كوكشەتاۋ قالاسىنىڭ تۇرعىنى ەلۆيرا مۇقاشەۆا بەس بالانىڭ اناسى. بۇگىندە پىسىق كەلىنشەك سۇتتەن ءتۇرلى تاعام دايىنداپ, تۇتىنۋشىلاردىڭ باتاسىن الىپ ءجۇر. ونىمدەرى وبلىستان تىس جەرلەرگە دە ساتىلىپ جاتىر. ەلۆيرا دايىنداعان بۋراتتو سىرى, يوگۋرت, ايران, قايماقتىڭ ءدامىن تاتقان كوپشىلىك كۇن ارالاتىپ قايتا كەلەدى.
2019 جىلى ءتورتىنشى بالاسى دۇنيەگە كەلگەننەن كەيىن كىشكەنتايلار ءجيى-ءجيى اۋىراتىن بولىپتى. دارىگەرلەرمەن كەڭەسكەن, مامانداردان اقىل سۇراعان. «اۋرۋ استان» دەپتى بىلەتىندەر. جالدامالى پاتەردە تۇراتىن ەلۆيرا قابىرعاسىمەن كەڭەسە كەلە, باۋىر ەتى بالالارىنا تازا تاعام بەرمەك بولىپ تالپىنعان. اۋەلى 100 ليتر ءسۇت ساتىپ الىپ, سىر قايناتقان. تىرناقالدى اسى ءتاپ-ءتاۋىر بولىپ شىعىپتى. ءدامىن تاتىپ كورسە, ءتىل ۇيىرەدى. ۇيالماي ۇسىنۋعا بولاتىن-اق تاعام. سەنبى كۇنى وبلىس ورتالىعىنداعى «جىبەك جولى» بازارىنا الىپ شىققان. جولى بولعاندا, ساۋداسى ءساتتى ءجۇردى. ءتۇپ-تۇگەل ساتىلىپ كەتتى. ەندى ويلانباستان تاعى دا ءسۇت ساتىپ العان. «كوز قورقاق, قول باتىر» دەگەن وسى. شىنداپ كىرىسسە, ءوزىنىڭ دە قولىنان كەلەدى ەكەن. جاتپاي-تۇرماي ءسۇت ونىمدەرىنىڭ ءتۇرىن كوبەيتۋگە ۇمتىلعان. بالالارىنا دا جەتىپ جاتىر. اق ىشكەن سوڭ اجارلارى كىرىپ, وڭالا باستايدى. كوڭىلىنە قۋانىش ۇيالاعان.
اۋىلداعى اجەلەرىمىز ءدامى ءتىل ۇيىرەتىن سۇزبە جاسايتىن, جاقسىلاپ ۇيىپ تۇرعان قاتىقتى قاپقا سالىپ, ارقالىققا اسىپ قويىپ, ابدەن سورعىتىپ سۇزەتىن. ەرتەرەكتە سۇزبە ەكى ءتۇرلى ادىسپەن ازىرلەنگەن. ونى تۇزداپ تا, تۇزداماي دا دايىندايتىن. كەبەرسىگەن سۇزبە قارىنعا سالىناتىن-دى. تۇزدالعان سۇزبە كوبىرەك ساقتاۋعا, كوجەگە, سورپاعا ەزىپ ىشۋگە, اسىرەسە ۇزاق جولعا شىققاندا جولاۋشىنىڭ جول ازىعىنا ارنالاتىن. ءارى سۋسىن, ءارى ادامعا كۇش-قۋات بەرەتىن اجەپتاۋىر قۋاتتى تاعام رەتىندە سانالاتىن. قايماعى الىنباعان قويۋ سۇتتەن ۇيىتاتىن. قازىرگى قازاق اۋىلدارىندا قويىرتپاقتى كۇندىز قولىڭا شام الىپ ىزدەسەڭ دە تابا المايتىنىڭا مەن كەپىل. قاتىققا, ايرانعا, ىركىتكە ءسۇت نەمەسە سۋ قوسىپ تورسىققا قۇيىپ, قانجىعاعا بايلاپ ءجۇرىپ, دالادا ىشەتىن تاعام.
