استانادا الەمدەگى بەدەلدى وقۋ ورنىنىڭ ءبىرى – كارديفف ۋنيۆەرسيتەتىنىڭ شەتەلدەگى ءارى ورتالىق ازياداعى العاشقى حالىقارالىق كامپۋسى اشىلدى. مازمۇندى ءىس-شاراعا قازاقستان مەن ۇلىبريتانيا ۇكىمەتىنىڭ وكىلدەرى, سونداي-اق Cardiff University جانە Cardiff University Kazakhstan باسشىلىعى قاتىستى.
سالتاناتتى اشىلۋ راسىمىندە عىلىم جانە جوعارى ءبىلىم ءمينيسترى ساياسات نۇربەك قازاقستان وڭىرلىك اكادەميالىق حاب رەتىندە دامىپ كەلە جاتقانىن ايتتى.
«بيىل ەلىمىزگە 31 مىڭنان اسا شەتەلدىك ستۋدەنت كەلدى. مەملەكەت باسشىسىنىڭ باستاماسىمەن عىلىم مەن جوعارى ءبىلىم سالاسىندا اۋقىمدى ستراتەگيا جۇزەگە اسىپ وتىر. سونىڭ ءبىرى – ەلىمىزدە جەتەكشى شەتەلدىك زەرتتەۋ ۋنيۆەرسيتەت فيليالدارىنىڭ اشىلۋى. سوڭعى ءۇش جارىم جىلدىڭ ىشىندە 40-قا جۋىق شەتەلدىك جوعارى وقۋ ورنى ەلىمىزگە كەلسە, ونىڭ بەسەۋى ءىرى كامپۋستارىن اشۋعا شەشىم قابىلدادى», دەدى مينيستر.
سونداي-اق س.نۇربەكتىڭ ايتۋىنشا, بۇگىندە ەلىمىزدىڭ ءار وڭىرىندە بەدەلدى شەتەلدىك جوعارى وقۋ ورىندارىنىڭ فيليالدارى جۇمىس ىستەي باستادى. ءاربىر سەرىكتەسپەن ون جىلدىق كەلىسىمشارت جاسالىپ, جەرگىلىكتى وقۋ ورىندارىن حالىقارالىق ستاندارتتارعا ساي زەرتتەۋ ۋنيۆەرسيتەتىنە اينالدىرۋ مىندەتى تۇرعانىن اتاپ ءوتتى.
ودان كەيىن ءسوز العان Cardiff University پرەزيدەنتى ءارى ۆيتسە-كانتسلەرى, پروفەسسور ۆەندي لارنەر قازاقستاندا تاريحي وقۋ ورنى فيليالىنىڭ اشىلۋى زور قۇرمەت ەكەنىن جەتكىزدى.
«بۇل – Cardiff University-ءنىڭ العاشقى حالىقارالىق كامپۋسى. ءبىز اكادەميالىق تۇرعىدان وزات ستۋدەنتتەردىڭ العاشقى لەگىن قابىلداۋدى اسىعا كۇتتىك. سونداي-اق «Russell Group» قۇرامىنداعى قازاقستاندا كامپۋس اشقان العاشقى ۋنيۆەرسيتەتپىز. بۇگىنگى كامپۋستىڭ اشىلۋى – ۇلكەن ەڭبەكتىڭ ناتيجەسى. بۇل رەتتە قازاقستان ۇكىمەتىنە ءبىزدىڭ ورتاق ماقساتىمىزدى جۇزەگە اسىرۋعا كورسەتكەن قولداۋىنا ريزاشىلىعىمدى بىلدىرەمىن», دەدى ول.
ايتا كەتەيىك, Cardiff University حالىقارالىق رەيتينگتە جوعارى ورىنعا يە بولعان. ماسەلەن, «QS World University Rankings» 2026 نۇسقاسىندا 181-ورىن السا, «Complete University Guide» 2026 نۇسقاسىندا 22-ورىندى يەلەنگەن. زەرتتەۋلەردىڭ 91 پايىزى حالىقارالىق دەڭگەيدە ۇزدىك دەپ تانىعان (REF 2021). سونىمەن بىرگە «Russell Group» مۇشەلىگى Cardiff University-ءىن ۇلىبريتانياداعى جەتەكشى زەرتتەۋ ۋنيۆەرسيتەتىنىڭ ءبىرى رەتىندە بەكىتكەن. وسى قىركۇيەكتەن جۇمىسىن باستاعان ۋنيۆەرسيتەت ءتورت جىلدىق باكالاۆريات باعدارلاماسىنا ستۋدەنتتەر قابىلدايدى. وقۋ تولىق اعىلشىنشا. ءدارىستى Cardiff University جانە Cardiff University Kazakhstan پروفەسسور-وقىتۋشىلار قۇرامى جۇرگىزەدى. اتالعان وقۋ ورنى ۇلىبريتانياداعى باس ۋنيۆەرسيتەتتىڭ تىكەلەي باسقارۋىمەن جۇمىس ىستەپ, بريتاندىق ساپا ستاندارتىن قامتاماسىز ەتەدى. ستۋدەنتتەر كامپۋستار اراسىندا اكادەميالىق موبيلدىلىككە يە بولادى. زاماناۋي جاتاقحانامەن قامتىلادى.