەن تابىس تابۋ. وسى قاعيدا اكەدەن بالاعا جالعاسىپ, ودان نەمەرەگە اۋىسىپ بارادى.
بالتابەك اعاي مەن ءزىبايدا اپايدىڭ ءومىر جولى ءبىر قاراعاندا قاراپايىم سياقتى كورىنسە دە, مازمۇنعا تولى. وتاعاسى 1970 جىلى قارابۇتاق اۋدانىنىڭ اقكول اۋىلدىق مەكتەبىن بىتىرگەن سوڭ ەڭبەك جولىن مەحانيزاتورلىقتان باستاعان. تراكتور تىزگىندەگەن جىگىت كەڭشاردىڭ ءشوبىن دە شاپتى, وتىن-سۋىن دا تاسىدى. 1975 جىلى اقكولدە ساۋىنشى بولىپ ەڭبەك جولىن باستاعان ءزىبايدا زەينوللاقىزىمەن شاڭىراق قۇردى.
1980–1990 جىلدارى كەڭشاردا 15 مىڭ باس ءىرى قارا بولعان ەكەن. جەرى قۇنارلى, ءشوبى شۇيگىن, سۋى مول جەردە اۋىلدىڭ بارلىق ادامىنا جۇمىس تابىلىپ, تابىستى شارۋاشىلىققا اينالعان. كەيىن ءزىبايدا اپاي اۋداننىڭ بالاباقشالارىنا كەڭشاردان جاڭا ساۋىلعان ءسۇت جەتكىزۋمەن اينالىستى. ەكى ۇل, ەكى قىز ءوسىرىپ جەتكىزىپ, 2016 جىلى زەينەتكەرلىككە شىقتى. بالتابەك اعاي 1978–1993 جىلدار ارالىعىندا كەڭشار تاراعانشا مالشى بولىپ ەڭبەك ەتتى. 2005 جىلى اقتوبە قالاسىنا وتباسىمەن كوشىپ كەلدى. 2018 جىلى زەينەت دەمالىسىنا شىقتى.
بالتابەك اعاي جاڭا وتاۋ كوتەرگەن جاستاردى تاتۋ بولۋعا ۇندەپ وتىرادى. ء«ۇي بولعان سوڭ ىدىس-اياق سىلدىرلاماي تۇرمايدى. جانجال تۋسا, اشۋدى سابىرعا, اقىلعا جەڭدىرگەن ءجون. وتاعاسى – ەر ادام ۇيدەگى ۇساق-تۇيەكتى تىزبەي, ايەل-بالاسىنان كەمشىلىك ىزدەمەي, جۇمىس ىستەپ, وتباسىن اسىراۋدى ويلاۋى كەرەك. ەر-ازامات ءتۇزدىڭ شارۋاسىن ۇيلەستىرسە, ءۇيدىڭ شارۋاسىن ءۇيىرىپ, بالا تاربيەسىمەن اينالىساتىن – ايەل انا. شاڭىراقتىڭ بەرەكە-بىرلىگى انانىڭ قولىندا. اقىلدى ايەل اعايىندى تابىستىرىپ, ىنتىماق-بەرەكەدە ۇستاپ, بالالاردى تۋىستارىمەن جاقىنداستىرادى. مەنىڭ ايتپاعىم, ەرلى-زايىپتىلار ءبىر-بىرىنەن كەمشىلىك ىزدەمەي, جامانىن جاسىرىپ, جاقسىسىن اسىرسا يگى. اكە-شەشەنىڭ سىيلاستىعىن كورگەن بالا دا كورگەنىن قايتالايدى», دەيدى ۇلكەن اۋلەت يەسى.
اقتوبە وبلىسى