كەشە فۋتبولدان وڭتۇستىك افريكا رەسپۋبليكاسىندا ءوتىپ جاتقان الەم چەمپيوناتىندا العاشقى شيرەك فينالدىق كەزدەسۋ وتكىزگەن گوللانديا مەن برازيليا قۇرامالارىنىڭ اراسىنداعى ويىندا وڭتۇستىكامەريكالىق اياق دوپ شەبەرلەرى جيىرما جىلدان بەرى العاش رەت جارتىلاي فينالعا جولداما الا الماي, قارسىلاستارىنان جەڭىلىپ قالدى. اسا تارتىستى, شيەلەنىستى وتكەن بۇل ماتچتا “پەنتەوكامپەوندار” گوللاندىقتاردان 1:2 ەسەبىمەن جەڭىلىپ, الەم چەمپيوناتىمەن قوش ايتىسۋعا ءماجبۇر بولدى.
ال گوللانديا قۇراماسى ءوزىنىڭ تاريحىندا وسىمەن ءتورتىنشى رەت جارتىلاي فينالعا جولداما الىپ وتىر. ونىڭ ەكەۋىندە – 1974 جانە 1978 جىلدارى وتكەن الەم چەمپيوناتتارىنىڭ فينالىنا شىعىپ, سول كەزدەسۋلەردە الاڭ يەلەرى – گەرمانيا مەن ارگەنتينادان جەڭىلىس تاپقان ەدى. گوللانديانىڭ ءۇشىنشى جارتىلاي فينالدىق ويىنى 2002 جىلى وسى برازيليا قۇراماسىمەن وتكەنىن بىلەمىز. سول وڭتۇستىك كورەيا مەن جاپونيادا وتكەن مۋنديالدە گوللاندىقتار قارسىلاستارىنا ماتچتىڭ سوڭىندا بەرىلگەن پەنالتيدەن عانا ەسە جىبەرىپ العان بولاتىن.
ءسويتىپ, قوس قۇرامانىڭ ءتورتىنشى مارتە جولى تۇيىسكەن بيىلعى دودادا ەۋروپالىقتار كوپتەن بەرى كۇتكەن ەسەسىن قايتارىپ الدى دەسە بولادى. بۇل ماتچتا گوللانديا, اسىرەسە, 2-ءشى كەزەڭدە قاي جاعىنان الىپ قاراعاندا دا برازيليالىقتاردان باسىم بولدى دەسەك, ارتىق ايتقاندىق ەمەس. قىسقاسى, دۋنگا كارلوستىڭ شاكىرتتەرى ۆان مارۆەيك بەرتتىڭ اياقدوپ شەبەرلەرىنىڭ الدىندا شاراسىزدىق تانىتتى. وسى كەزدەسۋدە گوللانديا قۇراماسىنداعى ۋەسلي سنەيدەردىڭ ويىننىڭ ەكىنشى جارتىسىندا سوققان دوبى ماتچتىڭ تاعدىرىن شەشىپ بەردى.
كەزدەسۋدە برازيليالىقتار العاشقى بولىپ دوپ سوققان ەدى. ويىنىڭ 10-مينوتىندە روبينونىڭ ادەمى گولى وتانداستارىن جەڭىسكە جىگەرلەندىرگەندەي بولعان. الايدا, گوللاندىقتاردىڭ ەكىنشى تايمدا تايلى-تۇياعىمەن قارسىلاستارىنىڭ قاقپاسىنا لاپ قويىپ, شابۋىلداعانىنا دۋنگانىڭ ەسىگىن ايقارا جاپقان قورعانىسى شىداي الماي, ەكى دوپتى جىبەرىپ الدى.
بۇل كەزدەسۋدىڭ اسا تارتىستى وتكەنىن باس تورەشىنىڭ بەس سارى قاعاز جانە ءبىر قىزىل قاعاز كورسەتكەنىنەن دە كورۋگە بولادى. ەندى وسىمەن ءتورتىنشى رەت مۋنديالدىڭ جارتىلاي فينالىنا شىققان گوللاندىقتاردىڭ كەلەسى قارسىلاسى ۋرۋگۆاي مەن گانا اراسىنداعى كەزدەسۋدە انىقتالادى. شيرەك فينالدان بۇدان باسقا ويىندارى پاراگۆاي مەن يسپانيا جانە ارگەنتينا مەن گەرمانيا قۇرامالارى اراسىندا وتەدى. قازىر “نەمىس ماشينەسىنىڭ” ديەگو مارادونانىڭ شاكىرتتەرىنەن باسىم تۇسەتىنى ءجونىندە اراكىدىك ايتىلۋدا. گەرمانيانىڭ چەمپيوناتقا بارا الماعان شابۋىلشىسى ميحاەل باللاك وتانداستارىنا ارگەنتينانى 3:1 ەسەبىمەن جەڭەدى دەگەن بولجام جاساسا, وزگە ەلدىڭ قۇراما كوماندالارىنىڭ باس باپكەرلەرى دە وسىنداي پىكىر بىلدىرۋدە. وسى ماتچتىڭ جانە شيرەك فينالداعى باسقا دا ويىنداردىڭ ناتيجەلەرىن گازەتىمىزدىڭ كەلەسى نومىرىندە حابارلايتىن بولامىز.
الەم چەمپيوناتىنا قاتىستى تاعى ءبىر دەرەك كەلتىرسەك, قازىر گوللانديا مەن برازيليا ويىنىن قوسا ەسەپتەگەندە 57 كەزدەسۋ ءوتىپ, وندا 129 گول سوعىلىپتى. ال ماتچتاردى ستاديوننان تاماشالاعان جانكۇيەرلەردىڭ سانى 2 691 011 ادامعا جەتكەن. ورتاشا العاندا ءبىر ويىنعا 48 054 ادام كەلگەن ەكەن.
داستان كەنجالين.