قانجىعادا كوپ ءجۇرىپ, ابدەن شايقالىپ, بابىنا كەلگەننەن كەيىن قويىرتپاقتىڭ اشىعان ءدامى استە بىلىنبەيدى. ىشۋگە ەرەكشە ءدامدى. اسقازاننىڭ قورىتۋىنا وتە جەڭىل. ەرتەرەكتە ونى مالشىلار, جولاۋشىلار ءجيى پايدالاناتىن. اۋىلدىڭ يت, مىسىعىن قۋالاپ دامىل تاپپايتىن بىزگە اينالىپ-تولعانىپ وتىرىپ, شالاپ ىشكىزەتىن. شالاپ-ايرانعا سۋىق سۋ قوسىپ, ساپىرىپ شولدەگەندە ىشەتىن سۋسىن.
وسى كۇنى ايەلدەردىڭ كوبى ۇمىتقان ىركىتتىڭ ءوزى ءبىر بولەك اڭگىمە. قۇرت قايناتۋ, مايىن ءبولىپ الىپ, ىركىتىن سۋسىنعا ءىشۋ ءۇشىن كۇبىگە جيناپ قويادى دا ۇستىنە شيكى ءسۇت قۇيىپ جيناي بەرەتىن. كەيىن ودان قۇرت قايناتادى. ساپىرىپ سۋسىن ورنىنا دا ىشەدى. ءالى ەسىمدە, سۇتتەن جاسالاتىن تاعامنىڭ ىشىندە بىرشىما دەيتىن دە ءتۇرى بولاتىن. ول كوپ تۇرىپ اشىپ كەتكەن ايران نەمەسە ىركىت تۇرلەرى. بىرشىمادان دا قۇرت قايناتاتىن. اجەلەرىمىزدىڭ قايماقتارى قانداي ەدى, شىركىن! پىسكەن قايماق, شيكى قايماق.
ەسىمىزدە جۇرگەن ەستەلىكتى قايتا جاڭارتساق ۇزاپ كەتەرمىز. ەلۆيراعا ورالايىق. 2023 جىلى اقمولا وبلىستىق كاسىپكەلەر پالاتاسىنىڭ شاقىرۋىمەن ء«بىر اۋىل – ءبىر ءونىم» بايقاۋىنا قاتىسىپ, ۇزدىك ۇشتىكتىڭ قاتارىنان كورىنىپتى. «وسى ءبىر بايقاۋ ماعان كادىمگىدەي قانات ءبىتىردى. ايتپەسە, وعان دەيىن بيزنەس جوسپاردىڭ نە ەكەنىن بىلمەيتىن ەدىم. ءوزىم وندىرگەن ءونىمدى قاپتاۋدى دا مەڭگەرمەگەنمىن. وسىنىڭ ءبارىن ەلگە يگىلىگى ءتيىپ تۇرعان جوباعا قاتىسقاننان كەيىن ۇيرەندىم», دەيدى.
2024 جىلى ەلۆيرا كەزەكتى گرانتقا يە بولدى. بۇل جولى – 5 ميلليون تەڭگە. قولىنا قاراجات تيگەن سوڭ 350 ليتر ءسۇتتى قايناتىپ, سىر جاسايتىن ىدىستى ساتىپ الدى. بۇگىندە عيماراتتى جالعا العان. تسەح ىشىندە قاجەتتىنىڭ ءبارى بار. ەندىگىسى ادال ەڭبەك قانا. وتكەن جىلدىڭ كۇزىندە اقتاۋدا وتكەن حالىقارالىق «Cheese Open 2024» بايقاۋىنا قاتىستى. ەلۆيرا بايقاۋعا التى ءونىم ۇسىنعان. تورتەۋى ماراپاتقا يە بولدى. ءبىر التىن, ەكى كۇمىس جانە قولا. ەندى فرانتسيادا وتەتىن الەمدىك بايقاۋعا قاتىسپاق. بۇل بايقاۋدا قازاقتىڭ ءدامىن ۇسىنادى. ونىڭ ىشىندە ءۇمىت ەتكەنى – تۇيە سۇتىنەن دايىندالعان سىر. سان عاسىر بويى حالقىمىزبەن بىرگە جاساسىپ كەلە جاتقان ۇلتتىق تاعامنىڭ تورتكۇل دۇنيەنى تامساندىراتىن رەتى بار ەمەس پە؟
كوكشەتاۋ