مەملەكەت باسشىسى قاسىم-جومارت توقاەۆ اۆتوكولىكپەن جۇك تاسىمالداۋعا ارنالعان شەكارا ماڭىنداعى قىزمەت ساپاسىن ارتتىرۋدى ۇكىمەت پەن اكىمدىكتەرگە تاپسىردى, دەپ حابارلايدى Egemen.kz.
«قازىر ەلىمىزدە 13 مىڭ شاقىرىم اۆتوكولىك جولدارى سالىنىپ, جوندەلىپ جاتىر. جول سالعان كەزدە ترانزيتتىك دالىزدەردىڭ ءمان-ماڭىزىنا باسا كوڭىل اۋدارعان ءجون. «سەكسەۋىل-بەينەۋ» جولىنىڭ قۇرىلىسىن تەزدەتۋ كەرەك. وسى جولدىڭ ارقاسىندا قازاقستان اۋماعى ارقىلى قىتايدان ەۋروپاعا جۇك تاسىمالداۋ مەرزىمىنىڭ ۇشتەن ءبىرى قىسقارادى», دەيدى پرەزيدەنت.
مەملەكەت باسشىسىنىڭ ايتۋىنشا, كونتەينەرمەن جۇك تاسىمالداۋ ىسىنە تىڭ سەرپىن بەرۋ كەرەك.
«الەمدە قۇرلىق ارقىلى تاسىمالداناتىن جۇكتىڭ 16 پايىزدان استامى كونتەينەرمەن جىبەرىلەدى. بىراق, ەلىمىزدە ونىڭ ۇلەسى ءالى دە تومەن – نەبارى 7 پايىزعا جۋىق», دەيدى ق.توقاەۆ.
پرەزيدەنت ۇكىمەت كونتەينەرمەن جۇك تاسىمالداۋ ءىسىن جانداندىرۋعا ارنالعان ارنايى باعدارلاما قابىلداۋى قاجەت ەكەنىن اتاپ ءوتتى. وندا ءمۋلتيمودالدى باعىتتاردى دامىتاتىن پارمەندى شارالار دا قاراستىرىلۋعا ءتيىس.
«جۇك تاسىمالداۋشىلار راسىمدەردىڭ كوپ ۋاقىت الاتىنىن ايتىپ, ءجيى شاعىمدانادى. ولار ءار قىزمەتتى ءتۇرلى تسيفرلىق جۇيە ارقىلى راسىمدەۋگە ءماجبۇر. ءتىپتى, بۇرىنعىداي قاعاز تولتىرىپ, اۋرە-سارساڭعا ءتۇسىپ جاتادى. كەيبىر شەكارا جانە كەدەن بەكەتىندە ساپالى ينتەرنەت جوق. بۇل دا جۇرتتىڭ نارازىلىعىن تۋعىزادى. وسىنداي كەلەڭسىز جاعدايلاردى تەز ارادا تۇزەتۋىمىز قاجەت», دەدى پرەزيدەنت.
قاسىم-جومارت توقاەۆ قازان ايىنىڭ سوڭىنا دەيىن كەدەن جانە لوگيستيكا قىزمەتىن كورسەتەتىن Smart Cargo بىرىڭعاي تسيفرلىق جۇيەسىن ىسكە قوسقان ءجون ەكەنىن ايتتى. بۇل جۇيە ينفراقۇرىلىمدى جەكە كومپانيالارعا اۆتوماتتى تۇردە بىردەي قولجەتىمدى ەتەدى.
«شەكاراداعى وتكىزۋ بەكەتتەرى جاڭعىرتىلىپ جاتىر. بيىل 8 بەكەت تولىعىمەن ىسكە قوسىلادى. الداعى 3 جىلدا تاعى 34 بەكەت جاڭارادى. بۇل – وتە اۋقىمدى شارۋا. سەبەبى, كەيبىر بەكەتتەردىڭ ساپاسى سىن كوتەرمەيدى, قازىرگى زاماننىڭ تالابىنا ساي كەلمەيدى, ەلىمىزدىڭ بەدەلىنە نۇقسان كەلتىرەدى.
اۆتوكولىكپەن جۇك تاسىمالداۋعا ارنالعان شەكارا ماڭىنداعى قىزمەت ساپاسىن جاقسارتۋدى ۇكىمەت پەن اكىمدىكتەرگە تاپسىرامىن. ەلىمىزدىڭ بۇكىل اۋماعىندا كەدەرگىسىز تاسىمالداۋ جۇيەسىن قالىپتاستىرۋ – وتە ماڭىزدى مىندەت. ترانزيتتىك جۇكتەردىڭ «جاسىل ءدالىز» قاعيداسىمەن ەش توسقاۋىلسىز وتۋىنە بارىنشا جاعداي جاساۋ قاجەت», دەدى پرەزيدەنت جولداۋىندا.