استانا. 20 ناۋرىز. فۋتزالدان 2016 جىلعى ەۋروپا چەمپيوناتىنا ىرىكتەۋ ءتۋرنيرى اياسىندا قازاقستان پورتۋگاليا قۇراماسىن 3:1 ەسەبىمەن جەڭدى. اتالعان تۋرنيردە قازاقستان 7-توپتا پورتۋگاليا, رۋمىنيا جانە گرۋزيا قۇرامالارىمەن كەلەسى كەزەڭ جولداماسىن ساراپقا سالۋدا. بۇل تۋرالى egemen.kz حابارلادى.
ويىننىڭ ءۇشىنشى مينۋتىندا پورتۋگاليا العا شىقتى. ناتيجەلى سوققىنىڭ اۆتورى – ريكاردينو. ۇزىلىسكە ساناۋلى مينۋتتار قالعان كەزدە قارسىلاستارىمىزدىڭ شابۋىلشىسى كاردينال قىزىل قاعاز الىپ, الاڭنان كەتتى. دەگەنمەن, بۇل مۇمكىندىكتى ءبىزدىڭ فۋتبولشىلار پايدالانا المادى.
قازاقستان قۇراماسى ەسەپتى ويىننىڭ 28-مينۋتىندا تەڭەستىردى. ارىپتەستەرىنەن پاس العان نيكولاي پەنگرين پورتۋگاليا قاقپاشىسىن قاپى قالدىردى. برازيليالىق مامان كاكاۋدان ءتالىم الاتىن فۋتبولشىلارىمىز ارادا 8 مينۋت وتكەندە ەسەپتە العا شىقتى. بۇل جولى مەرگەندىگىمەن كوزگە تۇسكەن ميحايل پەرشين بولاتىن. ال وعان ناتيجەلى پاس شىعارعان قازاق فۋتبولشىسى سەرىك جامانقۇلوۆ. ويىن سوڭىندا دەيىن تارازى باسىن تەڭەستىرە الماعان پيرەنەي تۇبەگىنىڭ وكىلدەرى تاۋەكەلگە باردى. قاقپاشىنى ويىنشىعا الماستىرعان ولار شابۋىل شەبىن كۇشەيتتى. ەكىنشى گولدى سوعۋعا دەگەن ىنتاسى سونشالىق پورتۋگاليا ويىنشىلارى قورعانىستى مۇلدەم قاراۋسىز قالدىردى. كەزەكتى سوققىلاردىڭ بىرىندە دوپتى قاعىپ العان قازاقستاننىڭ قاقپاشىسى يگيتا بىردەن قارسىلاستىڭ قاقپاسىن نىساناعا الدى. دوپ دىتتەگەن جەرگە ءدوپ ءتۇسىپ, قازاقستان ءۇشىنشى گولدى سوقتى.
ءبىزدىڭ قۇراما ءۇشىن بۇل وسى تۋرنيردەگى العاشقى جەڭىس. ازىرگە قورجىنىمىزدا ءۇش ۇپاي بار. سونداي-اق, پورتۋگاليا دا وسىنشا ۇپايعا يە. توپ باسىندا 6 ۇپايمەن رۋمىنيا كەلەدى. گرۋزيادا ازىرگە ۇپاي جوق.
قازاقستان سوڭعى ماتچتى 21 ناۋرىز كۇنى گرۋزيندەرگە قارسى وتكىزەدى. استانا ۋاقىتى بويىنشا 21:00-دە باستالاتىن ويىن ءبىز ءۇشىن شەشۋشى بولماق. العاشقى كەزدەسۋدە رۋمىنيادان 4:6 ەسەبىمەن جەڭىلگەن ەدىك. ال پورتۋگاليا گرۋزيانى 7:0 ەسەبىمەن تاس-تالقان ەتىپ جەڭدى.
ەلامان قوڭىر.
دەرەك: egemen.kz.
سۋرەت: kairat-futsal.kz.