بەس كۇندىك جالعاندا جايلى ءومىر كەشىپ, مايلى تاماق جەپ, جاقسى تۇرىپ, جاقسى جۇرسەك دەگەن ادەپكى پەندەلىك پايىم, ادامي ارماننان ءارى اسا الماي جاتامىز. ءدىني تۇرعىدان وي قورىتساق, مۇنداي تىرشىلىكتە ساۋاپتىڭ جۇعىنى دا جوق. ونى بىلسەك تە, بىربەتكەي قالپىمىزدان قايتپاي, قارا باستىڭ قامىن كۇيتتەگەننىڭ ۇستىنە كۇيتتەي تۇسەمىز. ءسويتىپ, ەنشىمىزگە بەرىلگەن ۋاقىت ماعىناسىز, ءمانسىز وتەدى دە كەتەدى.
الايدا, كوپشىلىككە ورتاق تانىم-تۇسىنىكتەن جوعارى تۇراتىن جاندار, بۇل ءومىردى جارىق ەتىپ, تۇتاس قوعامدى قاراڭعىلىق تۇنەگىنەن قۇتقارىپ جاتادى. ۇلاعاتتى ۇستازداردى ادامداردىڭ سول ساناتىنا جاتقىزا الامىز. ءبىر ءوزى جۇزدەگەن, مىڭداعان بۇلدىرشىنگە اقىل قۇيىپ, ءبىلىم دارىتاتىن ولاردى ارلى ادام تاربيەلەۋدىڭ ەڭ ءتيىمدى قۇرالى دەپ قابىلداساق تا ارتىق ەمەس.
وسى ايتىلعان يگى ىستەردى ءومىرىنە وزەك ەتكەن جەتەلى ۇستازداردىڭ ءبىرى, قاراعاندى وبلىسىنىڭ تۋماسى – يبراگيم الىباەۆ. ول 1924 جىلى قازاققا نەبىر جاقسى مەنەن جايساڭداردى سىيلاعان جاڭاارقا وڭىرىندە تۇگىسكەن اۋىلىندا دۇنيەگە كەلگەن. وتباسىندا كەنجەسى بولعان كەيىپكەرىمىز جاستايىنان زەرەك, ويلى بولىپ ءوستى. وقۋىن دا وزات اياقتاپ, ۇلكەن ءومىردىڭ تابالدىرىعىنا ەندى تاقاعان ساتىندە ۇلى وتان سوعىسى باستالىپ كەتتى. ءسويتىپ, 18-گە ەندى تولعان يبراگيم الىباەۆ 1942 جىلدىڭ قازان ايىندا مايدانعا اتتانىپ كەتتى. ماسكەۋ تۇبىندەگى كراسنايا پوليانا مەكەنىندە مەرگەندەر كۋرسىنان ءوتىپ, سۇراپىل سوعىستىڭ وتتى جىلدارىن بەلورۋس مايدانىندا وتكەردى. سان مارتە ۇرىسقا ءتۇسىپ, ەرلىكپەن شايقاستى. «ەرلىگى ءۇشىن», «كەنيگسبەرگتى ازات ەتكەنى ءۇشىن», «جۋكوۆ» مەدالدارى مەن II دارەجەلى ۇلى وتان سوعىسى وردەنى – سونىڭ ايعاعى. قانتوگىس سوعىس كەزىندە ەفرەيتور شەنىندە بولعان ول, اسكەري قىزمەتىن اعا لەيتەنانت شەنىندە اياقتاعان.
1946 جىلدىڭ قىركۇيەك ايىندا سوعىستان امان ورالعان يبراگيم الىباەۆ بىلىمگە دەن قويىپ, وقۋ وقىدى. پەداگوگيكالىق ينستيتۋتتى ءتامامداپ, ءوزى وقىعان تۇگىسكەن مەكتەبىنە ۇستاز بولىپ باردى. كەيىن سول مەكتەپتىڭ ديرەكتورى قىزمەتىنە تاعايىندالدى. جارتى عاسىردان استام ۋاقىت بالا وقىتىپ, شاكىرت تاربيەلەۋ ىسىنە شىنايى بەرىلگەن بۇل ەڭبەگى دە سول كەزدەگى قازاق كسر وقۋ مينيسترلىگى تاراپىنان جوعارى باعالانىپ, ول «حالىق اعارتۋ ءىسىنىڭ ۇزدىگى» اتاعىن الدى.
يبراگيم الىباەۆتىڭ ءومىر جولىنا قىسقاشا شولۋ جاساپ وتىرعانىمىزدىڭ ءبىر ماقساتى بار. ول – ارداقتى ۇستازدىڭ ەسىمى ۇمىت قالماۋى ءتيىس. وسى ورايدا تۇگىسكەن اۋىلىنىڭ ورتا مەكتەبىنە يبراگيم الىباەۆتىڭ ەسىمى بەرىلسە دەگەن ويىمىز اۋداندىق ءبىلىم باسقارماسىنىڭ اتقامىنەرلەرى تاراپىنان قولداۋ تاۋىپ, ءتيىستى شەشىمىن تابادى دەپ سەنەمىز. اسىل ءدىنىمىزدىڭ وزىندە مەشىت, كوپىر, مەكتەپ سالعاندار مەن شاكىرت وقىتقانداردىڭ امال كىتابى جابىلمايدى دەلىنگەن. وسىنى دا ەستەن شىعارمايىق, اعايىن!
داستان كەنجالين, «ەگەمەن قازاقستان».