تۇرعىندارىنىڭ سانى جاعىنان وڭىردەگى ەڭ ۇلكەن مۇنايلى اۋدانىندا جاڭا وقۋ جىلى باستالىسىمەن سۋ جاڭا «كەلەشەك مەكتەبى» ەسىگىن وقۋشىلارعا ايقارا اشتى. بۇل وقۋشىلارعا زاماناۋي ءارى قولايلى ءبىلىم ورتاسىن قۇرۋدى ماقسات ەتكەن «كەلەشەك مەكتەپتەرى» ۇلتتىق جوباسى كەزەڭ-كەزەڭىمەن جۇزەگە اسىرىلىپ جاتقان ماڭعىستاۋ وبلىسىنداعى كەزەكتى ءبىلىم وشاقتارىنىڭ ءبىرى.
ناقتىراق ايتساق, مەملەكەت باسشىسى ق.توقاەۆتىڭ ءبىلىم سالاسىنداعى باستامالارىن جۇزەگە اسىرۋ شەڭبەرىندە ماڭعىستاۋ وبلىسىندا «كەلەشەك مەكتەپتەرى» جوباسى اياسىندا 12 600 ورىندىق 13 مەكتەپ سالۋ جوسپارلانعان بولسا, قازىرگى تاڭدا 9 مەكتەپ سالىندى.
قىركۇيەكتىڭ 5-ءى كۇنى مۇنايلى اۋدانىنداعى باتىر اۋىلى حازار شاعىن اۋدانىندا اتالعان جوبا اياسىندا سالىنعان №19 ورتا مەكتەپتە اشىق ەسىك كۇنى ءوتتى. سىيىمدىلىعى 1 200 وقۋشىعا ارنالعان اسەم مەكتەپ تابالدىرىعىن بيىل العاش رەت 155 ءبىرىنشى سىنىپ وقۋشىسى اتتادى. وقۋ ورنى ءوز جۇمىسىن 12 زەرتتەۋشى, 21 ساراپشى, 57 مودەراتور جانە 4 جاس مامانمەن باستاپ وتىر.
مەكتەپتە بارلىعى 61 ءپان كابينەتى بار. ونىڭ ىشىندە روبوتتەحنيكا, STEM, ديزاين جانە تەحنولوگيا, ۆيزۋالدى ونەر, مۋزىكا, ءۇي مادەنيەتى مەن تاماقتانۋ مادەنيەتىنە ارنالعان كابينەتتەر بار. بارلىق سىنىپ زاماناۋي جابدىقتارمەن قامتىلىپ, سونداي-اق ەرەكشە ءبىلىمدى قاجەت ەتەتىن بالالار ءۇشىن سەنسورلىق بولمە, ينكليۋزيۆتى ءبىلىمدى قولداۋ كابينەتى, سونداي-اق مۇگەدەكتىگى بار وقۋشىلارعا ارنالعان جەدەل ساتى قاراستىرىلعان. مەكتەپ قاۋىپسىزدىگىن قامتاماسىز ەتۋ ماقساتىندا عيمارات ىشىندە 126 بەينەكامەرا ورناتىلىپ, اۋلاسىندا بالالارعا ارنالعان ويىن جانە سپورت الاڭدارى جاساقتالعان.
– مۇنايلى اۋدانى جاڭا وقۋ جىلىن لايىقتى دايىندىقپەن قارسى الدى. جاڭا وقۋ جىلى باستالىسىمەن سۋ جاڭا زاماناۋي «كەلەشەك مەكتەبىنىڭ» اشىلۋى – تۇرعىندار, اتا-انالار مەن وقۋشىلار, ۇستازدار ءۇشىن زور قۋانىش. ءبىلىم ورداسى – ەلىمىزدىڭ ءبىلىمدى, بىلىكتى كەلەشەگىن تاربيەلەيتىن كيەلى ورىن بولسىن دەپ تىلەيمىز, دەدى مۇنايلى اۋداندىق ءبىلىم ءبولىمىنىڭ باسشىسى س.جۇبانوۆ.
ماڭعىستاۋ وبلىسى