3-5 قىركۇيەك ارالىعىندا بۇۇ-نىڭ ازيا جانە تىنىق مۇحيتى ءۇشىن ەكونوميكالىق جانە الەۋمەتتىك كوميسسياسى (ەسكاتو) ۇيىمداستىرعان تۇراقتى دامۋ ماقساتتارىن ىسكە اسىرۋ جونىندەگى سولتۇستىك جانە ورتالىق ازيانىڭ توعىزىنشى كوپجاقتى فورۋمى ءوتتى, دەپ جازادى Egemen.kz.
فورۋم بۇۇ باس حاتشىسىنىڭ ورىنباسارى, ەسكاتو اتقارۋشى حاتشىسى ارميدا سالسيا اليسجابانانىڭ بەينەۇندەۋىمەن باستالدى. ول بۇۇ-نىڭ ودم جونىندەگى وڭىرلىك ورتالىعىن ورتالىق ازيا مەن اۋعانستان ءۇشىن ىسكە قوسۋدىڭ ماڭىزدىلىعىن اتاپ ءوتىپ, ونى وڭىرلىك كۇش-جىگەردى ءتيىمدى ۇيلەستىرۋ جولىنداعى ماڭىزدى قادام دەپ اتادى.
ءىس-شاراعا ۇكىمەتتىك قۇرىلىمداردىڭ, حالىقارالىق ۇيىمداردىڭ, عىلىمي جانە ساراپتامالىق قوعامداستىقتاردىڭ وكىلدەرى قاتىسسا, قازاقستان اتىنان ۆيتسە-مينيستر اسان دارباەۆ باستاعان ۇلتتىق ەكونوميكا مينيسترلىگىنىڭ دەلەگاتسياسى وكىلدىك ەتتى.
ۆيتسە-مينيستر قازاقستاندا تۇراقتى دامۋ ماقساتتارىن ۇلتتىق ستراتەگيالار مەن باعدارلامالارعا ينتەگراتسيالاۋ بويىنشا جۇيەلى جۇمىس جۇرگىزىلىپ جاتقانىن جەتكىزدى. ونىڭ ايتۋىنشا, ودم ۇلتتىق ينديكاتورلارى بەكىتىلگەن. ول مەملەكەتتىك جوسپارلاۋ قۇجاتتارىنا مىندەتتى تۇردە ەنگىزىلەدى. اسان دارباەۆ ستراتەگيالىق جانە بيۋدجەتتىك پروتسەستەردىڭ ۇيلەسىمدىلىگى رەسۋرستاردى باسىم مىندەتتەردى ىسكە اسىرۋعا تيىمدىرەك باعىتتاۋعا مۇمكىندىك بەرەتىنىن دە اتاپ ءوتتى.
فورۋمدا قازاقستاننىڭ ودم-دى ىلگەرىلەتۋدەگى تاجىريبەسىنە ەرەكشە نازار اۋدارىلدى. ۇەم الەۋمەتتىك سالانى, قۇقىق قورعاۋ جانە ارنايى ورگانداردى دامىتۋ دەپارتامەنتىنىڭ ديرەكتورى نۇرگۇل جاننازاروۆا ەلىمىزدىڭ قالالار مەن وڭىرلەردىڭ تۇراقتىلىعىن قامتاماسىز ەتۋ تاسىلدەرىن ۇسىندى.
فورۋم اياسىندا ەرىكتى ۇلتتىق شولۋلاردى دايىنداۋ بويىنشا مامانداندىرىلعان سەمينار ءوتتى. مۇندا ءوڭىر ەلدەرى پروگرەستى باعالاۋدا جانە ودم-عا قول جەتكىزۋ بويىنشا ودان ارعى قادامداردى انىقتاۋدا تاجىريبە الماستى.
قازاقستاندىق تاجىريبەنى ەكونوميكالىق زەرتتەۋلەر ينستيتۋتىنىڭ ودم حاتشىلىعىنىڭ ديرەكتورى باقىتگۇل حامبار ورتاعا سالدى. ول «ەشكىمدى ارتتا قالدىرماۋ» قاعيداتىنا جانە جاھاندىق ماقساتتاردى وڭىرلەر دەڭگەيىندە وقشاۋلاۋعا باستى نازار اۋدارىلاتىن ءۇشىنشى ەرىكتى ۇلتتىق شولۋدى دايىنداۋ تۋرالى ايتتى.
سەمينارعا قاتىسۋشىلار جۇرتشىلىقتى كەڭ كولەمدە تارتۋ جانە باسىمدىقتاردى قالىپتاستىرۋ كەزىندە سۇراۋ سالۋ مالىمەتتەرىن پايدالانۋدىڭ قازاقستاندىق تاجىريبەسىن جوعارى باعالادى.
ساراپشىلاردىڭ پىكىرىنشە, مۇنداي ءتاسىل ودم-عا قول جەتكىزۋ پروتسەسىن نەعۇرلىم اشىق جانە ازاماتتاردىڭ ناقتى قاجەتتىلىكتەرىنە باعدارلاۋعا مۇمكىندىك بەرەدى.