استانا. 8 مامىر. ءۇندىستان سوتى بولليۆۋد جۇلدىزى سالمان حاندى 2002 جىلى ءۇيسىز جۇرگىنشىنى جولدا قاعىپ كەتىپ, ءولتىرىپ قويعانى ءۇشىن بەس جىلعا سوتتاپ, تۇرمەگە جونەلتتى. بۇل تۋرالى 24UZ حابارلادى.
حابارلانعانداي, قازا تاپقان ازامات ءارتىستىڭ باسىپ كەتكەن 5 ادامىنىڭ ءبىرى بولعان. كەيىن رۋلدە وتىرعان سالمان حانعا بۇل ءولىمدى قاساقانا جاسادى دەگەن ايىپ تاعىلعان. ال اكتەر جول-كولىك وقيعاسىنا ءوزى ەمەس, جانىندا وتىرعان جۇرگىزۋشىسى كىنالى دەپ باققانىمەن, سۋديا ونى قابىل المادى. ول حاننىڭ سول كەزدە ماس بولعانىن, سول ءۇشىن پوليتسيادان قاشقانىن دالەلدەپ شىقتى.
بولليۆۋد جۇلدىزىنىڭ ادۆوكاتتارى سوت شەشىمىنە نارازىلىق بىلدىرمەكشى. ال بايقاۋشىلار اكتەرگە وسىنشالىقتى قاتاڭ جازا قولدانىلىپ جاتقانىن ونىڭ بۇعان دەيىن دە كوپتەگەن جانجالعا قاتىسى بولعانىمەن ءتۇسىندىرىپ وتىر.
مۇرات ايتقوجا.
دەرەك, سۋرەت: 24UZ.