پارلامەنت سەناتىنىڭ دەپۋتاتى نۇرتورە ءجۇسىپ مەملەكەت باسشىسى قاسىم-جومارت توقاەۆتىڭ بۇگىنگى جولداۋىندا كوتەرىلگەن پارلامەنتتىك رەفورما ماسەلەسىنە توقتالىپ, بۇل شەشىمنىڭ وڭاي بولماعانىن ايتتى, دەپ حابارلايدى Egemen.kz.
«مەملەكەت باسشىسىنىڭ بۇگىنگى جولداۋىندا پارلامەنتتىك رەفورما جاساۋ قاجەتتىگى تۋرالى شەشىمگە كەلگەنىن كوردىك. ول كىسىنىڭ وزىنە دە ايتۋ وڭاي بولماعانى بايقالدى. ويتكەنى ءوزىنىڭ قىزمەت اتقارعان, ون شاقتى جىل باسشىلىق جاساعان جەرى. ونى ءبىز سەزىنىپ وتىردىق. ءبىر پالاتالى پارلامەنت قۇرۋ رەفورما ارقىلى شەشىم قابىلدانىپ, وزگەرىستەر جاسالاتىن جاعدايدا ءتيىمدى بولۋى مۇمكىن دەپ ەسەپتەيمىن», دەدى نۇرتورە ءجۇسىپ.
ەستەرىڭىزگە سالا كەتەيىك, قاسىم-جومارت توقاەۆ قازاقستان حالقىنا جولداۋىندا ەلدىڭ ساياسي جۇيەسىن دامىتۋعا قاتىستى جاڭا باستاما كوتەردى. مەملەكەت باسشىسى الداعى ۋاقىتتا قازاقستاندا ءبىر پالاتالى پارلامەنت قۇرۋ ماسەلەسىن قوعامدىق تالقىلاۋعا شىعارۋدى ۇسىندى.