استاناداعى ۇلتتىق مۋزەيدە «ستالينگراد شايقاسى» مۋزەي-قورىعى جانە رەسەي اسكەري-تاريحي قوعامىنىڭ ۆولگوگراد بولىمىمەن بىرلەسىپ قازاقستان مادەنيەت جانە سپورت مينيسترلىگىنىڭ, رەسەي مادەنيەت مينيسترلىگىنىڭ جانە «حابار» اگەنتتىگىنىڭ قولداۋىمەن ۇلتتىق مۋزەيدىڭ «عاسىرلار قويناۋىنان سىر شەرتكەن قازاقستان» جوباسى اياسىندا «جەڭىسكە قۇرمەت!» اتتى كورمەنىڭ اشىلۋ سالتاناتى بولىپ ءوتتى.
شاراعا جيىلعان قاۋىم ءبىر مينۋت ۇنسىزدىك جاريالاپ, ومىردەن وتكەن مايدانگەرلەردىڭ رۋحىنا تاعزىم جاسادى.
«ءبىز بۇگىن ۇلتتىق مۋزەيگە وتكەنىمىز بەن تاريحىمىزعا قۇرمەت كورسەتىپ, ەرلىككە تاعزىم جاساۋ ءۇشىن كورمە اشىپ جاتىرمىز. ەرلىك ەشقاشاندا ۇمىتىلمايدى. بۇگىندە ءبىز جەڭگەن ەلدىڭ ۇرپاقتارىمىز دەپ كەۋدەمىزدى كەرىپ ماقتانامىز. قۇرمەتتى ارداگەرلەر, سىزدەردىڭ ەرلىكتەرىڭىزدى كەيىنگى ۇرپاققا دۇرىستاپ جەتكىزسەك, ءبىز ءۇشىن ۇلكەن امانات سول. ءبىز سىزدەردىڭ الدارىڭىزدا بارلىق ۋاقىتتا تاعزىم ەتەمىز. سىزدەردىڭ كەۋدەلەرىڭىزدەگى ءاربىر ماراپات ءور رۋحتارىڭىزدىڭ باعاسى. قازىرگى جاستار سىزدەردىڭ جاساعان ەرلىكتەرىڭىزدى ەستۋ, كورۋ, ءبىلۋ ارقىلى وزدەرىنە قۋات, جىگەر, رۋح الادى», – دەدى كورمەدە ۇلتتىق مۋزەيدىڭ ديرەكتورى دارحان مىڭباي.
سونداي-اق, باسقوسۋدا جەڭىستىڭ كەيىنگى ۇرپاققا ۇلگى-ونەگە بولارلىق قاسيەتتەرىنە توقتالا كەلىپ: «ءبىز سىزدەر جاساعان ەرلىكتى, سىزدەر كورگەن قان مايداندى بولاشاق جاس ۇرپاققا جەتكىزۋدى ءوزىمىزدىڭ پارىزىمىز دەپ سانايمىز», – دەدى «حابار» اگەنتتىگى اكتسيونەرلىك قوعامىنىڭ باسقارما توراعاسى ايدوس ۇكىباەۆ.
كورمەنىڭ نەگىزگى بولىمىندەگى ستەندتەرگە «قازاقستان سوعىس جىلدارىندا» تاقىرىبىمەن قازاقستاندىق ديۆيزيالاردىڭ سۋرەتتەرى, مۇراعاتتىق قۇجاتتارى, ۇرىس جولدارىنىڭ كارتالارى جانە وسى سوعىس بارىسىنداعى ءتۇبىرلى وزگەرىستىڭ باستاۋى بولعان «1942-1943 جىلدارعى ستالينگراد شايقاسى» كورمەسىنىڭ فوتوقۇجاتتىق ءبولىمى قويىلىپتى.
كەڭەس اسكەرلەرىنىڭ ستالينگرادتى قورعاعان جانە نەمىستەردىڭ ەدىل مەن دون وزەندەرىنىڭ ارالىعىنا ورنالاسقان ءىرى ستراتەگيالىق توبىن تالقانداعان جاۋىنگەرلىك ارەكەتتەرى 1942 جىلدىڭ 17 شىلدەسى مەن 1943 جىلدىڭ 2 اقپانى ارالىعىندا ءوتتى. ستالينگراد مايدانىنىڭ 120 ءبولىمىنىڭ جەكە قۇرامى مەن قىزمەتى ورنالاسقان باتىس قازاقستستان وبلىسى مايدان ىرگەسىندە بولاتىن. ستالينگراد ءۇشىن شايقاسقا قازاقستاندا جاساقتالعان 9 اسكەري ديۆيزيا قاتىستى. قازاقستان حالقىنىڭ ءفاشيزمدى جەڭۋگە قوسقان ۇلەسى «سوعىستىڭ باسى, ديۆيزيالاردىڭ جاساقتالۋى», «قازاقستاندىقتار سوعىس مايدانىندا», «قازاقستان – مايدان ارسەنالى», «تىل ەڭبەككەرلەرىنىڭ جەڭىسكە قوسقان ۇلەسى», «داڭق شوقجۇلدىزى», «باتىرلار داڭقى ماڭگى وشپەيدى! بۇل – ولىلەرگە ەمەس, بۇل – تىرىلەرگە كەرەك!» اتتى ستەندتەردەن كورىنىس تاۋىپتى.
كورمەنىڭ كەلەسى بولىمىنە باتىرلاردىڭ جەكە زاتتارى, مايداننان جازعان حاتتارى, وردەندەرى مەن مەدالدارى, ۇلى وتان سوعىسى كەزىندەگى قارۋلار جانە ت.ب. ەكسپوناتتار قويىلىپتى.
بەرىك سادىر, «ەگەمەن قازاقستان».
سۋرەتتەردى تۇسىرگەن ەدىل ورمانوۆ.