Amazon كومپانياسىنىڭ Kuiper جوباسى اياسىنداعى سپۋتنيكتىك ينتەرنەت 2027 جىلدان باستاپ قازاقستاندا قولجەتىمدى بولماق. بۇل تۋرالى ۇكىمەت وتىرىسىندا تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ مالىمدەدى, دەپ حابارلايدى Egemen.kz.
مينيستر ۇسىنعان اقپاراتتاردا كورسەتىلگەندەي, Kuiper (Amazon) جۇيەسىن ەنگىزۋ بىرنەشە كەزەڭنەن تۇرادى. الدىمەن دايىندىق جۇمىستارى جۇرگىزىلىپ, كەيىن ەل اۋماعىندا جوعارى جىلدامدىقتى ينتەرنەت جەلىسى ىسكە قوسىلادى.
مينيسترلىكتىڭ ءباسپاسوز قىزمەتىنىڭ حابارلاۋىنشا, وتكەن جىلدىڭ قىركۇيەك ايىندا تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى Kuiper (Amazon) كومپانياسىمەن سپۋتنيكتىك بايلانىس قىزمەتىن ۇسىنۋ تۋرالى مەموراندۋمعا قول قويعان. قازىرگى تاڭدا وسى باعىتتاعى دايىندىق جۇمىستارى جۇرگىزىلىپ جاتىر.
ايتا كەتەيىك, بۇگىندە قازاقستاندا OneWeb جانە Starlink كومپانيالارىنىڭ سپۋتنيكتىك ينتەرنەتى جۇمىس ىستەپ تۇر.
سونىمەن قاتار, ۇكىمەت وتىرىسىندا مەملەكەت باسشىسى قاسىم-جومارت توقاەۆتىڭ 2025 جىلعى 8 قىركۇيەكتەگى قازاقستان حالقىنا جولداۋىن ىسكە اسىرۋ شارالارى قارالدى. پرەزيدەنت ءوز جولداۋىندا جاساندى ينتەللەكتىنى دامىتۋعا ەرەكشە نازار اۋدارعان بولاتىن.