استانا. 23 ماۋسىم. استانادا قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ مەكسيكا پارلامەنتى سەناتىنىڭ كوميتەت توراعاسى, ۇلتتىق ارەكەت پارتياسىنىڭ مۇشەسى گابريەلا كۋەۆاسپەن كەزدەستى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتىنە سىلتەمە جاساعان «قازاقپارات» حابارلادى.
كەزدەسۋ بارىسىندا تاراپتار ەكىجاقتى ىنتىماقتاستىقتىڭ جاعدايى مەن دامۋ پەرسپەكتيۆالارىن تالقىلادى. قازاقستاننىڭ سىرتقى ىستەر ءمينيسترى اتاپ وتكەندەي ىقپالداستىق جاڭا دەڭگەيگە كوتەرىلىپ كەلەدى.
ەرلان ىدىرىسوۆ: «مەكسيكا ۇكىمەتىنىڭ بيىلعى جىلى استانادا ەلشىلىك اشۋ تۋرالى شەشىمى بۇعان دالەل بولا الادى. ءبىز بۇل ماسەلەدە بارلىق قولداۋ كورسەتۋگە دايىنبىز», – دەدى.
بۇدان باسقا, سىرتقى ساياسي ۆەدومستۆو باسشىسى مۇناي-حيميالىق, ماشينا جاساۋ, تاۋ-كەن ءوندىرىسى, مەتاللۋرگيالىق, توقىما جانە تاعام ونەركاسىبى سالالارىندا مەكسيكامەن تىعىز ىنتىماقتاستىقتى دامىتۋعا مۇددەلى ەكەنىن ايتتى. ول ءۇشىن جەتەكشى مەكسيكالىق كومپانيالاردى قازاقستاندىق بيزنەسپەن اۋىل شارۋاشىلىعىندا, تاعام ونىمدەرىن وندىرۋدە ىنتىماقتاستىققا شاقىردى.
قازاقستاننىڭ دۇنيەجۇزىلىك ساۋدا ۇيىمىنا كىرۋى تۋرالى كەلىسسوزدەر اياقتالعانىن نازارعا الا وتىرىپ, مينيستر كۇزگە جوسپارلانعان پرەزيدەنت نۇرسۇلتان نازارباەۆتىڭ مەكسيكاعا ساپارى بارىسىندا قوسارلانعان سالىقتى بولدىرماۋ تۋرالى كونۆەنتسياعا جانە ءوزارا ينۆەستيتسيالاردى قورعاۋ تۋرالى كەلىسىمگە قول قويۋدى, سونداي-اق قازاقستاننىڭ مەكسيكالىق ۆيزالاردى ەلەكتروندىق راستاۋ جۇيەسىنە ەنۋى تۋرالى ماسەلەنى قاراۋدى ۇسىندى.
كەزدەسۋ سوڭىندا مينيستر قازاقستاننىڭ 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە كانديداتۋراسىن 2013 جىلى قولداعانى ءۇشىن مەكسيكا تاراپىنا العىس ايتتى.
«مۇشەلىككە سايلانۋ - ەلىمىزدىڭ سىرتقى ساياساتىنداعى باستى مىندەتتەردىڭ ءبىرى», – دەگەن ەرلان ىدىرىسوۆ مەكسيكانىڭ بۇۇ قاۋىپسىزدىك كەڭەسىندەگى مول تاجىريبەسىن زەردەلەۋگە قازاقستاننىڭ ىنتالى ەكەنىن ايتا كەتتى.
ال گابريەلا كۋەۆاس مەكسيكا قازاقستاننىڭ ىشكى ساياساتتاعى جانە حالىقارالىق ارەناداعى جەتىستىكتەرىن ءجىتى باقىلاپ وتىرعانىن, سونداي-اق ءار سالادا ەكىجاقتى ىنتىماقتاستى دامىتۋعا دايىن ەكەنىن جەتكىزدى.
تالعات رايىمبەك.
دەرەك, سۋرەت: «قازاقپارات».